Efeiengawen án Emén Meefi Song

Mwirin án Atam me If towu seni ewe tánipiin Ichen, a fen chómmóng néúr. Néúr we mwánichi, itan Ken, a wiliiti emén chón atake, me néúr we pwal emén át, itan Epel a wiliiti emén chón mmasen siip.

Lón eú atun, Ken me Epel ra eáni asor ngeni Jiowa. En mi silei met weween asor? Ina eú sókkun liffang mi aúchea. Jiowa a pwapwa ren án Epel we asor, nge ese pwapwa ren án Ken we asor. Iwe, Ken a fókkun song. Jiowa a ereni Ken pwe an song a tongeni efisi an epwe féri met mi ngaw. Nge Ken ese mochen aúseling.

Iwe nge, Ken a ereni Epel: ‘Sipwe feiló lemal.’ Atun a chék iir lemal, Ken a awata pwiin we me nieló. Met Jiowa a féri? Jiowa a apwúngú Ken ren an asúoló ngeni eú leeni mi towaw seni an we famili. Esap chúen tongeni liwinsefál.

Ifa ewe lesen fán itach? Eli sipwe poputá le meefi song pokiten ese fis mochenich. Iká sia meefi pwe sia song, are iká emén a erenikich pwe sia song, iwe a lamot sipwe mwittir féri ekkesiwil me nemeni ach song me mwen epwe nemenikich.

Pokiten Epel a tongei Jiowa me a féri met mi éch, iwe Jiowa epwe fókkun chechchemeni le amanawasefáli Epel atun a ewili ei fénúfan ngeni eú paratis.