Ewe Át Jesus Lón Ewe Imwenfel

NENGENI ei kúkkún át mi kakkapas ngeni ekkeei mwán mi mwukóló. Iir sense lón án Kot we imwenfel lón Jerusalem. Ina i ewe át Jesus. A fen wattetá. Iei a 12 ierin.

Ekkewe sense ra fókkun máirú pún Jesus a fókkun silei chómmóng mettóch usun Kot me ekkewe mettóch mi mak lón ewe Paipel. Nge pwata Josef me Maria rese pwal nóm ikeei ie? Ikkefa iir? Sipwe ppii.

Iteiten ier Josef a kan uwei an we famili ngeni Jerusalem fán iten ewe Pasofer, eú apwapwa mi aúchea. A eú sái mi ttam pún seni Nasaret tori Jerusalem. Ese wor emén a wor waan tarakú me ese pwal wor trein. Ese kan wor ekkena mettóch lón ena fansoun. Lape ngeni aramas ra kan fetál me arapakkan úlúngát rán ar repwe fetál tori Jerusalem.

Nge iei, a fen watteeló án Josef famili. Iwe, mei wor ekkóch pwiin me fefinen Jesus kúkkún mi pwal lamot emén epwe túmúnúúr. Lón ena ier Josef me Maria pwal néúr kewe ra fen poputá ar sáittam le liwinló ngeni imwer we lón Nasaret. Tittiper pwe Jesus mi fiti chiener kewe ekkóch lón ar fetál. Nge lupwen ra kaúló lemuchulóón ewe rán, rese tongeni kúna Jesus. Ra kútta lein máráriir kewe me chiener kewe nge ese nóm rer! Iwe, ra liwiniti Jerusalem pwe repwe kútta me ie.

Iwe, ra kúna Jesus ikeei ie ren ekkeei sense. A akkaúseling ngeniir me pwal ekkeisiniir kapas eis. Meinisin ekkewe aramas ra máirú ren watteen tipachemen Jesus. Nge Maria a apasa: ‘Nei, pwata ka iei usun ngenikem? Ám me semom we aua fókkun lólilen pokiten ám resin kuttok.’

Jesus a pélúweni: ‘Pwata oua kuttáei? Ouse silei pwe mi lamot ngeniei ai upwe nóm lón imwen Semei?’

Ewer, Jesus a sani an epwe nónnóm ikewe a tongeni káé usun Kot ie. Esap pwal itá ina usun ach memmeef? Jesus a kan fiti fel iteiten wiik atun an we nónnóm Nasaret. Pokiten an akkaúseling iteitan, a káé chómmóng mettóch seni ewe Paipel. Sipwe usun Jesus me áppirú i.