Emén Chónláng A Chuuri Maria

EI FEFIN mi liéch itan Maria. I emén fin Israel, a nónnóm lón ewe telinimw Nasaret. Kot a silei pwe i emén mi fókkun múrinné. Ina popun a tiinaato néún we chónláng Kapriel pwe epwe fós ngeni. En mi silei ika met Kapriel epwe ereni Maria? Sipwe ppii.

Kapriel a ereni: ‘Rán allim, en mi fókkun áchengicheng. Jiowa a nónnóm reom.’ Esaamwo fán eú án Maria kúna ena emén. A lólilen pún ese silei met weween alón na. Nge Kapriel a mwittir ekinamwei letipan.

A apasa: ‘Maria, kosap niwokkus. Jiowa a fókkun pwapwa reom. Ina popun epwe féri eú mettóch mi amwarar fán itom. Ekiseló chék kopwele néúnéú. Iwe kopwe eita ngeni Jesus.’

Kapriel a pwal áweweei: ‘Ei nau epwe lapalap, epwe iteni Néún ewe Kot mi Unusen Tekia. Jiowa epwe seikaatá pwe epwe king, usun Tafit. Nge Jesus epwe emén king tori feilfeiló me mwúún esap muchúló!’

Maria a eis: ‘Epwe ifa usun an epwe tongeni fis ekkeei mettóch meinisin? Usaamwo pwúpwúlú. Usaamwo nónnóm ren emén mwán, iwe epwe ifa usun ai upwe tongeni néúnéú?’

Kapriel a pélúweni: ‘Án Kot manaman epwe feitiw wóóm. Ina minne, ewe nau epwe iteni Néún Kot.’ Mwirin a ereni Maria: ‘Chechchemeni márárum we Elisapet. Aramas ra kan erá pwe i a kon chinnap me esap chúen tongeni néúnéú. Nge ekiseló chék epwe néúnatiw emén át. Iwe kopwe kúna pwe ese wor och mettóch Kot esap tongeni féri.’

Maria a mwittir apasa: ‘Ngang néún Jiowa chón angang fépwúl! Amwo epwe fis ngeniei usun minne ka fen apasa.’ Iwe mwirin, ewe chónláng a ló.

Maria a mwittir feiló chuuri Elisapet. Lupwen Elisapet a rong leúwen Maria, ewe ménúkol lón luken Elisapet a mwékútúkút ren pwapwa. Elisapet a uren án Kot we manaman mi fel, iwe a ereni Maria: ‘En mi fókkun feiéch me lein fefin.’ Iwe, Maria a nónnóm ren Elisapet órun úlúngát maram, nge mwirin a liwiniti imwan we lón Nasaret.

Ekiseló chék, Maria epwele pwúlúweni emén mwán itan Josef. Nge lupwen Josef a silei pwe Maria a pwopwo, ese chúen ekiekin pwúlúweni. Iwe néún Kot we chónláng a ereni Josef: ‘Kosap niwokkus le pwúlúweni Maria. Pún Kot ewe a fen liffang ngeni emén át.’ Iwe Maria me Josef ra pwúpwúlú me ra witi ewe fansoun Jesus epwe uputiw.