Emén Minefé Souemmwen me Rúúemén Fefin mi Pwora

Mwirin án Josua emmweni néún Jiowa kewe aramas ren fite ier, a máló atun a ierini 110. Atun a chúen manaw, ekkewe chón Israel ra chúen fel ngeni Jiowa. Nge mwirin án Josua máló, ra poputá le fel ngeni uluulun ussun chék ekkewe chón Kenan. Pokiten ekkewe chón Israel rese sópweeló le féri met Josua a féri, iwe Jiowa a mut ngeni ewe kingen Kenan itan Japin an epwe áweiresi manawer. Ekkewe aramas ra tingormaw án Jiowa álillis. Iwe, Jiowa a ngeniir emén mineféén souemmwen itan Parak. I epwe álisi ekkewe aramas le liwiniti Jiowa.

Emén soufós fefin itan Tepora a tiiti Parak an epwe feito ren. A wor eú pwóróus fán itan seni Jiowa: ‘Kopwe angei 10,000 mwán, me feiló chuuri néún Japin kewe soufiu ren ewe chénúpupu Kison. Me ikena kopwe okkufu Sisera, ewe meilapen néún Japin kewe soufiu.’ Parak a ereni Tepora: ‘Úpwe chék feiló iká ke fitiei.’ Tepora a apasa: ‘Úpwe fituk. Nge kopwe chék silei pwe esap en ewe kopwe nieló Sisera. Jiowa a erá pwe emén fefin epwe nieló.’

Tepora a fiti Parak me néún kewe soufiu le feiló ngeni ewe Chuuk Tapor pwe repwe mmólnetá le maun. Atun chék Sisera a rong ussun ena, a ochufengenni waan kewe woken me néún kewe soufiu me fán ewe chuuk. Tepora a ereni Parak: ‘Ikenái Jiowa epwe ewinnok.’ Parak me néún kewe 10,000 mwán ra feitiw me wóón ewe chuuk ar repwe chuuri néún Sisera kewe soufiu mi péchékkúl.

Mwirin Jiowa a efisi án ewe chénúpupu Kison epwe pummóng. Wáán Sisera kewe woken ra mwéch lón ewe pwakak. Sisera a tétiw me wóón waan we woken me a sú. Iwe, Parak me néún kewe soufiu ra okkufu néún Sisera kewe soufiu, nge rese liapeni Sisera pwe a sú me op lón eú tento imwen emén fefin itan Jael. Iwe Jael a ngeni och milik an epwe ún me a pwélú ngeni eché kuus. Iwe a annutoló. Mwirin Jael a ánnifelong me angei efóch chúfél me chúfélú ngeni chamwan, iwe a máló.

Parak a feito kútta Sisera. Jael a towu me lón imwan we tento me apasa: ‘Feito úpwe áiti ngonuk ewe mwán ka kútta.’ Parak a tolong me a kúna Sisera pwe a máló. Parak me Tepora ra mwareiti Jiowa lón kél ren an mut ngeni chón Israel ar repwe okkufu chón oputer kewe. Ren úkúúkún 40 ier, chón Israel ra nónnóm fán kinamwe.