Taropwe Seni ewe Mwichen Soupwúngúpwúng

Pwiim mi áchengicheng:

Usun met ka fen silei, lón Paipel a wor chómmóng pwóróus usun aramas. Chómmóng me leir, pwóróusen ekkewe aramas mi tuppwél mi kúna ekkewe esin weires sia pwal kúkkúna. Iir “aramas usun chök kich.” (James 5:17) Ekkóch leir ra choutiw ren osukosuk me aúrek. Nge ren ekkóch, a fókkun kinás letiper ren met chiener chón lúkú are chón ar famili ra féri ngeniir. Me pwal ekkóch ra meefi riáfféú ren mengiringirin letiper seni och féfférmwáál ra féri.

Nge met, chókkana ra unusen likitaló Jiowa? Aapw. Chómmóng leir ra meefi meefien ewe soumakken kélfel, ewe a iótek: “Üa mwälechfeil usun eman sip mi mwälechela, kopwe küttaei ngang noum chon angang, pun üsap manlükala om kewe allük.” (Kölfel 119:176) Ka pwal eáni ekkena esin memmeef?

Jiowa esap tongeni ménúkaaló ekkewe chón fel ngeni i mi mwálecheló. A fen chék sussuuki ngeniir alen ar repwe liwiniti, nge fán chómmóng a néúnéú néún kewe chón angang pwe repwe álisiir. Áwewe chék, nengeni ifa usun Jiowa a álisi néún we chón angang Hiop. I a kúna chómmóng osukosuk lón manawan kapachelong osukosuken moni, málóón chón an famili, me watteen semmwen. Hiop a pwal fókkun riáfféú ren ekkewe kapas mi ekinása letipan seni chókkewe itá úrúrún repwe apéchékkúla i ra ereni. Nge esap fán eú a kul seni Jiowa, inaamwo ika a mwáálliló an ekiek lón ekis fansoun. (Hiop 1:22; 2:10) Ifa usun Jiowa a álisi Hiop an epwe eánisefáli ekiek mi pwúng?

Jiowa a álisi Hiop ren an néúnéú chienen Hiop we chón lúkú itan Elihu. Lupwen Hiop a pwáraawu an lólilen ngeni Elihu, i a aúseling me a chúng letipan an epwe kapas. Met epwe apasa? Itá epwe esiita Hiop me sótun ásáwa i are emengiringiri pwe epwe chúng letipan? Elihu a itá ekieki pwe i mi tekia seni Hiop? Aapw, esap fókkun ina! Iei met Elihu a erá fán emmwenien án Kot we manaman mi fel: “Ngang üa usun chök en me fän mesen Kot. Pwal ngang üa för seni pwül.” Mwirin, Elihu a alúkúlúkú Hiop: “Esap wor och popun om kopwe niuokusitiei, üsap mochen pwe kopwe mefi weires rei.” (Hiop 33:6, 7) Elihu ese apachaatá pwal och chou ngeni Hiop, nge fán tong a awora kapasen fén me apéchékkúl mi lamot ngeni.

Kopwe silei pwe pwal ina met ám aua ekieki lupwen aua ammólnatá ei puk. Akkomw, aua aúseling ngeni meefien ekkóch mi fen piin mwálecheló me ekiekiéchú minne a fis ngeniir. (Än Salomon Fos 18:13) Mwirin, fán iótek aua etittina ifa usun Jiowa a álisi ekkóch néún kewe chón angang lóóm mi pwal kúna ekkena esin weires. Sáingolóón, aua ochufengeni ekkena pwóróus lón Paipel me pwal pwóróusen pwiich kewe lón ei fansoun pwe aupwe féri ei puk. Ám aua fókkun etiwok le ekiekifichi minne a mak lón ei puk. Kopwe lúkúlúk pwe ám aua enletin tongeok.

Mwichen Soupwúngúpwúng án Chón Pwáraatá Jiowa