Emén Mwán Ese Niwokkus

NENGENI ekkeei aramas mi takiri ei alúwél. Ka silei ika ié ei? Iei i Jeremaia. I emén néún Kot soufós mi uwei pwóróus mi fókkun lamot.

Ekiseló mwirin án King Josia poputá le ataieló ekkewe ululun lón ewe fénú, Jiowa a ereni Jeremaia pwe epwe néúni soufós. Iwe nge, Jeremaia a ekieki pwe a kon kúkkún ierin an epwe emén soufós. Nge Jiowa a ereni pwe epwe álisi.

Jeremaia a ereni ekkewe chón Israel pwe repwe úkútiw seni ar kewe féfféringaw. A apasa: ‘Ekkewe kot chón ekkewe mwú ra fel ngeniir, iir kot chofona.’ Nge chómmóng chón Israel ra sani ar repwe fel ngeni ekkewe ululun lap seni ar fel ngeni Jiowa ewe Kot mi enlet. Ekkewe aramas ra chék takiri Jeremaia lupwen a ereniir pwe Kot epwe apwúngúúr ren ar féfféringaw.

A feffeiló ekkewe ier, iwe Josia a máló me úlúngát maram mwirin, néún we itan Jehoiakim a wiliti king. Jeremaia a chúen chék ekkereni ekkewe aramas: ‘Jerusalem epwe taló ika ouse siwili ámi kana féffér mi ngaw.’ Ekkewe souasor ra turufi Jeremaia me ra kétá: ‘Kopwe ninniiló pokiten óm apasa ekkeei mettóch.’ Iwe, ra ereni ekkewe sou nemenemen Israel: ‘Jeremaia epwe ninniiló pún a fen kapasen ú ngeni telinimwach ei.’

Met Jeremaia epwele féri? Ese i niwokkus! A ereniir meinisin: ‘Jiowa a tiinieito pwe upwe erenikemi ekkeei mettóch. Ika ousap siwili napanapen manawemi mi ngaw, Jiowa epwe ataieló Jerusalem. Nge ámi oupwe silei pwe ika oupwe nieiló, oupwe fen nieló emén ese féri och mettóch mi mwáál.’

Ekkewe sou nemenem rese nieló Jeremaia. Nge ekkewe chón Israel rese siwili napanaper kewe mi ngaw. Mwirin, Nepukatnesar ewe kingen Papilon, a feito me maun ngeni Jerusalem. Lesópwólóón, Nepukatnesar a néúni chón angang ekkewe chón Israel. A uwei fite ngeréú ngeni Papilon. Ekieki mwo ika epwe ifa meefiom ika ekkóch aramas repwe uweiukoló seni wesetáán fénúom tori eú fénú kese kan eéreni!