Mortokai Me Ester

SIPWE liwiniti pwóróusen fitu ier mwen án Esra feiló Jerusalem. Ekkewe rúúemén chón Israel iter Mortokai me Ester, ra kon iteféúló mwen meinisin ekkewe chón Israel lón mwúún Persia. Ester, i ewe kiwin, nge tettelin mwongean we Mortokai, i ewe nampa ruu sou nemenem fán ewe king. Sipwe ppii ika ifa usun an a fis ei mettóch.

Semen me inen Ester kewe ra máló lupwen Ester a chúen fókkun kúkkún, iwe Mortokai a mwuuti. Ewe kingen Persia itan Asuworos a wor eú imwan lón ewe telinimw itan Susa. Iwe Mortokai i emén me lein néún kewe chón angang. Eú rán, pwúlúwen ewe king we itan Fasti a álleasolapa ewe king, iwe ewe king a filatá emén minefé pwúlúwan pwe epwe néún kiwin. En mi silei ika ié ewe fépwúl a fili? A fili ewe fépwúl mi liéch, Ester.

En mi kúna ei mwán mi lamalam tekia ekkeei aramas ra chapetiw ngeni? Iei i Haman. I emén mi wis tekia lón Persia. Haman a mochen pwe Mortokai epwe pwal chapetiw ngeni. Ina i Mortokai mi mómmót ikena ie. Nge Mortokai ese féri ena mettóch. A meefi pwe ese pwúng an epwe chapetiw ngeni ena sókkun mwán mi ngaw. Ei mettóch a wesewesen asonga Haman. Iwe iei met a féri.

Haman a ereni ewe king pwóróus mi chofona usun ekkewe chón Israel. A erá: ‘Iir aramasangaw, rese álleasochisi óm kewe allúk. Repwe fókkun ninniiló.’ Asuworos ese silei pwe pwúlúwan we Ester emén chón Israel. Ina popun a lúkú alón Haman. Iwe a féri eú allúk mi erá pwe lón eú rán, meinisin ekkewe chón Israel repwe ninniiló.

Lupwen Mortokai a rong usun ena allúk, a fókkun osukosuk. A tiinaaló och pwóróus ren Ester: ‘Kopwe ereni ewe king me pwal tingorei pwe epwe selánikich.’ Me ren ewe allúkún Persia, ese mumutá án aramas chuuri ewe king ika ewe king ese akkomw tiiti. Iwe nge, Ester a témwáálilóng. Ewe king a eitieló ngeni wokun we mi ffér seni kolt, weween pwe Ester esap ninniiló. Ester a etiwa ewe king me Haman pwe repwe mwéngéfengen. Me ikena ie ewe king a eisini Ester ika met a mochen seni. Ester a apasa pwe epwe ereni an mochen atun iir me Haman repwe chuto ren me mwéngéfengen sorotáán ewe rán.

Atun ra mwéngéfengen, Ester a ereni ewe king: ‘Ám me aramasei kewe aupwe ninniiló.’ Ewe king a song. A eis: ‘Itá ién epwe sótun féri ena mettóch?’

Ester a apasa: ‘Ewe mwán mi oputakem, iei i, ei aramasangaw Haman!’

Iwe iei, ewe king a fókkun lingeringer. A erá pwe Haman epwe ninniiló. Mwirin, ewe king a seikaatá Mortokai pwe epwe sou nemenem nampa ruu fan. Iwe, Mortokai a wisen anúkúnúkú pwe epwe wor eú mineféén allúk mi mutatá ngeni ekkewe chón Israel ar repwe fiu fán iten pwisin manawer lón ewe ránin itá repwe ninniiló lón. Pokiten Mortokai a emén sou nemenem iei, chómmóng aramas ra álisi ekkewe chón Israel, iwe ra ngaseló seni lepéún iir kewe mi oput iir.