Sona Me Ewe Iik Watte

NENGENI ei mwán lón ei mataw. A nóm lón watteen osukosuk, ika met? Ei iik epwele oromaaló! En mi silei ié ei mwán? Itan Sona. Sipwe ppii ika ifa usun a tori ei watteen osukosuk.

Sona emén néún Jiowa soufós. Ekiseló chék mwirin málóón Elisa, Jiowa a ereni Sona: ‘Kopwe feiló ren ewe telinimw mi lap, Ninifa. A watte ngawen ekkewe aramas ikena ie, iwe ua mochen óm kopwe afalafaler.’

Nge Sona ese mochen feiló. Iwe a fiti efóch waa mi sáiló towau seni Ninifa. Jiowa ese sani án Sona sú. Iwe, a efisi eú mélúmél watte. A kon watte ewe mélúmél pwe usun itá epwele kok ena waa. Ekkewe chón angang ra fókkun niwokkus, iwe ra sié ngeni ar kewe kot ren álillis.

Iwe Sona a ereniir: ‘Ua kan fel ngeni Jiowa, ewe Kot mi féri láng me fénúfan. Nge ngang ua sú seni ewe angang Jiowa a ereniei ai upwe féri.’ Iwe ekkewe chón angang ra eis: ‘Met aupwe féri ngonuk pwe epwe úkútiw ei mélúmél?’

Sona a erá: ‘Oturueitiw lemataw, iwe ewe mataw epwe lúasefálliló.’ Chón ewe waa rese mochen féri ei mettóch, nge lupwen an a watteeló ewe mélúmél, ra oturatiw Sona. Mwittir chék, ewe mélúmél a wesiló me ewe mataw a lúasefál.

Lupwen Sona a mwootiw lón ewe sáát, ei watteen iik a oromaaló. Nge ese máló. A nónnóm lón luken ena iik ren úkúkún úlúngát rán me úlúngát pwin. Sona a fókkun mengiringir ren an ese álleasochisi Jiowa me an ese ló Ninifa. Iwe, ka silei met a féri?

Sona a iótek ngeni Jiowa ren álillis. Jiowa a efisi án ewe iik epwe mwusenaawu Sona me leppii. Mwirin Sona a feiló Ninifa. Esap pwe ei pwóróus a áiti ngenikich úkúkún lamoten ach sipwe féri mettóch meinisin Jiowa a apasa?