Kingdom News No. 37

Esilesil Ngeni Unusen Fönüfan

Sopwoloon Lamalam Chofona A Arapoto!

▪ Met weween lamalam chofona?

▪ Ifa ussun an epwe sopwolo?

▪ Ifa ussun sopwoloon lamalam chofona epwe kkü manauom?

Met weween lamalam chofona?

En mi meefi riäfföü pokiten ekkewe mettoch mi ngaü aramas ra föfföri fän iten ar kewe lamalam? Ka osukosuk pokiten ekkewe maun, nni manau, me atai allük mi fisitä ren aramas mi apasa pwe ir mi angang ngeni Kot? Met popun a ussun itä pwe lamalam ewe popun chommong, chommong osukosuk?

Saminne lamalam meinisin ra föfföri ekkeei mettoch mi ngaü. Lamalam chofona a efisiiretä. Jises Kraist a apasa pwe lamalam chofona a uwani föfför ingaü, ussun chök “ekkewe ira ingau repwe uwani uwa ingau.” (Mattu 7:15-17) Iwe, ifa uwan lamalam chofona?

Lamalam Chofona . . .

◼ LAMALAM CHOFONA A ANGOLONG LON MAUN ME POLITICS: Alon eü poraus lon echö chassi (Asiaweek): “Nöüwis mi ngaü lon Esia me unusen fönüfan ra etipetipa letipen me ekiekin aramas ussun lamalam, pwe epwe fisitä pwisin ar mochen.” Iei ewe kapasen öüröür lon ena chassi: “Ina ewe popun ei fönüfan a tongeni unusen umwesilo.” Emön nöüwisin lamalam mi iteföülo lon Merika a apasa: “Sipwe nnielo ekkewe terrorist ren ach sipwe awesalo ewe nni manau.” Ifa ussun? “Sipwe pakütangei ir meinisin fän iten ewe Samol.” Iwe, ena poraus a sokko seni ewe poraus lon Paipel: “Are emon epwe apasata, ‘Ua tongei Kot,’ nge a oput pwin Soulang, iwe, i emon mi chofona.” (1 Jon 4:20) Jises a apasa: “Oupwe tongei chon oput ami.” (Mattu 5:44) Iwe, en mi silei menni ekkewe lamalam ra pesei ekkewe souläng ar repwe feilo fiti maun?

◼ LAMALAM CHOFONA A ACHOUFETÄLEI AFALAFAL CHOFONA: Chommong lamalam ra afalafal pwe ngünüch rese tongeni mälo, nge repwe chüen manau mwirin mäloon inisich. Pokiten ei afalafal, ekkoch nöüwisin lamalam ra angei moni watte seni ekkewe souläng lupwen ra iotek fän iten ngünün ekkewe mi mälo. Iwe nge, ei poraus a sokko seni ewe afalafal lon Paipel. “Pun ekewe chon manau ra silei pwe repwe mälä. Nge ekewe sotup resap silei och mettoch.” (An Salomon Afalafal 9:5) Alon än Jises afalafal, ekkewe mi mälo repwe manausefäl. Iwe, esap wor lamoten manausefäl ika ngünün ekkewe mi mälo ra chüen manau. (Jon 11:11-25) Om lamalam a eäni ewe afalafal pwe ngünüch rese tongeni mälo?

◼ LAMALAM CHOFONA A MUTATÄ LISOWU MWÄÄL: Lon ekkoch fönü, mwän mi pülüweni mwän me fefin mi pülüweni fefin ra seikiiretä pwe nöüwis lon ar kewe lamalam. Ekkoch nöüwisin lamalam ra pesei ekkewe muu ar repwe mutatä püpülü me ren allük lefilen mwän me mwän me fefin me fefin. Ekkoch lamalam ra afalafal pwe lisowu mwääl mi ngaü, nge rese atowu ekkewe nöüwis seni wiiser, ir kewe mi kirikiringaü ngeni semirit. Iwe, ifa ewe afalafal lon Paipel? “Oute tupulo. Aramas mi föri lisowu mwääl, are fel ngeni lios, are mocheisou, are mwän mi onnut fengen me mwän, . . . resap alemwiri muun Kot.” (1 Korint 6:9, 10, NW) En mi silei ussun ekkoch lamalam mi mutatä ekkeei sokkun föfför mi ngaü?

Met epwe fis ngeni ekkewe lamalam mi uwani uwa mi ngaü? Jises a öüröüreer: “Iwe, repwe ukufatiu iteiten ira meinisin mi sap uwa och, o otururelong lon ekkei.” (Mattu 7:19) Ewer, ussun chök ekkewe irä mi ngaü, lamalam chofona epwe pöküpökütiu me katalo. Ifa ussun me ineet epwe fisitä? Eü oesini lon ewe puken Pwarata, sopwun 17, me 18 a pölüeni ena kapas eis.

Ifa ussun lamalam chofona epwe wesilo?

Anchangei mwo liosun emön fin lisowu mi mommot won emön manmwocho mi fokkun äniuäniu. Ei manmwocho a wor fisu möküran me engol mechan. (Pwarata 17:1-4) Ewe fin lisowu a liosuetä iö? Iwe, a etipetipa “ekkewe samolun fonufan.” Üfan mi forket, a saani minen kek mi pwokus, me a fokkun wöüöch. Pwal och, ren an angangen roong, neminna a “otupu ekkewe muu meinisin.” (Pwarata 17:18; 18:12, 13, 23) Ren älillis seni Paipel, sia weweiti pwe ei fin lisowu a wewe ngeni eü mwicheichen lamalam won unusen fönüfan. Ese liosuetä eü chök lamalam mi chofona nge ekkewe lamalam meinisin mi uwani uwa mi ngaü.

