Féfférúch Ngeni Emén mi Katowu

Atun emén chón ach we famili are aramasach are chiechiach ese aier a katowu seni ewe mwichefel, a fókkun ámeteki letipach. Úkúkún ach apwénúetá án Paipel emmwen usun ei mettóch, pwal ina úkúkún ach pwáraatá ach tongei Kot me tuppwél ngeni an kókkót.a Ekieki ekkeei ekkóch kapas eis mi ppiitá usun ei pwóróus.

Epwe ifa féfférúch ngeni emén mi katowu? Ewe Paipel a apasa: “Oute chiechi ngeni emon mi iteni pwich, are a fori lisou, are mochenia, are fel ngeni anumwal, are lalingau, are unupuch, are mocho; ousap eti ekkeei sokkun aramas le mongo.” (1 Korint 5:11, TF) Emén ese “kamwöchünük won än Kraist afalafal,” Paipel a erá pwe “ousap etiwa i lon imwemi,” ousap mwo nge kapong ngeni. “Pun eman mi eäni kapongen kinamwe ngeni, a wiliti eman chiechian lon ekewe sokun föföringau a föriir.” (2 Johannes 9-11) Sisap fós ngeni ekkewe mi katowu usun ekkewe mettóchun lúkú me chiechi ngeniir. The Watchtower minen September 15, 1981, pekin taropwe 25, a apasa: “Ach chék apasa ‘Rán allim’ ngeni emén epwe tongeni emmwen ngeni ach pwóppwóróusfengen me neman pwal mwo nge chiechifengen. Kich mi mochen poputá le féri ena mettóch ngeni emén mi katowu?”

Itá mi lamot ach sisap fókkun mwo nge ekis chiechi ngeni emén mi katowu? Ewer, pokiten a wor chómmóng popun. Áeúin, a pwáraatá ach tuppwél ngeni Kot me an we Kapas. Ach álleasochisi Jiowa esap chék atun a mecheres ngenikich nge pwal atun a weires ngenikich. Ach tongei Kot a amwékútúkich le álleasochisi meinisin an kewe allúk me sia mirititi pwe i emén mi pwúng me tong iwe, an kewe allúk ra fókkun échitikich. (Aisea 48:17; 1 Johannes 5:3) Oruuan, ach sisap chiechi ngeni emén ese aier, a túmúnúkich me ewe mwichefel seni limengaw lón pekin lúkú me manaw, me a álisatá itéchún ewe mwichefel. (1 Korint 5:6, 7) Aúlúngátin, ach úppós fán iten án Paipel kewe kapasen emmwen a tongeni álisi ewe mi katowu. Ren ach álisatá met ewe mwichen mwán mi ásimaw a apwúngaló, sia tongeni achchúngú letipen ewe mi chúen féfféringaw, ewe mi pépééni án ekkewe mwán mi ásimaw achocho le álisi. Pokiten ese chúen chiechi ngeni chókkewe mi tonger, neman ina met epwe álisi le “tipatchemelo” le mirititi choun ewe tipis me poputá le liwiniti Jiowa.​—Lukas 15:17, TF.

Ifa usun ika emén chón ach famili are aramasach a katowu? Iwe lón ena atun, pokiten ewe riri lefilen ewe famili, án emén tuppwél ngeni án Jiowa kewe allúk epwele wor sóssótun. Epwe ifa féfférúch ngeni emén chón ach we famili are aramasach mi katowu? Sise tongeni eiteita meinisin nge sipwe chék menlapei ruu mi lamot.

Fán ekkóch emén chón lón ewe famili a katowu, áwewe chék, emén me lein ewe sam, ewe in are emén nau mi kúkkún mi chúen nónnóm lón imwer. Án emén katowu ese muti ewe ririin famili nge a tongeni sópwósópwóló ar angangen famili me kókkót iteiten rán. Iwe nge pokiten met ewe mi katowu a féri, a filatá an epwe atai ewe riri lón pekin lúkú lefilan me chón an we famili mi angang ngeni Jiowa. Ina popun, chón an we famili mi tuppwél resap chúen chiechi ngeni lón pekin lúkú. Áwewe chék, ika ewe mi katowu a nónnóm atun án ewe famili káéfengen ewe Paipel, iwe epwe chék fanafaneló. Iwe nge, ika emén nau mi kúkkún mi chúen nóm fán túmúnúen ekkewe sam me in nge a katowu, iwe wiser ar repwe asukula me emiriti. Ina popun, ekkewe sam me in mi tong ra tongeni káé ngeni néúr na.b​—Än Salomon Fos 6:20-22; 29:17.

Fán ekkóch, ewe mi katowu i aramasach nge ese nónnóm rech. Inaamwo ika fán ákkáeú epwe wor fansoun sipwe fós ngeni ewe mi katowu wóón met mi fókkun lamot mi weneiti ewe famili, nge epwe chék fókkun aúkúk. Chón lón ewe famili iir chón Kraist mi tuppwél rese kútta popun ar repwe tongeni fósfengen me aramaser we mi katowu ese nónnóm rer. Ar tuppwél ngeni Jiowa me an we mwicheich a amwékútúúr le álisatá án ewe Paipel kókkót usun katowu. Ar tuppwél a pwáraatá pwe ra ekieki lón letiper met epwe échiti ewe mi katowu me a tongeni álisi le angei álillis seni ewe angangen kapwúng a kúna.c​—Ipru 12:11.