Ewe Fefin ren ewe Ito

Mwirin ewe Pasofer, Jises me néún kewe chón káé ra pwer Sameria atun ra liwiniti Kalili. Jises a kaúló ren ewe leeni mi iteni án Jekop we ito kkan ngeni ewe telinimwen Saikar. Atun a asésé ikena, néún kewe chón káé ra tolong lón ewe telinimw pwe repwe kamé ener.

Emén fefin a feito pwe epwe úfúf konik. Jises a ereni: “Kopwe ngeniei och konik.” Ena fefin a erá: ‘Pwata ka fós ngeniei? Ngang emén fin Sameria. Chón Jus rese kan fós ngeni chón Sameria.’ Jises a ereni: ‘Iká ka silei ngang ié, kopwe tingoreei och konik iwe úpwe ngonuk ewe konikin manaw.’ Ena fefin a erá, ‘Met weween alom na? Ese mwo nge wor óm pwekit.’ Jises a ereni: ‘Meinisin mi ún seni ei konik úpwe ngeni, esap fókkun kakasefál.’ Ena fefin a erá: “Samol, kopwe ngeniei ena konik.”

Mwirin Jises a ereni: ‘Kopwe kérato pwúlúwom we epwe feito ren ei ito.’ A erá: ‘Ese wor pwúlúwei.’ Jises a ereni: ‘Ka kapas wenechar. Ka fen pwúlúweni nimmén, me iei ka nóm ren emén mwán kese mwo apwúpwúlú ngeni.’ Ena fefin a erá: ‘Iei úa silei pwe en emén soufós. Chón leeniei we ra lúkú pwe sia tongeni fel ngeni Kot wóón ei chuuk, nge ekkewe chón Jus ra erá pwe sia tongeni chék fel ngeni Kot lón Jerusalem. Úa lúkú pwe atun ewe Messaia a war, epwe áiti ngenikem ifa ussun áúpwe fel ngeni Kot.’ Mwirin Jises a ereni och mettóch esaamwo ereni emén fán eú: ‘Ngang ewe Messaia.’

Ewe fefin a mwittir feiló ngeni leenian we me a ereni ekkewe chón Sameria: ‘Ái lúkú úa kúna ewe Messaia. A silei meinisin pwóróusei. Ou feito oupwe katol!’ Iwe, ra fiti le feiló ngeni ewe ito me aúseling ngeni án Jises afalafal.

Ekkewe chón Sameria ra etiwa Jises an epwe nómotiw lón leenier we. Ren úkúúkún ruu rán, Jises a asukula ekkewe aramas ikena me chómmóng ra lúkú i. Ra ereni ewe fin Sameria: ‘Mwirin ám aúseling ngeni ei mwán, iei áúa silei pwe i wesewesen ewe epwe amanawa chón fénúfan.’