A Kerán Wor Néúr Át!

Eperiam me Sara ra fen pwúpwúlú lón fite ier. Ra ló seni leenier we mi núkúnúkéch lón Ur me ra nóm lón eú tento. Nge Sara ese ngúnúngúnúngaw, pokiten a lúkúlúk wóón Jiowa.

Sara a fókkun mochen epwe wor néún, pún iei met a ereni Eperiam: ‘Iká nei we chón angang epwe néúnéú, iwe úpwe néúni néún na.’ Mwirin och fansoun, Hakar a néúni emén át. Itan Ismael.

Fite ier mwirin, atun Eperiam a 99 ierin me Sara a 89 ierin, a wor úlúmén néúr waséla. Eperiam a etiwer ar repwe asésé me mwéngéfengen fán efóch irá. Ka silei ié kena waséla? Iir chónláng! Ra ereni Eperiam: ‘Lón nan ier lón chék pwal ei atun, en me pwúlúwom we oupwe néúni emén át.’ Sara a rong ena pwóróus seni me lón ewe tento. A takir me ekieki: ‘Epwe ifa ussun úpwe tongeni néúni emén semirit nge úa fen chinnap?’

Mwirin ena ier, Sara a néúnatiw emén át ussun chék met néún Jiowa we chónláng a fen pwonei. Eperiam a eita ngeni Aisek, weween “Takir.”

Ina epwele nimu ierin Aisek atun Sara a kúna án Ismael urumwotei. A mochen túmúnú néún na, ina popun a feiló ren Eperiam me tingorei an epwe tiinaaló Hakar me Ismael. Akkomw, Eperiam ese mochen féri met a ereni. Nge Jiowa a ereni Eperiam: ‘Kopwe aúseling ngeni Sara. Úpwe túmúnú Ismael. Nge ái kewe pwon repwe fis ren Aisek.’