Ra Atai Ar we Pwon

Jiowa a ereni Moses: ‘Kopwe feito rei wóón ewe chuuk. Úpwe makkeei ái kewe allúk wóón faw mi chépéép me ngonuk.’ Moses a feitá wóón ewe chuuk me a nóm ikkena úkúúkún 40 rán me 40 pwiin. Atun a nóm ikkena, Jiowa a makkeei ekkewe Engol Allúk wóón rúúeféú faw mi chépéép me a ngeni Moses.

Mwirin och fansoun, ekkewe chón Israel ra ekieki pwe Moses a sú seniir. Ra ereni Aaron: ‘Áúa mochen pwe emén epwe emmwenikich. Kopwe féri emén kot fán itach!’ Aaron a apasa: ‘Oupwe ngeniei ámi kewe kolt.’ Iwe, a eteni ekkewe kolt me féri uluulun emén kou. Ekkewe aramas ra apasa: ‘Ei uluulun kou iei ach we Kot a emmwenikichewu seni Isip!’ Ra poputá le fel ngeni ewe uluulun kou mi ffér seni kolt, me ra féri apwapwaan. Mi mwáál met ra féri? Ewer, pokiten ekkena aramas ra fen pwon pwe repwe fel ngeni Jiowa chék. Nge iei ra atai ar na pwon.

Jiowa a kúna met a fis, me a ereni Moses: ‘Feitiw ren ekkewe aramas. Ra álleasolapaei me ra fel ngeni emén kot chofona.’ Moses a feitiw me wóón ewe chuuk, me a uwei ekkewe rúúeféú faw mi chépéép.

Atun Moses a kkan ngeni leenier we, a rong án ekkewe aramas kél. Mwirin a kúna ar pwérúk me chapetiw ngeni ewe uluulun kou. Moses a fókkun song. A manetiw ekkewe rúúeféú faw mi chépéép, me ra tatakkis. A mwittir atai ewe uluulun. Mwirin a eisini Aaron: ‘Ifa ussun ekkewe aramas ra etipetipaók óm kopwe féri ei mettóch mi fókkun ngaw?’ Aaron a apasa: ‘Kosap song. Ka fen silei ussun ekkeei aramas. Ra mochen emén kot, ina popun úa oturaalong ar kewe kolt lón ewe ekkei iwe a wiliiti uluulun emén kou!’ Itá Aaron esap féri ena. Moses a feitá sefál wóón ewe chuuk me a tingorei Jiowa an epwe omusaaló ekkewe aramas.

Jiowa a omusaaló tipisin chókkewe mi tipemecheres le álleasochisi i. Ka kúna úkúúkún lamoten án ekkewe chón Israel repwe nóm fán án Moses emmwen?