Piter A Amam Jises

Atun Jises a nóm ren néún kewe aposel lón eú ruumw asan, a ereniir: ‘Ámi meinisin oupwe likitieiló lepwinei.’ Piter a erá: ‘Esap ngang ena! Ikáámwo ekkewe ekkóch repwe likitukoló, nge ngang úsapw tongeni likitukoló.’ Nge Jises a ereni Piter: ‘Me mwen án emén chukó epwe kékké, kopwe apasa fán úlúngát pwe kese sileei.’

Atun ekkewe soufiu ra uwealó Jises ren imwen Kaifas we, lap ngeni ekkewe aposel ra sú. Nge rúúemén me leir ra tapweló mwirin Jises lein ewe mwichen aramas. Emén me leir ina i Piter. A nóm lúkún imwen Kaifas we ren ewe ekkei. Emén chón angang fépwúl a esilla Piter me a erá: ‘Ngang mi sissileek! Ka pwal fiti Jises!’

Piter a erá: ‘Aapw, esap ngang ena! Úse silei met ena ke fósun!’ A feiló ren asamen ewe imw, iwe pwal emén chón angang fépwúl a kúna me a ereni ewe mwichen aramas: ‘Ei mwán a fiti Jises!’ Piter a erá: ‘Úse mwo nge sissilei Jises!’ Emén mwán a erá: ‘En emén me leir! Úa esilla ren ngingiin óm kapas pwe en seni Kalili, ussun chék Jises.’ Nge Piter a ékképél le apasa: ‘Úse sissilei i!’

Lón ena chék atun, emén chukó a kékké. Piter a kúna án Jises kul me nengeni. A chemeni met ewe Jises a fen ereni, iwe a towu lúkún me kechiwengaw.

Atun a fis ena, chón ewe mwichen soukapwúng mi tekia ra chufengen me ra akkóta án Jises epwe kapwúng lón imwen Kaifas we. Ra fen apwúngaló pwe repwe nieló Jises, nge ra pwal kútta popun ar repwe nieló. Nge rese tongeni kúna och tipisin. Mwirin Kaifas a eisini Jises: ‘En Néún Kot?’ Jises a erá: ‘Ewer.’ Kaifas a erá: ‘Ese pwal chúen lamot ach sipwe kútta pwal och pisekin pwáraatá. Iei eú kapas mi ésúfélúngawa Kot!’ Iwe ra tipeeú ngeni me erá: ‘Ei mwán epwe fókkun máló.’ Ra pésapei Jises, attufa, pwélúoló mesan, me ra éfénú, me erá: ‘Iká en emén soufós, kopwe erenikem ié a éfénuk!’

Lupwen a rániló, ra uwealó Jises ren án chón Jus we mwichen soukapwúng mi tekia me ra eisinisefál: ‘En Néún Kot?’ Jises a pélúweniir: ‘Oua fen erá pwe ngang ena.’ Mwirin ra etipisi pwe i emén mi ésúfélúngawa Kot me ra uwealó ren Pontius Pailat ewe governor lón Rom. Met a fis mwirin? Sipwe ppii.