Néúnéún Moni

Moni a lamot ngeni oukich meinisin pwe sipwe atufichi osupwangen ach famili. (Än Salomon Fos 30:8) Pún “moni a pwal alisi aramas.” (Än Salomon Afalafal 7:12) Neman epwe weires ngenikemi me rúúemén ámi oupwe fós usun moni, nge ousap mut ngeni moni pwe epwe efisi osukosuk lón ámi pwúpwúlú. (Efisos 4:32) A lamot ngeni eú pwúpwúlú ar repwe lúkúlúkfengen lefiler me pwúngúpwúngfengen wóón néúnéún néúr moni.

1 AKKÓTAÉCHÚ

MET EWE PAIPEL A APASA: “Are eman leimi a ekieki an epwe aüetä eu imw tekia, epwe akomwen mottiu o kütta fite ükükün liwinin pisekin, pwe epwe silei are a naf nöün moni an epwe tongeni awesala ewe angang.” (Lukas 14:28) A lamot pwe oupwe akkótafengeni ifa usun néúnéún néúmi moni. (Amos 3:3) Apwúngaló met oupwe mééni me úkúkún moni oua tongeni néúnéú. (Än Salomon Fos 31:16) Esap weween nge pokiten a wor noumi moni, iwe oupwele chék mééni mettóch ese lifilifil. Achocho pwe esap wor ámi liwinimmang. Néúnéú chék ewe moni mi wor remi.​—Än Salomon Fos 21:5; 22:7.

MINNE KA TONGENI FÉRI:

• Ika mi chúen wor lusun moni, iwe oupwe apwúngaló met oupwe fér ngeni

• Ika ese naf ewe moni, oupwe akkóta le féri och mettóch pwe epwe ekisaaló ewe moni towu. Áwewe chék, oupwe tongeni pwisin féri ewe mwéngé lap seni oupwe kamé

2 KAPAS WENECHAR ME EÁNI EKIEK MI PWÚNG USUN MONI

MET EWE PAIPEL A APASA: “Nge ren ach kapas wenechar fän tong sipwe fokun mämäritä lon mettoch meinisin ngeni Kraist, i ewe möküren mwichefel.” (Efisos 4:15) Kopwe kapas wenechar ngeni pwúlúwom usun óm moni tolong me ewe úkúkún ka néúni.

Kopwe pwúngúpwúng ngeni pwúlúwom wóón ekkewe kefil mi watte usun néúmi moni. (Än Salomon Fos 13:10) Pwóppwóróusfengen usun moni epwe álisi an epwe chék wokkor kinamwe lón óm pwúpwúlú. Kosap ekieki pwe noum chék óm we moni tolong nge pwal néún pwúlúwom me néúmi kewe.​—1 Timoty 5:8.

MINNE KA TONGENI FÉRI:

• Tipeeú wóón úkúkún moni emén me emén leimi epwe tongeni néúnéú nge esap pwal lamot pwúngúpwúngfengen lefilemi

• Kopwe fós ngeni pwúlúwom me mwan epwe ppiitá ewe osukosuk usun moni