Kot A Álisi King Hiskia

EN MI silei pwata ei mwán a iótek ngeni Jiowa? Pwata a watiw ekkeei taropwe mwen mesen án Jiowa ei roong? Ei mwán itan Hiskia. I kingen ekkewe ruu einangen Israel mi nóm éér. Iwe, a watte an osukosuk. Pwata?

Pún ekkewe mwichen soufiun Asiria ra fen akkufu ekkewe 10 einang mi nóm efeng. Jiowa a mutatá ei mettóch an epwe fis pún ekkewe aramas ra kon ngaw. Iwe iei, ekkewe mwichen soufiun Asiria ra feito pwe repwe maun ngeni mwúún ekkewe ruu einang.

Ewe kingen Asiria a kerán tiinaato ekkeei taropwe ngeni King Hiskia. Ikkeei ekkewe taropwe Hiskia a fen watiw mwen mesen Kot. Ekkeei taropwe ra esiita Jiowa, iwe ra kan etipetipa Hiskia pwe epwe fangetá. Ina ewe popun Hiskia a iótek: ‘O Jiowa, selánikem seni ewe kingen Asiria. Iwe meinisin ekkewe mwú repwe silei pwe en chék ewe Kot.’ Itá Jiowa epwe aúselinga Hiskia?

Hiskia, i emén king mi múrinné. Ese usun ekkewe king mi ngaw lón mwúún ekkewe 10 einangen Israel, are ese pwal usun seman we mi ngaw, King Ahas. Hiskia a fen túmúnúéchú pwe epwe álleasochisi meinisin án Jiowa kewe allúk. Iwe wesin án Hiskia iótek, ewe soufós Aisea a tiinaato ngeni ei pwóróus seni Jiowa: ‘Ewe kingen Asiria esap tolong lón Jerusalem. Esap wor emén lein néún kewe soufiu epwe arap ngeni. Resap nikáppichi ngeni ewe telinimw efóch féún nikáppich.’

Nengeni ei lios ikkeei ie. En mi silei ika ié ekkeei soufiu mi máló? Ikkeei iir ekkewe chón Asiria. Jiowa a tiinatiw néún we chónláng me lón eú chék pwin ewe chónláng a nieló 185,000 soufiun Asiria. Ina pwata, ewe kingen Asiria a fangetá me liwinló ngeni fénúan.

Mwúún ekkewe ruu einang ra ngaseló me ekkewe aramas ra kinamwe ekis fansoun. Nge mwirin málóón Hiskia, néún we mwán Manasa a wiliti king. Manasa me néún we mwán Amon, ewe mi king mwirin, iir me rúúemén ra fókkun ngaw. Me ewe fénú a uren atai allúk me féffér mi efeiengaw. Lón ewe fansoun néún King Amon kewe chón angang ra nieló i, néún we itan Josia a seikitá pwe epwe kingen mwúún ekkewe ruu einang.