Ewe Imw Tekia lón Papel

Mwirin ewe Noter, néún Noa kewe mwán me pwúlúwer kewe ra néúnatiw chómmóng semirit. A wakkatteló ar kewe famili, me ra parasfetál wóón fénúfan, ussun met Jiowa a fen ereniir ar repwe féri.

Nge ekkóch me leir rese álleasochisi Jiowa. Ra erá: ‘Sipwe aúetá eú telinimw me nóm ikeei. Sipwe féri eú imw mi tekia, tekian epwe tori láng. Iwe, sipwe iteféúló.’

Jiowa ese pwapwa ren met ekkewe aramas ra féri, ina popun a filaatá le akaúlóói ekkena aramas le aúetá ewe imw mi tekia. Ka silei ifa ussun a féri ena? A mwittir féri ar repwe fós lón sókkopaten fós. Iwe, pokiten rese chúen weweiti ar fós lefiler, ra kaúló le aúetá ena imw tekia. Mwirin ena, ewe telinimw ra aúetá a iteni Papel, weween “Rukoruk.” Ekkewe aramas ra poputá le mwékút ngeni ekis meinisin wóón fénúfan. Nge ra sópweeló le féri met mi ngaw lón ekkewe minefé leeni ra mwékút ngeni. A chúen wor aramas mi tongei Jiowa? Sipwe ppii lón ewe lesen mwirin ei.