Ra Monei Stefanus

EI MWÁN mi fótopwúkútiw ikkeei ie, i Stefanus. I emén néún Jesus chón káé mi tuppwél. Nge nengeni met a fiffis ngeni iei! Ekkeei mwán ra monei ngeni féúmmongun faú. Pwata a kon watte ar oput Stefanus pwe ina ra tongeni féri ei mettóch mi fókkun ngaw? Sipwe ppii.

Kot a ákkálisi Stefanus pwe epwe tongeni féri ekkewe manaman mi amwarar. Ekkeei mwán rese sani ei mettóch, ina pwata ra ánini ngeni usun an áiti ngeni aramas ewe enlet. Nge Kot a ngeni Stefanus tipachem mi lap, iwe Stefanus a pwári pwe ekkeei mwán ra kan áiti ngeni aramas afalafal mi chofona. Ei mettóch a alapaaló ar song. Ina popun ra turufi me ra kéraalong aramas pwe repwe mwakenetá pwóróus usun.

Ewe souasor mi lap a eisini Stefanus: ‘Mi enlet ekkeei mettóch?’ Stefanus a pélúweni ren an eáni eú afalafal mi múrinné seni Paipel. Lemúchúlóón ewe afalafal, a apasa pwe ekkewe aramas mi ngaw ra oput néún Jiowa kewe soufós lóóm lóóm. Mwirin a apasa: ‘Ámi mi usun chék ekkewe mwán. Ámi oua nieló néún Kot we chón angang Jesus me ouse álleasochisi án Kot kewe allúk.’

Ei mettóch a wesewesen asonga ekkeei néúwisin lamalam! Ra asúngúrú ngiir kewe lón ar lingeringer. Nge mwirin, Stefanus a sachetá me apasa: ‘Nengeni! Ua kúna Jesus an a úkkúútá lepeliefichin Kot lón láng.’ Pokiten ei, ekkewe mwán ra pwélúoló selinger me mwittir ssáiti Stefanus. Ra turufi me ra átekinawu lúkún ewe telinimw.

Me ikkena ie ra pwiliti úfer kewe sekit me ra ngeni ewe alúwél itan Saul pwe epwe mammasa. En mi kúna Saul? Iwe ekkóch ekkewe mwán ra poputá le monei ngeni Stefanus faú. Stefanus a fótopwúkútiw usun ka kúna me a iótek ngeni Kot: ‘Jiowa, kosap apwúngúúr ren ei mettóch mi ngaw.’ A silei pwe ekkóch me leir ra fen tupuló pokiten ekkewe néúwisin lamalam. Iwe mwirin, Stefanus a máló.

Ika emén a féri och mettóch mi ngaw ngonuk, ka sótun liwini ngeni are tingorei Kot pwe epwe liwini? Esap ina usun féfférún Stefanus are Jesus. Ra pwal kirekiréch ngeni iir kewe mi kirikiringaw ngeniir. Sipwe achocho le áppirúúr.