Met án Ekkewe Chónálillisin Mwichefel Angang?

Ewe Paipel a áweweei ruu mwichen Chón Kraist mwán mi túmúnú angangen mwichefel. Chón Pwáraatá Jiowa ra kér ngeniir “chón túmún me chón álillis.” (Filipi 1:1, NW) Fán chómmóng, mi wor fitemén pwiim keei ra angang lón eú me eú mwichefel. Ikkefa án ekkewe chónálillisin mwichefel angang mi álisikem?

Ra álisi ewe mwichen mwán mi ásimaw. Ekkewe chónálillisin mwichefel ra ririéch ngeni Kot, aua lúkúlúk woor, me ra túmúnúéchú ar angang. Ekkóch leir alúwél nge ekkóch ra mwukoló. Ra féri ekkewe ákkáekisin angang mi lamot epwe ffér iteitan fán iten kókkótéchún ewe mwichefel. Ar féri ekkena angang a álisi ekkewe mwán mi ásimaw ar repwe afota ekiekiir lón ar angangen asukula, apéchékkúla me túmúnú chón mwichefel.

Ra féri angang mi álilliséch. Ekkóch ekkewe chónálillisin mwichefel ra wisen etiwalóng chón etto fiti mwich. Ekkóch ra túmúnú pisekin nikáttik me microphone, einetin ekkewe puk, monien ewe mwichefel me ewisa ngeni chón mwichefel ar leenien afalafal. Ra pwal álillis lón túmúnún ewe Leenien Mwich. Ekkewe mwán mi ásimaw eli repwe tingorer ar repwe álisi ekkewe chinnap. Ekkewe chónálillisin mwichefel ra tipemecheres le apwénúetá menni chék wis ra kefilitá pwe repwe féri, iwe a fich ngeniir án chón mwichefel repwe súfélitiir.​—1 Timoty 3:13.

Ra isetiw eú leenien áppirú mi múrinné usun Chón Kraist mwán. Ekkewe chónálillisin mwichefel ra fen kefilitá pokiten ra eáni napanap mi múrinné. Lupwen ra féri ar kinikin lón ekkewe mwich, ra apéchékkúla ám lúkú. Ar emmweni ewe angangen afalafal, a álisikem le ekipwichi ám angang. Pokiten ar tipeeú le angangfengen me ewe mwichen mwán mi ásimaw, iwe ra álisatá tipeeúin me pwapwaan ewe mwichefel. (Efisos 4:16) Ló, ló, ló eli repwe pwal fich ngeni ar repwe mwán mi ásimaw.

• Ikkefa ekkewe napanap a nóm ren ekkewe chónálillisin mwichefel lón ewe mwichefel?

• Ifa usun ekkewe chónálillisin mwichefel ra álisi fetáléchún kókkótun ewe mwichefel?