Jiowa A Álisi Jeosafat

Jeosafat ewe kingen Juta a atai ewe róngen asor fán iten Paal me ekkewe uluulun lón ewe fénú. A mochen pwe ekkewe aramas repwe silei án Jiowa kewe allúk. Ina popun, a tiinaaló ekkewe néúwis me chón Lifai ngeni meinisin chón Juta pwe repwe asukuler án Jiowa kewe allúk.

Ekkewe mwú únúkkúr ra niwokkus le maunei chón Juta pokiten ra silei pwe Jiowa a nónnóm rer. Ra pwal mwo nge uweato ar liffang ngeni King Jeosafat. Nge ekkewe chón Moap, chón Amon, me chókkewe seni ewe leeni Seir ra feito pwe repwe maun ngeni Juta. Jeosafat a silei pwe a lamot ngeni án Jiowa álillis. A tiiti meinisin ekkewe mwán, fefin, me semirit ar repwe kochufengen lón Jerusalem. Mwen meser meinisin, a iótek: ‘Jiowa, áúse tongeni win iká kese álisikem. Kese mochen erenikem met áúpwe féri.’

Jiowa a pélúweni an iótek: ‘Kosap niwokkus. Ngang úpwe álisuk. Oupwe átettelikemi me úkkúútá chék, iwe oupwe kúna ifa ussun úpwe selánikemi.’ Ifa ussun Jiowa a selániir?

Sorotáán ewe rán, Jeosafat a filaatá ekkóch chón kél me a ereniir ar repwe karis akkomw mwen ekkewe soufiu. Ra karis seni Jerusalem tori ewe leenien maun lón ewe leeni itan Tekoa.

Atun ekkewe chón kél ra mwareiti Jiowa fán léúwommóng, Jiowa a fiu fán iten néún kana aramas. A efitikokooi ekkewe chón Amon me chón Moap, iwe ra poputá le pwisin fiufengen, me ese wor emén leir a manaw. Nge Jiowa a túmúnú ekkewe chón Juta, ekkewe soufiu, me ekkewe souasor. Meinisin aramasen ekkewe fénú mi kkan ngeniir ra rong ussun met Jiowa a féri, me ra silei pwe Jiowa a chúen álisi néún kewe aramas. Ifa ussun Jiowa a seláni néún aramas? A féri ena lón chómmóng napanap. Ese pwal lamot ngeni án aramas álillis.