Ewe fin lisowu a mommot won emön manmwocho a liosuetä ekkewe muun fönüfan. (Pwarata 17:10-13) Weween an itä mommot won ekkewe muun fönüfan pwe a sotun le etipetipa filien ekkewe muu me nemeni met ekkewe muu ra föri.

Iwe, muttir chök, epwele fisitä och mettoch mi fokkun ämäirü. “O ekkewe engol mechan ka kuna, pwal ewe manmocho, repwe oput ewe fin-lisou; repwe awoungaualo o aselelo i; repwe ochei fitukan; o repwe kenalo ren ekkei.” (Pwarata 17:16) Muttir chök, ekkewe muun fönüfan repwe maunei me ataielo lamalam chofona! Met popun? Ewe puken Pwarata a pölüeni: “Pun Kot a fen isenalong och ekiek lon letiper pwe repwe apwonueta letipan.” (Pwarata 17:17) Ewer, Kot epwe apwüngü lamalam chofona pokiten ekkewe föfför ingaü a föri lon itan. Epwe fokkun pwüng pwe Kot epwe nöünöü chiechien ewe fin lisowu ren an epwe apwüngü i.

Met kopwe föri pwe kesap feiengaü lupwen lamalam chofona epwe talo? “Ami nei aramas, oupwe tou seni neminewe.” (Pwarata 18:4) Pwüngün pwe iei ewe fansoun kopwe su seni lamalam chofona! Nge kopwe sulo ia? Esor lamoten om fiti ekkewe aramas rese lükü Kot pokiten esor ar äpilükülüköch. (2 Tesalonika 1:6-9) Kopwe küna manau lon chök ewe lamalam mi enlet. Nge, ifa ussun kopwe esinna ewe lamalam mi enlet?

Ifa ussun kopwe esinna ewe lamalam mi enlet

Ifa ewe uwa mi mürinnö lamalam mi enlet epwe uwani?—Mattu 7:17.

Lamalam Mi Enlet . . .

◼ LAMALAM MI ENLET A SILELO REN TONG: Chon fel mi enlet “esap ir seni fonufan,” iwe, rese käimufesen pokiten einang are eöreni, iwe, ra silelo ren ‘ewe tong lefiler.’ (Jon 13:35; 17:16; Fofor 10:34, 35) Rese nniifengennir, nge repwe fen mwo fangolo manauer ren ar repwe tümünü pwiir kewe.—1 Jon 3:16.

◼ LAMALAM MI ENLET A ALONGOLONG WON ÄN KOT WE KAPAS: “Kapasen ar afalafal” ese alongolong won eörenien me allükün aramas nge won ewe Paipel. (Mattu 15:6-9) Met popun? Pokiten “ekkewe puk meinisin ra pop seni Ngunun Kot, ra pwal lamot ngeni afalafal, ngeni fonou, ngeni amurinnoolo, o pwal ngeni angangochun ewe manau mi pung.”—2 Timoti 3:16.

◼ LAMALAM MI ENLET A APÖCHÖKKÜLA FAMILI ME A ÄMWÖCHÜ ALLÜK MI LIMELIMÖCH: Ewe lamalam mi enlet a älisatä mwän püpülü ar repwe ‘tongei puluer ussun chok pwisin inisir,’ a älisi ekkewe fefin ar repwe ‘menniniti puluwer,’ me a äiti ngeni semirit pwe repwe ‘alleasochisi semer kewe me iner.’ (Efisus 5:28, 33; 6:1) Pwal och, ir kewe mi eäni wiiser lon ewe lamalam repwe fokkun limelimöch.—1 Timoti 3:1-10.

Mei wor eü lamalam a wor ren ekkena lapalap? Iwe, iei met a mak lon eü puk Holocaust Politics a fför lon 2001: “Ika chommong aramas repwe föri met ekkewe Chon Pwäratä Jiowa ra afalafala me föri, iwe, esap fen nninniilo fite milion chon Jus me ekkewe ekkoch lon Tois mwen me atun ewe Oruuen Maunen Fönüfan, me nninniiloon chommong mwichen aramas esap chüen fisitä won fönüfan iei.”

Iwe, lon 235 fönü, Chon Pwäratä Jiowa rese chök afalafala aramas ussun minne mi pwüng me mwääl me ren ewe Paipel, nge ina met ra achocho le apwönüetä lon manauer. Sia peseok le tingor älillis seni Chon Pwäratä Jiowa ika en mi mochen käeö met Kot a kütta sonuk, pwe Kot epwe etiwa om fel. Iei ewe fansoun kopwe mwökütüküt. Kosap mmangoto. Sopwoloon lamalam chofona a arapoto!—Sefanaia 2:2, 3.

Ika en mi mochen silei pwal och poraus seni Paipel Chon Pwäratä Jiowa ra afalafala, kopwe mak ngeni eü me lein ekkewe address mi mak fän.

□ Üse mochen emön epwe chuuriei, nge üa mochen nöüni ewe brochure Met Kot A Kutta Senikich?

□ Kopwe chuuriei pün üa mochen käeö ewe Paipel.

[Lios lon pekin taropwe 3]

Lamalam chofona a etipetipa “ekkewe samolun fonufan”

[Lios lon pekin taropwe 3]

“Ami nei aramas, oupwe tou seni neminewe”