Sokkun Riaffou Meinisin Repwele Muchulo!
Neman ka fen eis fan eu, ‘Pwata a kon watte riaffoun aramas?’ Ren fite ngerou ier, aramas ra kuna riaffou watte pokiten maun, feiengau mi lapalap, atai alluk, pwungungau, samau, me malo. Lon ekkewe ipuku ier ra lo, riaffoun aramas a kon watte seni meinisin ekkewe fansoun mwan. Epwe wor eu fansoun lupwen ekkeei sokkun riaffou meinisin repwe muchulo?
A eu minen auruuru letipach ach apasa ewer ren poluen ena kapas eis, iwe, epwe fis ekiselo chok! Iei alon an Kot we Kapas, ewe Paipel: “Ir ekkewe mi ingau resap chuen nom . . . Nge ir ekkewe mi mosonoson repwele fonueni ewe fonu, o repwe pwapwaesini chommongun ar pisek.” Tori ineet? “Ekkewe aramas mi pung repwe fonueni ewe fonu, o repwe nonnom lon, tori feilfeilo chok.”—Kol Fel 37:10, 11, 29.
Mwirin an Kot amoielo fofforingau me riaffou, fonufan epwe wiliiti eu paratis. Iwe, aramas repwe tufichin manau tori feilfeilo chok ren inisir mi unusoch me pwapwa. Iei eu oesini lon an Kot we Kapas: “[Kot] epwe tolu seni meser chonun meser meinisin, o esap chuen wor malo, esap pwal chuen wor kechiu, are akurang, are metek, pun ekkewe mettochun lom ra fen morelo.”—Pwarata 21:4.
Lon ena fonufan sefo, pwal mwo nge aramas mi malo repwe manausefal pwe repwe tufichin kuna ekkena feioch: “Epwe fis ewe manausefal ren ekkewe mi pung pwal ekkewe rese pung.” (Fofor 24:15) Ina popun Jises Kraist a tongeni ereni emon chon fofforingau mi luku i me aier: “Kopwe nonnom rei lon Paratais.”—Luk 23:43.
Pwata Riaffou A Poputa?
Pokiten a iei letipen Kot, pwe aramas repwe eani ena sokkun apilukuluk mi fokkun amwarar, pwata a mut ngeni riaffou an epwe poputa? Pwata a mut ngeni riaffou an epwe nomottam?
Lupwen Kot a forata Atam me If, A foriir pwe inisir me ekiekir repwe unusoch. A anomuur lon eu paratis me a awiisa ngeniir angang mi apwapwa. Iei alon ewe Paipel: “Kot a nengeni meinisin mine a fori o kuna pwe a fokun och.” (Keneses 1:31) Ika repwe fen alleasochisi Kot, iwe, epwe unusoch nour kewe repwe nouniiretiu, me unusen fonufan epwe wiliiti eu paratis, ikewe aramas repwe manau tori feilfeilo chok lon kinamwe me pwapwa ie.
Kot a ffotukalong lon Atam me If ewe liffang mi auchea, liffangen ar repwe tufichin pwisin fili fofforur pwe epwe ina ussun pukun nikinikin aramas. Resap ussun chok ekkan mwesin esor ekiekir. Iwe nge, sopwosopwoloon ar pwapwa a longolong won ar aea ar tufichin fili fofforur lon eu lapalap mi pwung—weween, repwe alleasochisi an Kot kewe alluk. Iei alon Kot: “Ngang ewe Samol mi Lapalap om we Kot. Ua aiti ngonuk mine kopwe feioch ren, ua pwal emweni ngonuk ewe al kopwe fetal won.” (Aisea 48:17) Ar aeamwaalli ena tufichin pwisin fili fofforur epwe atoto sopwongau, pun sap minne aramas ra foruta pwe repwe sopwoch ika repwe imulo me fan nemenien Kot. Iei alon Paipel: “Aramas resap pusin nemeni manauer, resap pwal tongeni akota mine repwe fori.”—Jeremaia 10:23.
A solap pwe popuch kewe ra meefi pwe repwe tongeni imulo me fan nemenien Kot nge repwe chuen chok sopwoch. Nge lupwen ra imulo seni an Kot nemenem, a ina ukutiuen an tumun ngeniir, iwe, rese chuen unusoch. Iwe, a poputa ar apwangapwangelo, iwe, lo, lo, lo, ra chinnapelo me malo. Pokiten kich mwirimwirir, sia fen mwiri seniir ewe sokkun inis ese unusoch me malo.—Rom 5:12.
