Ka Fen Piin Meefi Tipitipingaw me Niwokkus?

Nengeni ei kúkkún át lón ei lios. Esap pwe a wówóón tipitipingaw me niwokkus? Ka fen piin meefi ena sókkun?— Meinisin ra meefi ena fán ekkóch. Ewe Paipel a fós usun chiechien Jiowa kewe iir mi pwal meefi tipitipingaw me niwokkus. Emén me leir Elias. Sipwe káé usun.

Lóóm, lóóm mwen án Jesus uputiw, Elias a manaw lón Israel. Ahap, ewe kingen Israel ese feffel ngeni ewe Kot mi enlet, Jiowa. Ahap me pwúlúwan we Isipel ra feffel ngeni ewe kot chofona Paal. Ina popun lap ngeni aramas lón Israel ra pwal feffel ngeni Paal. Ewe kiwin Isipel a fókkun kirikiringaw me mochen nieló meinisin chókkewe mi fel ngeni Jiowa, kapachelong Elias! En mi silei met Elias a féri?—

Elias a sú ngeni eú fénúpéén me op lón eú pokungo. En mi silei pwata a féri ena?— Ewer, pwe a niwokkus. Nge Elias itá esap niwokkus. Pwata? Pokiten a fen silei pwe Jiowa epwe tongeni álisi. Jiowa a fen pwári me mwan, an manaman ngeni Elias. Fán eú, Jiowa a fen pélúweni án Elias iótek ren an tiinaato ekkei seni láng. Ina popun Jiowa a tongeni álisi Elias iei!

Atun Elias a nóm lón ewe pokungo, Jiowa a fós ngeni me eisini: ‘Met ei ke fér ikeei?’ Elias a pélúweni: ‘Ngang chék ua chúen fel ngonuk. Ua chék áláemén me ua niwokkus pokiten upwe niniló.’ Me ren Elias pwe meinisin ekkewe chón fel ngeni Jiowa ra fen niniló. Nge Jiowa a ereni Elias: ‘Aapw, ese pwúng ena. A pwal wor 7,000 aramas ra chúen fel ngeniei. Kopwe pwora. A pwal wor angang kopwe féri!’ Óm ekiek nge Elias a pwapwa le rongorong ena?—

Met ka tongeni káé seni minne a fis ngeni Elias?— Kosap fókkun tongeni meefi tipitipingaw me niwokkus. A wor chiechiom kewe mi tongei Jiowa me tongeok. Pwal eú, a watte án Jiowa manaman me a tongeni álisuk iteitan! Ka pwapwa le silei pwe Jiowa epwe álisuk iteitan?—