KINIKIN 4
Mengiringir—“Limetiei Seni Ai Tipis”
“Ai we mineféén angang a ámúrinnééló nónnómun ai famili, nge ua pwal poputá le féri ekkóch mettóch ese tipeeú ngeni ewe Paipel. Ua poputá le féri apwapwaan ráninipin, fiti mwékútúkútún politics, me pwal mwo nge fiti fál. Ren úkúkún 40 ier use chúen fiffiti Chón Pwáraatá Jiowa. Ren ai towauoló seni Kot langattam fansoun, pwal ina lapólóón ai lúkú pwe Jiowa esap chúen tongeni omusaaló ai kewe tipis. Ua meefi pwe usap tongeni pwisin omusaaló tipisi. Pún ngang ua fen silei ewe enlet me mwen ai poputá le rikiló seni.”—Martha.
MENGIRINGIR a tongeni chounikichetiw. King Tafit a makkeei: “Üa pwölüla fän ai kewe föför mi ngau, ra chou usun och mettoch mi kon chou ngeniei.” (Kölfel 38:4) Ekkóch Chón Kraist a fókkun luló watteen ar letipeta me ra fen lúkú pwe Jiowa esap fókkun tongeni omusaaló ar tipis. (2 Korint 2:7) Nge mei pwúng ar na ekiek? Ikaamwo ka fen féri tipis watte, ka kon towau seni Jiowa pwe esap chúen tongeni omusaaló tipisum? Aapw, esap ina!
“Ousipwe Pwüngüpwüngfengen”
Jiowa esap tongeni likitaló ekkewe chón tipis mi aier. I a fen kútter! Lón án Jesus we kapas áwewe usun ewe néún mwálecheló, a áweweei pwe Jiowa a usun ewe sam mi tongei néún we mi likitaló an famili me manaweni manaw mi ngaw. Mwirin och fansoun, ewe nau a filatá an epwe liwiniti leenian. “Nge lupwen [ewe nau] a chüen toau seni lenian, seman we a küna o a fokun tongei. A sä ngeni, a romi o mitiri.” (Lukas 15:11-20) Ka áneánei pwe kopwe arap ngeni Jiowa, nge ka meefi pwe ka “chüen toau” seni? Jiowa a usun ewe sam lón án Jesus we kapas áwewe, a fókkun tongeok. A mwétéres an epwe etiwasefáluk ika ka liwiniti i.
Nge ifa usun ika ka lúkú pwe Jiowa esap tongeni omusaaló óm kewe tipis pún ra kon chómmóng me chou? Kese mochen kopwe ekieki án Jiowa ei kapasen etiwetiw a mak lón Aisea 1:18, a erá: “Ou etto, ousipwe pwüngüpwüngfengen. Oua limengau ren tipis usun eman a limengau ren cha. Nge ngang üpwe limetikemi pwe oupwe limöch usun pwechepwechen sno.” Ewer, pwal mwo ekkewe sókkun tipis usun itá resap chúen tongeni télúló usun och chcha wóón eché úf mi pwechepwech, Jiowa a chúen tongeni omusaaló.
Jiowa ese mochen kopwe chék nónnóm lón riáfféú ren mengiringirin letipom. Iwe, ifa usun ka tongeni ngaseló seni ena ren óm kúna omusomusen óm tipis me eáni eú mwelien letip mi liméch? Nengeni ruu mettóch King Tafit a féri. Áeúin, a erá: “Üpwe pwärätä ngeni ewe Samol mi Lapalap ai pupungau.” (Kölfel 32:5) Chechchemeni pwe Jiowa a fen etiwok le arap ngeni i lón iótek me oupwe “pwüngüpwüngfengen.” Etiwa ena etiwetiw. Pwáraawu óm kewe tipis ngeni Jiowa, me uwawu meefiom ngeni. Pokiten Tafit a pwisin kúna minne Jiowa a féri fán itan, iwe a tongeni eáni ei iótek fán lúkúlúk: “Alimalimaei seni ai tipis! . . . Kot, kosap nioput eu letip mi ta o mi wililo.”—Kölfel 51:2, 17, Testament Mi Fö.
Oruuan, Tafit a kúna álillis seni emén mi filitá me ren Kot, ina i soufós Natan. (2 Samuel 12:13) Ikenái, Jiowa a awora ekkewe mwán mi ásimaw lón mwichefel, iir mi fen káit pwe repwe álisi ekkewe chón tipis mi aier le ririéchsefál ngeni Jiowa. Lupwen ka chuuri ekkewe mwán mi ásimaw, repwe néúnéú án Kot we Kapas me iótek pwe epwe ekinamwelói letipom, ekisikisaaló are fen amóeló óm ekiek ese pwúng, me álisuk pwe kopwe chiechiéchsefál ngeni Kot.—James 5:14-16.
Jiowa a mochen kopwe meefi ewe kinamwe mi feito seni óm eáni eú mwelien letip mi limeliméch
“Feiöchün Ätewe An Pupungau A Musala”
Pwúngún pwe neman kopwe meefi pwe óm pwáraawu óm tipis ngeni Jiowa Kot me chuuri ekkewe mwán mi ásimaw, ikkena ekkóch mettóch mi kon áweires ngonuk. A pwal ina usun meefien Tafit. I ese mwittir “pwärätä” an tipis. (Kölfel 32:3) Nge mwirin och fansoun, a kúna feiéchún an pwáraawu an kewe tipis me áwena an kewe féffér.
Eú watteen feiéch Tafit a kúna, ina an pwapwasefál. A makkeei: “Feiöchün ätewe an pupungau a musala, nge an tipis a möla.” (Kölfel 32:1) A pwal iótek: “Ai Samol, kopwe amwelieliaei pwe üpwe mwareituk.” (Kölfel 51:15) Tafit a ngaseló seni mengiringirin letipan me a kilisou ngeni Kot ren an omusaaló tipisin. Iwe a chúng letipan an epwe afalafala aramas usun Jiowa.
Jiowa a mochen kopwe meefi ewe kinamwe mi feito seni óm eáni eú mwelien letip mi limeliméch. Me a mochen óm kopwe apwóróusa ngeni aramas usun i me minne a tipeni fán pwapwaan me enletin letipom nge esap fen fán mengiringirin letipom. (Kölfel 65:1-4) Chechchemeni an ei kapasen etiwetiw: “Ämi tipis epwe mola, pwe Kot epwe awora ngenikemi eu fansoun ngünümi epwe küna pöchökül.”—Föför 3:19, 20.
Ina met a fis ngeni Martha. A erá: “Nei we át a kan tittitiito nei Leenien Mas me Awake! Ekis me ekis, ua poputá le sileisefáli Jiowa. Lón ai liwiniti Jiowa, a kon áweires ngeniei seni meinisin ai upwe tingorei omusomusen ai kewe tipis meinisin. Iwe nge mwirin och fansoun, ua iótek ngeni Kot me tingorei an epwe omusaaló tipisi. Use tongeni lúkú pwe a tori 40 ier me mwen ai liwinsefáliti Jiowa. Minne a fis ngeniei a pwáraatá pwe inaamwo ika emén a fen towau seni Kot ren fansoun langattam, nge a chúen tongeni liwiniti me angangsefál ngeni me nóm fán an chen.”