Eú Paratis Mi Fé Wóón Fénúfan

NENGENI ekkena irá mi ttam, ekkena péén irá mi lingéch me ekkena chuuk mi tekia. Esap pwe a ling ikena ie? Nengeni án ena chia na mwéngé seni lepéún ena kúkkún át. Pwal nengeni ekkena laion me ekkena oris mi úkkúútá ikenan ie lón ena masies. Ka mochen óm kopwe nónnóm lón eú imw mi nóm lón eú leeni mi usun chék ei?

Kot a mochen óm kopwe manaw wóón fénúfan lón eú paratis feilfeiló chék. Pwal eú, i ese mochen an epwe toruk ekkewe sókkun metek aramas ra kan riáfféú ren ikenái. Iei án Paipel pwon ngeni iir kewe repwe manaw lón ewe paratis mi fé: ‘Kot epwe nónnóm rer. Esap chúen wor máló are kechiw are metek. Ekkewe mettóchun lóóm ra fen móróló.’

Jesus epwe wisen ppii pwe ei siwil mi amwarar epwe fis. En mi silei ika ineet atun? Ewer, mwirin an limeti ewe fénúfan seni meinisin ekkewe mettóch mi ngaw me aramas mi ngaw. Chechchemeni pwe lupwen Jesus a nóm wóón fénúfan, a apéchékkúla aramas seni sókkun samau meinisin me a pwal amanawatá aramas seni máló. Jesus a féri ekkeei mettóch pwe epwe pwáraatá pwe lupwen a fen wiliiti Kingen ewe mwúún Kot ikkena ekkewe mettóch epwe féri wóón unusen fénúfan.

Ekieki mwo amwararen ach sipwe nónnóm lón ei paratis mi fé wóón fénúfan! Jesus me ekkóch me lein filian kewe aramas, repwe nennemenem seni láng. Ekkeei sou nemenem repwe túmúnú meinisin mi nónnóm wóón fénúfan me repwe ppii pwe iir meinisin repwe pwapwa. Sipwe ppii met a lamot ach sipwe féri pwe sipwe lúkúlúk pwe Kot epwe ngenikich manaw esemuch lón an we paratis mi fé.