Ewe Ttitin Jerusalem

NENGENI úkúkún watteen ei angang ra kan féri ikkeei ie. Ekkeei chón Israel ra achocho le angang wóón ei ttitin Jerusalem. Lupwen King Nepukatnesar a ataieló Jerusalem 152 ier lóóm, a ataietiw ewe ttit me pwal keni asamen ewe telinimw. Ekkewe chón Israel rese fférsefáli ewe ttit lupwen ar we ra kerán liwin seni Papilon.

Met óm ekiek usun meefien ekkeei aramas ar ra nónnóm ikkeei ie lón ekkeei ier nge esor ttitin telinimwer ei? Rese meefi núkúnúkéch. Mi mecheres ngeni chón oputer ar repwe tolong me maun ngeniir. Nge iei, ei mwán itan Nehemia a álisi ekkewe aramas le fférsefáli ewe ttit. En mi silei ika ié na Nehemia?

Nehemia, i emén chón Israel mi feito seni ewe telinimw itan Susa, ikewe Mortokai me Ester ra nónnóm ie. Nehemia a fen piin angang lón imwen ewe king me eli i emén mi chiechiéch ngeni Mortokai me Kiwin Ester. Nge ewe Paipel ese apasa pwe Nehemia a angang ngeni King Asuworos, pwúlúwen Ester we. Nge a angang ngeni King Artaksasta ewe mi king mwirin Asuworos.

Chechchemeni pwe Artaksasta, i ewe king mi múrinné, ewe a ngeni Esra watteen moni pwe epwe uwei ngeni Jerusalem le fférsefáli án Jiowa we imwenfel. Nge Esra ese fférsefáli ttitin ewe telinimw mi taló. Sipwe ppii ika ifa usun a fis pwe Nehemia a wisen féri ei angang.

A fen 13 ier mwirin án Artaksasta ngeni Esra ewe moni pwe epwe fférsefáli ewe imwenfel. Iei Nehemia a wisen túmúnú án King Artaksasta we kap. Weween, a kan wisen alélééú únúmen ewe king wain me wisen ppii pwe esap wor ién epwe aúnú ngeni ewe king och poison. Ina eú wis mi wesewesen aúchea.

Iwe lón eú rán, pwiin Nehemia we itan Hanani me pwal ekkóch mwán seni ewe fénú Israel ra etto chuuri Nehemia. Ra apwóróusa usun án ekkewe chón Israel osukosuk, iwe ra pwal ereni pwe mi chúen chék tatakkis ewe ttitin Jerusalem. Ei pwóróus a eletipechowu Nehemia, iwe a iótek ngeni Jiowa usun.

Eú rán, ewe king a kúna pwe Nehemia a letipechou, iwe a eisini: ‘Pwata ka meselólilen?’ Nehemia a ereni pwe a ina usun pún Jerusalem a fókkun torotorongaw me a tatakkis ttitin we. Ewe king a eis: ‘Met ka mochen?’

Nehemia a apasa: ‘Kopwe mut ngeniei ai upwe feiló Jerusalem pwe upwe tongeni fférsefáli ewe ttit.’ King Artaksasta a mmen kirekiréch. A apasa pwe Nehemia epwe tongeni feiló me i epwe álisi le kút irá fán iten angangen kaútáán ewe ttit. Ekiseló mwirin án Nehemia wareiti Jerusalem, a ereni ekkewe aramas usun an we kkót. Ra sani ewe kkót me ra apasa: ‘Sia poputá le kaú.’

Lupwen chón oputa ekkewe chón Israel ra kúna ewe ttit an a kaútá, ra apasa: ‘Sipwe ettá me nireló me pwal aúkatiw ewe angangen kaú.’ Nge Nehemia a rong usun ei mettóch me a ngeni ekkewe chón angang néúr ketilas me wokur wokun maun. Iwe a apasa: ‘Ousap niwokkus ren ekkewe chón oputakich. Oupwe fiu fán iten pwiimi kewe, fán iten néúmi kewe, fán iten pwúlúwemi kewe me pwal fán iten imwemi kewe.’

Ekkewe aramas ra fókkun pwora. Ra chék mmólnetá fán ar kewe pisekin maun lerán me lepwin me sópwósópwóló lón ar angangen kaú. Iwe lón chék 52 rán ewe ttit a wes. Iwe iei, ekkewe aramas ra tongeni meefi núkúnúkéch le nónnóm lón ewe telinimw. Nehemia me Esra ra áiti ngeni ekkewe aramas usun án Kot kewe allúk, iwe ekkewe aramas ra pwapwa.

Iwe nge nónnómur ese usun nónnómur mwen ar we fétek Papilon. Ekkewe aramas ra nónnóm fán nemenien ewe kingen Persia me a lamot ar repwe angang ngeni. Nge Jiowa a fen pwon pwe epwe tiinaato emén mineféén king, iwe ena king epwe atoto kinamwe ngeni aramas. Ié ena king? Epwe ifa usun an epwe atoto kinamwe ngeni fénúfan? Mwirin órun 450 ier, epwap wor pwóróusen ena king. Nge lón ena fansoun a fis eú mettóch mi kon aúchea, emén ménúkol a uputiw. Nge ina pwal eú pwóróus sipwap káé usun.