Ewe Popunlapen Minen Apwung—Io A Wor An Pwuung Le Nemeni Mettoch Meinisin
Pwata Kot ese nnielo Atam me If, me mwirin, forata pwal eu minefoon pean aramas? Popun, pun emon a u ngeni an Kot pwuung le nemeni mettoch meinisin. Iei ewe kapas eis a ppiita: Io a wor an pwuung le nemeni mettoch meinisin, me an io nemenem a pwung? Pokiten a wor ekkena kapas eis, pwal iei eu kapas eis a ppiita: Aramas repwe sopwoch ika rese nom fan nemenien Kot? Ika Kot epwe mut ngeni aramas och fansoun fan iten ar repwe unusen pwisin nemenemeniir, iwe, epwe wenewenen ffatolo ika aramas repwe sopwoch fan an nemenem are fan pwisin ar nemenem. Ena fansoun mi mumuta ngeni aramas epwe nafoch fan iten ar repwe sotuni sokkun kokkot meinisin lon pekin muu, pekin tettenin aramas, pekin sopai, me pekin lamalam lukun an Kot emmwen.
Iwe, met mwiriloon? Fite ngerou ierin uruwoon aramas ra affata pwe a kan lapalapelo riaffoun aramas. Lon ekkewe ipuku ier ra lo, a mmen watte riaffoun chon fonufan lap seni ekkewe fansoun mwan meinisin. Fite milion chon Jus me ekkewe ekkoch ra nninniilo ren Muun Tois lon ewe Oruuen Maunen Fonufan. Lap seni 100 milion ra nninniilo lon maun. Atai alluk me foffor mi mwanesol ra choufetal. Chommong, chommong ra ukkun safeien opuchopuch. Semmwennin sikepwach mi chuen ukkuri chommong. Fite, fite milion aramas ra malo iteiten ier pokiten lengita me samau. Ekis meinisin a fen ngauolo ririin lon famili me ese chuen auchea foffor mi limoch. Esor eu nemenem won fonufan mi tufichin pwakini ekkena osukosuk. Esor eu leir mi fen amoielo an aramas chinnapelo, semmwenilo, me malo.
Lapalapen nonnomun aramas a ussun chok minne ewe Paipel a oesini fan iten ach ei fansoun. An Kot Kapas a pwarata pwe ach ei fansoun, ikkeei “ekkewe ran le sopolon” ei otot lupwen epwe wor “fansoun weires.” Iwe, ussun chok an Paipel apasa, ‘aramas ingau, pwal ekkewe chon likotuputup ra chok alapalo ar fofor-ingau.’—2 Timoti 3:1-5, 13.
Riaffou Epwele Muchulo
Meinisin ekkewe pisekin annet ra pwarata pwe sia akkarap ngeni sopwoloon ewe fansoun mi ngau, fansoun an aramas sotuni le pwisin uta me fan nemenien Kot. A fen wesewesen ffatolo pwe esap tongeni an epwe sopwoch an aramas nemenem ika mi imulo seni Kot. An Kot nemenem chok epwe tongeni atoto kinamwe, pwapwa, inis mi unusen pochokkul, me manau esemuch. Ina minne, epwele much an Jiowa mutata fofforingau me riaffou. Ekiselo chok nge Kot epwele angolong lon an aramas kewe kokkot ren an ataielo unusen ei otot mi ngau.
Iei alon eu oesini lon Paipel: ‘Lon fansoun mwun ekewe king [ekkan muun aramas iei], ewe Koten lang epwe aueta eu mwu [lon lang] esap tongeni tala. . . . Epwe ataela o arosala ekewe lusun mwu [ekkan muu mi nemenem iei], nge epwe pusin nom tori feilfeilachok.’ (Taniel 2:44) Leteloon an Jiowa pwuung le nemeni mettoch meinisin ren an we Muu lon lang, iei ewe chuulapen afalafal lon Paipel. Lupwen a oesini ussun eu kinikin mi fokkun lamot lon ewe esissinnen “ekkewe ran le sopolon”, Jises a apasa: “Ei kapas allim usun ewe mu epwe esineifeili won unusen fonufan, pwe epwe pwar ngeni einang meinisin. Iwe, a ina sopolon.”—Mattu 24:14.
Lupwen ewe sopwoloon epwe war, io epwe kuna manau? Iei poluan lon Paipel: “Pun ekkewe chon pwung repwe fonueni ewe fonufan, pwal ekkewe aramas mi wenechar repwe nonnom lon. Nge ekkewe aramas mi ngau repwe pokupokulo seni ewe fonufan.” (An Salomon Fos 2:21, 22, New World Translation) Chokkana mi wenechar ra wewe ngeni ir kewe mi kakkaeo letipen Jiowa, iwe mwirin, ra foffori letipan. Iei alon Jises Kraist: “Iei ewe manau esemuch, pwe repwe sinei en, ewe emon chok Kot mi enlet, pwal Jises Kraist ewe ka akunooto.” (Jon 17:3) Ewer, “fonufan epwe morelo, . . . nge i mi fori letipen Kot epwe nonnom feilfeilo chok.”—1 Jon 2:17.