Tafit A Seikitá Ngeni King

SAUL a pwal sótun liapeni Tafit. A angei 3,000 soufiu, iir kewe mi angéch seni meinisin, iwe a ló kútta Tafit. Lupwen Tafit a silei ei pwóróus, a tiinaaló spai pwe repwe ppii ia Saul me néún kewe soufiu repwe nóm ie ika a pwin. Iwe, Tafit a eisini rúúemén me lein chienan kewe: ‘Ién leimi epwe fitieiló ngeni ikewe Saul a nóm ie?’

Apisai a pélúweni: ‘Ngang.’ Apisai, i néún fefinen Tafit we itan Seruia. Lupwen Saul me chienan kewe ra annut, Tafit me Apisai ra ánnifelong ikewe ra nóm ie. Ra angei wokun Saul we wokun maun me an we leenien konik, ewe mi nóm únúkkún chék mékúren Saul. Ese wor e kúner are rong pún iir meinisin ra annutochou.

Nengeni mwo Tafit me Apisai. Ra fen sú, iwe ra nónnóm wóón eú ppan. Tafit a kétiw ren Apner, ewe meilapen soufiun Israel: ‘Pwata kese túmúnú noum na masta, ewe king? Nengeni! Ifa wokun we me an we leenien konik?’

Saul a neló. A esilla leúwen Tafit, iwe a eis: ‘En Tafit?’ Ka tongeni kúna Saul me Apner kukkutiw en?

Tafit a pélúweni Saul: ‘Ewer, ai samol ewe king.’ Iwe Tafit a eis: ‘Pwata ka sótun liapeniei? Met sókkun mettóch mi ngaw ua féri? Iei wokum we wokun maun, O king. Ereni emén lein noum kewe soufiu epwe etto angei.’

Saul a apasa: ‘Ngang ua mwáál. Ai féffér mi umwes.’ Iwe Tafit a ló seni, nge Saul a liwiniti imwan we. Nge Tafit a pwisin ekieki: ‘Lón eú ekkan rán, Saul epwe nieiló. Upwe sú seni, iwe súúri fénúen ekkewe chón Filistia.’ Iwe ina met a féri. Tafit a otupu ekkewe chón Filistia pwe repwe lúkú pwe i a fen peniir.

Mwirin och fansoun, ekkewe chón Filistia ra ettá pwe repwe maunei Israel. Lón ewe maun, Saul me Jonatan ra máló. Ei pwóróus a fókkun eletipechowu Tafit, iwe a makkeei eché kél mi múrinné. Lón ena kél a apasa: ‘Ua letipechou fán itom, pwii Jonatan. A ifa me áchengichengum me rei!’

Mwirin Tafit a liwiniti Israel, a ló ngeni ewe telinimw itan Hepron. A wor maun lefilen ekkewe aramas mi filatá néún Saul we mwán Isiposet pwe epwe king, me chókkewe mi mochen pwe Tafit epwe king. Nge néún Tafit kewe aramas ra win. A 30 ierin Tafit lupwen an we a seikitá ngeni king. A nemenem úkúkún fisu esopw ier lón Hepron. Ikkeei iten ekkóch me lein ekkewe át Tafit a néúniir me ikena ie, Amnon, Apsalom me Atonia.

A tori eú fansoun lupwen Tafit me néún kewe soufiu ra ettá pwe repwe liapeni eú telinimw mi lingéch itan Jerusalem. Joap, pwal emén néún fefinan we Seruia, a wisen sou emmwen lón ewe maun. Iwe, Tafit a pwáraatá an kilisou ngeni Joap ren an seikaatá ngeni ewe wis meilapen soufiu. Iwe iei, Tafit a poputá le king lón ewe telinimw Jerusalem.