Emén Kiwin mi Ngaw A Kúna Kapwúng

King Ahap a tongeni kúna eú ataken kreip seni asammwachoon imwan we imwen king lón Jesreel án emén mwán itan Napot. Ahap a mochen epwe eáni ena ataken kreip, me a sótun mééni seni Napot. Nge Napot ese mochen améméló pokiten a ú ngeni án Jiowa allúk le améméló eú fénú álemwirien an famili. Itá Ahap a súféliti Napot ren an féri minne mi pwúng? Aapw. Ahap a wesen song. Pokiten a fókkun song, iwe ese mochen towu seni ruumwan me ese mochen mwéngé.

Pwúlúwen Ahap we mi fókkun ngaw Kiwin Isipel, a ereni: ‘En kingen Israel. Ka tongeni chék angei met chék ka mochen. Úpwe angei ena fénú fán itom.’ A mak taropwe ngeni ekkewe mwán lón ewe telinimw mi wor ar nemenem, me a ereniir ar repwe etipisi Napot pwe a otteki Kot iwe repwe mane ngeni faw tori a máló. Ekkena mwán ra féri met Isipel a ereniir ar repwe féri, me mwirin Isipel a ereni Ahap: ‘Napot a máló. Iei ka eáni ewe ataken kreip.’

Esap chék Napot ewe Isipel a nieló nge ese wor tipisin. A nieló chómmóng aramas iir mi tongei Jiowa. A fel ngeni uluulun me féri pwal ekkóch mettóch mi ngaw. Jiowa a kúna meinisin ekkewe mettóch mi ngaw Isipel a féri. Met epwe ffér ngeni?

Mwirin án Ahap máló, néún we át itan Jeoram a wiliiti king. Jiowa a tiinaaló emén mwán itan Jehu pwe epwe apwúngú Isipel me an we famili.

Jehu a wawa waan we woken le feiló Jesreel ikewe Isipel a nóm ie. Jeoram a feito wóón waan we woken pwe epwe chuuri Jehu me eisini: ‘Mi wor kinamwe lefilach?’ Jehu a erá: ‘Esap wor kinamwe iká pwe inom we Isipel a chúen féri ekkewe mettóch mi ngaw.’ Jeoram a sótun okullu waan we woken me sú. Nge Jehu a nikáppichi Jeoram me a máló.

Mwirin Jehu a feiló ren imwen Isipel we. Atun Isipel a rong pwe Jehu a feito, a makeup, féri mékúran, me wikkiti ren asammwachoon imwan we asan. Atun Jehu a war, Isipel a kapwong ngeni lón ewe napanap mi ésúfélúngaw. Jehu a kékkétá ren néún Isipel kewe chón angang iir mi útá únúkkún: “Oupwe oturatiw!” Iwe, ra oturatiw Isipel me lón ewe asammwacho, me a turutiw lón ewe pwúl me a máló.

Mwirin ena, Jehu a nieló néún Ahap kewe 70 át me limetawu ewe fénú seni ar fel ngeni Paal. Ka tongeni kúna ussun án Jiowa silei mettóch meinisin, me an apwúngú chókkewe mi féri met mi ngaw lón fansoun mi fich?