KINIKIN 5
Liwiniti “ewe Chon Fol me Chon Masa Ngünümi”
Ka meefi ika a wor me lein ekkewe minen eppet ei puk a pwóróus usun a weneituk? Ika ina, iwe kese chék áláemén. Chómmóng néún Kot kewe chón angang mi tuppwél lón fansoun lóóm me lón ei fansoun ra fen kúna ekkena esin weires. Iir ra kúna álillis seni Jiowa ar repwe pwákini ekkena minen eppet, iwe pwal en ka tongeni kúna álillis seni Jiowa.
Kopwe lúkúlúk pwe Jiowa epwe ákkálisuk lupwen ka liwiniti i
KOPWE lúkúlúk pwe Jiowa epwe ákkálisuk lupwen ka liwiniti i. Epwe álisuk le likiitú fán aúrek, pwákini weiresin letipom, me eáni ewe kinamween ekiek me letip mi feito seni óm eáni eú mwelien letip mi limeliméch. Iwe letipom epwe tongeni amwékútúsefáluk le angang ngeni Jiowa fitifengen me chienom kewe chón fel ngeni i. Minne a fis ngonuk epwe usun chék minne a fis ngeni ekkóch popun Chón Kraist, chókkewe aposel Petrus a mak ngeniir: “Me lom oua wewe ngeni sip kana mi mwalechela, nge ikenai oua liwinsefäl ngeni ewe Chon Fol me Chon Masa ngünümi.”—1 Petrus 2:25.
A ffat pwe óm liwiniti Jiowa, ina ewe mettóch mi múrinné seni meinisin ka tongeni achocho ngeni. Pwata? Pún kopwe apwapwaai letipen Jiowa. (Än Salomon Fos 27:11) Usun met ka fen silei, Jiowa a tongeni meefi mettóch, ina minne ach féffér a tongeni kkúú i. Pwúngún pwe Jiowa ese tongeni eriánikich ach sipwe tongei i me angang ngeni. (Tuteronomi 30:19, 20) Emén sou káé usun Paipel a erá pwe ese wor emén a tongeni suuki letipom, mi lamot kopwe pwisin suuki. Iwe, ren ach fel ngeni Jiowa seni alóllóólun ach tongei, sia filatá le suukaaló asamen letipach ngeni i. Lupwen sia féri ena, sia fang ngeni Jiowa eú liffang mi aúchea mi fókkun apwapwaai letipan, ina ach unusen tuppwél ngeni. Enlet, ewe pwapwa mi feito seni ach fel ngeni Jiowa a fókkun wachemwuk.—Föför 20:35; Pwärätä 4:11.
Pwal och, lupwen ka angangsefál ngeni Jiowa, minne ka osupwangan lón pekin lúkú epwe pwák. (Mateus 5:3) Ifa usun? Chómmóng aramas ra kan ekieki: ‘Met popun sia manaw?’ Ra fókkun mochen silei pélúwen ena sókkun kapas eis. A lamot ngeni aramas ar repwe silei ekkena mettóch pún Jiowa a fériir pwe repwe ina usun. A anapanaper ar repwe kúna aúchean manawer lupwen ra akkangang ngeni i. Ewe populapen pwapwa wachemwuk seni meinisin, ina ach silei pwe sia fel ngeni Jiowa pokiten ach tongei.—Kölfel 63:1-5.
Kopwe lúkúlúk pwe Jiowa a mochen kopwe liwiniti i. Ifa usun? Nengeni: Lupwen aua féri masouen ei puk ám aua fókkun iótek ngeni Kot. Eli emén mwán mi ásimaw are pwal emén chienom chón lúkú a áiti ngonuk ei puk. Mwirin a chúng letipom le álleani ei puk me apwénúetá minne ka álleani. Meinisin ekkeei ra pwáraatá pwe Jiowa ese ménúkuk. Nge fán an tong a lukisefálukoto ngeni pwisin i.—Johannes 6:44.
A ekinamwei letipach ach silei pwe Jiowa esap fókkun ménúkaaló néún kewe chón angang mi mwálecheló. Ina met emén pwiich itan Donna a mirititi. Neminna a erá: “Ekis me ekis ua towauoló seni ewe enlet, nge fán chómmóng ua kan ekieki masouen Kölfel 139:23, 24, ewe a erá: ‘Ai Kot, kopwe atittinaei o silei letipei. Kopwe sotuniei o silei ai ekiek. Kopwe pi ika mi wor och mi ingau lon manauei, nge kopwe emweniei won ewe al esemüch.’ Ua silei pwe use fit lein ekkeei chón fénúfan, use wesewesen meefi kinamwe le nóm leir. Nge ua silei pwe a lamot upwe nóm lón án Jiowa we mwicheich. Ua poputá le mirititi pwe Jiowa ese fen likitieiló, nge a chék lamot upwe mirititi ewe alen ai upwe liwiniti i. Me ua fókkun pwapwa pwe iei ua liwinsefál!”
“Ua poputá le mirititi pwe Jiowa ese fen likitieiló, nge a chék lamot upwe mirititi ewe alen ai upwe liwiniti i”
Ám aua fókkun iótek pwe kopwe pwal kúnasefáli “ewe pwapwa seni ewe Samol mi Lapalap,” Jiowa. (Nehemia 8:10) Kosap fókkun tongeni niamam ika ka liwiniti Jiowa.