Emén Nengngin A Álisi Emén Meilap

EN MI silei met ei kúkkún nengngin a apasa? E kan ereni ei fefin usun néún Jiowa we soufós itan Elisa me ekkewe mettóch mi amwarar Jiowa a álisi an epwe tongeni féri. Ei fefin ese silei usun Jiowa pún esap i emén chón Israel. Iwe, sipwe ppii pwata ei nengngin a nóm lón imwen ei fefin ei.

Ei fefin, emén fin Siria. Pwúlúwan we, itan Naeman, i meilapen soufiun Siria. Ekkewe chón Siria ra liapeni ei kúkkún nengnginin Israel, iwe ra uwei ngeni pwúlúwen Naeman we pwe epwe néúni chón angang.

A úri Naeman eú samau watte itan keinepan. Ei samau a tongeni angawa futuken emén pwe epwe pweiló seni inisin. Ina popun, iei alón ewe nengngin ngeni pwúlúwen Naeman we: ‘Amwo nei we masta epwe ló chuuri néún Jiowa we soufós lón Israel. I epwe tongeni echikara seni an keinepan.’ Mwirin, emén a esile ngeni pwúlúwen ei fefin we.

Naeman a fókkun mochen an epwe chikaretá, iwe a meefatá an epwe feiló Israel. Lupwen a tori ikewe ie, a feiló ren imwen Elisa we. Elisa a akkúnowu néún we chón angang pwe epwe ereni Naeman pwe epwe tútú lón ewe chénúpupu Jortan fán fisu. Ei mettóch a fókkun asonga Naeman iwe a apasa: ‘Ekkewe chénúpupu lón fénúei we ra múrinné seni meinisin ekkewe chénúpupu lón Israel!’ Mwirin án Naeman apasa ei, a ló.

Nge néún kewe chón angang ra ereni: ‘Maing, ika pwe Elisa a fen erenuk óm kopwe féri eú mettóch mi weires, kopwe féri. Nge pwata kosap tongeni tútú usun a fen apasa?’ Naeman a aúseling ngeni alón néún kewe chón angang, iwe a otuetiw inisin lón ewe chénúpupu Jortan fán fisu. Lupwen an a wes, futukan a échúló me péchékkúleló!

Naeman a fókkun pwapwa. A liwiniti Elisa iwe a ereni: ‘Iei ua wesewesen silei pwe ewe Koten Israel, I chék ewe Kot mi enlet wóón unusen fénúfan. Iwe kese mochen kopwe angei ei liffang seniei.’ Nge Elisa a apasa: ‘Aapw, usap angei.’ Elisa a silei pwe ese pwúng an epwe angei ewe liffang pún Jiowa ewe mi echikaraatá Naeman. Nge néún Elisa we chón angang itan Kehasi a mochen ewe liffang fán pwisin itan.

Iwe, iei ewe mettóch Kehasi a féri. Mwirin án Naeman we a ló, Kehasi a chei. Kehasi a apasa: ‘Elisa a akúnéeito pwe upwe erenuk pwe a mochen angei och seni óm kewe liffang fán iten ekkóch chienan kewe mi kerán feito le chuuri i.’ Ina eú kapas chofona. Nge Naeman ese silei pwe iei eú kapas chofona, ina minne a ngeni Kehasi ekkóch ekkewe mettóch.

Lupwen Kehasi a liwinló lón imwan, Elisa a fen silei met a féri pún Jiowa a fen ereni. Iwe Elisa a apasa: ‘Pokiten óm féri ei mettóch mi ngaw, iwe ewe keinepan mi úri Naeman, epwe uruk.’ Iwe ina met a mwittir fis!

Met sia tongeni káé seni ekkeei pwóróus meinisin? Áeúin, sipwe usun ewe kúkkún nengngin me kakkapas usun Jiowa. A tongeni an epwe efisatá chómmóng mettóch mi múrinné. Oruuan, sisap lamalam tekia usun napanapen Naeman me lepoputáán, nge sipwe álleasochisi néún Kot kewe chón angang. Iwe aúlúngátin, sisap kapas chofona usun met Kehasi a féri. Sia tongeni káé chómmóng mettóch seni ach ákkálleani ewe Paipel.