Atam me If Ra Álleasolapa Kot

Eú rán, atun If a chék áláeménúló, emén serepenit a fós ngeni. A erá: ‘Mi pwúng pwe Kot ese mut ngenikemi ámi oupwe mwéngé seni meinisin uwaan ekkeei irá?’ If a erá: ‘Áúa tongeni mwéngé seni meinisin irá, chilóón chék efóch. Iká áúpwe mwéngé seni ena irá, áúpwe máló.’ Ewe serepenit a apasa: ‘Ousap fókkun máló. Ren enletin, iká oupwe mwéngé seni, oupwe ussun chék Kot.’ Mi pwúng ena? Aapw, ina eú kapas chofona. Nge If a lúkú. Atun If a nennengeni ewe irá, a fen lallapoló an mochen mwéngé uwaan ena irá. A ocheei ewe féún irá, mwirin a ngeni Atam. Atam a silei pwe repwe máló iká ra álleasolapa Kot, iwe nge a chúen ocheei ena féún irá.

Iwe lón ena chék pwal ránin, Jiowa a fós ngeni Atam me If. A eisiniir iká pwata ra álleasolapa. If a tipi ngeni ewe serepenit, me Atam a tipi ngeni If. Pokiten Atam me If ra álleasolap, Jiowa a asuróló seni ewe tánipi. Ren ar resap tolongsefál, a onómu lón ewe leenien tolong rúúemén chónláng me efóch ketilas mi pulopulen ekkei.

Jiowa a erá pwe ewe mi kapas chofona ngeni If epwe pwal kapwúng. Ewe serepenit ese wesewesen fós ngeni If. Jiowa ese féri án ekkewe serepenit repwe fós. Emén chónláng mi ngaw a efisi án ewe serepenit epwe fós. A féri ena pwe epwe otupu If. Iten ena chónláng Setan ewe Tefil. Lón mwachkkan, Jiowa epwe nieló Setan pwe esap chúen tongeni etipetipa aramas le féri met mi ngaw.