Taniel Lón Leenien Ekkewe Laion

MWA met! Usun Taniel a fen nóm lón eú osukosuk watte. Nge ekkewe laion rese mwo nge efeiengawa! Ka silei pwata? Ién a anómu Taniel ikeei ie lein ekkeei laion? Sipwe ppii.

Tarius i ewe kingen Papilon lón ei atun. A fókkun sani Taniel pún a fókkun kirekiréch me tipachem. Tarius a filatá Taniel an epwe emén sou nemenem mi lap lón an we mwú. An ei féffér a efisi lólówó lón letipen ekkóch mwán lón ewe mwú, iwe iei ewe mettóch ra féri.

Ra chuuri Tarius me apasa: ‘Ám aua fen tipeeúfengen, O king, pwe kopwe féri eú allúk pwe esap wor emén epwe iótek ngeni emén kot are mwán lúkún en maing king, lón úkúkún 30 rán. Ika emén a álleasolap, iwe epwe kóturulong lein ekkewe laion.’ Tarius ese silei pwata ekkeei mwán ra mochen an epwe kapwúngúló ei allúk. Nge a ekieki pwe iei eú kkót múrinné, iwe a apwúngaló ewe allúk. Iwe iei, esap tongeni an epwe siwil ewe allúk.

Lupwen Taniel a rong usun ena allúk, a feiló lón imwan we me iótek, usun chék eérenian seni lóóm. Ekkewe mwán mi ngaw ra fen silei pwe Taniel esap úkútiw seni an iótek ngeni Jiowa. Ra pwapwa, pún epwele pwénútá ar kókkót le nieló Taniel.

Lupwen King Tarius a weweiti ika pwata ekkeei mwán ra mochen an epwe kapwúngúló ei allúk, a fókkun letipechou. Nge ese tongeni siwili ewe allúk, iwe a fangetá pwe Taniel epwe kóturulong lón leenien ekkewe laion. Nge ewe king a ereni Taniel: ‘Amwo óm we Kot, ewe ka angang ngeni, epwe selánuk.’

A kon watte an Tarius lólilen pwe iwe ese tongeni annut lón ena pwinin. Sorotáán ewe soran a ssáiti leenien ekkewe laion. En mi tongeni kúna an a nóm ikena ie. A kékké: ‘Taniel, chón angang ngeni ewe Kot mi manaw! Met, ewe Kot ka angang ngeni a tongeni selánuk seni ekkena laion?’

Taniel a pélúweni: ‘Kot a tiinaato néún we chónláng me a éppúngaaló awen ekkeei laion pwe iei rese efeiengawaei.’

Ewe king a fókkun pwapwa. A erá pwe Taniel epwe kekiitá me lón ewe pwang. Iwe ewe king a féri pwe ekkewe mwán mi ngaw, mi sótun nieló Taniel, ra kóturutiw lein ekkewe laion. Nge mwen ar repwe tori epin ewe pwang, ekkewe laion ra mweteriir me kupi meinisin chúúr kewe.

Iwe, King Tarius a mak ngeni meinisin ekkewe aramas lón an we mwú: ‘Ua allúkkaaló pwe meinisin repwe menniniiti án Taniel we Kot. A féri ekkewe manaman mi lapalap. A seláni Taniel seni an esap feiengaw ren ekkewe laion.’