Lesen 9

A Lamot Pwe Noun Kot kewe Chon Angang Repwe Limelimoch

Pwata sipwe limelimoch lon mettoch meinisin? (1)

Met weween ach sipwe limelimoch lon pekin ngun? (2)

lon manauach? (3) lon pekin ekiek? (4) lon pekin inis? (5)

Met sokkun kapas mi ngau sipwe tumunukich seni? (6)

1. Jiowa Kot, I emon mi limelimoch me pin. A mochen pwe noun kewe chon fel ngeni repwe limelimoch​—lon pekin ngun, lon manauer, lon pekin ekiek, me lon pekin inis. (1 Piter 1:16) Epwe lamot ach sipwe fokkun achocho fan iten ach sipwe amwochu ach limelimoch mwen mesen Kot. Sia manau lon eu otot mi limengau. Iwe, mei pwal wor ach fiffiu ngeni pwisin ach mecheresin foffori minne ese pwung. Nge a lamot ach sisap fangeta.

2. Limoch lon Pekin Ngun: Ika sia mochen angang ngeni Jiowa, sisap tongeni akkamwochu ekkewe afalafal are eorenien lamalam mi chofona. A lamot ach sipwe towu seni lamalam chofona, sisap pwal apochokkulata are alisata. (2 Korint 6:14-18; Pwarata 18:4) Mwirin ach kaeo ewe enlet ussun Kot, epwe lamot ach sipwe tumunu pwe sisap tupulo ren aramas mi eani afalafal chofona.​—2 Jon 10, 11.

3. Manau mi Limelimoch: Jiowa a mochen noun kewe chon fel ar repwe lapalapeni lapalapen chon Kraist iteiten fansoun meinisin. (1 Piter 2:12) A kuna mettoch meinisin sipwe fori, pwal mwo nge ekkewe mettoch sipwe fori le monomon. (Ipru 4:13) Sipwe tumunukich seni ewe fofforun lisowu mwaal me ekkewe ekkoch fofforun fonufan mi limengau.​—1 Korint 6:9-11.

4. Limoch Lon Pekin Ekiek: Ika sipwe auralo tupuwach ren ekiek mi limelimoch, ach kewe foffor repwe pwal limoch. (Filipai 4:8) Nge ika sipwe ekkekieki minne mi limengau, epwe amwokutukich ach sipwe fofforingau. (Mattu 15:18-20) Sipwe mochen tumunukich seni ekkewe sokkun minen apwapwa mi tongeni aingaua ach ekiek. Sipwe tongeni auralo tupuwach ren ekkewe ekiek mi limoch ren ach sipwe kaeo an Kot we Kapas.

5. Limoch Lon Pekin Inis: Pokiten kich chon tupuni Kot, ekkewe chon Kraist repwe limelimoch lon pekin inis me ufer kewe. Sipwe mochen tolu pouch kewe mwirin ach feilo lon imwen ngaselo, me mwen ach sipwe mongo are attapa anach mongo. Ika ese wor ami imwen ngaselo mi och, oupwe ttu pwang me ireelo ami kiten mongo. (Tuteronomi 23:12, 13) Ach sipwe limelimoch lon pekin inis epwe alisikich ach sipwe akkamwochu pochokkulen inisich. Lon me lukun imwen emon chon Kraist epwe torotoroch me limoch. Epwe eu leenien appiru mi murinno lon sopwun we.

6. Fos mi Limoch: A lamot ngeni ekkewe chon Kraist ar repwe kapas enlet fansoun meinisin. Ekkewe chon kapas chofona resap tolong lon an Kot we Muu. (Efisus 4:25; Pwarata 21:8) Ekkewe chon Kraist rese eani kapas ingau. Resap auseling ngeni are eani kapasen urumot mi ngau are ekkewe tutulap mi ngau. Pokiten ar fos mi limoch, ra sokko seni ekkewe ekkoch lon ar kewe leenien angang, lon sukul me lon sopwur kewe.​—Efisus 4:29, 31; 5:3.

[Ekkewe sasing lón pekin taropwe 18, 19]

Noun Kot kewe aramas repwe limelimoch lon mettoch meinisin