Ese Wor och Mettóch A Aúkaretiw

A wor emén mwán ese tongeni fetál a mómmóót ren asamen ewe imwenfel me a kan tittingor iteiten rán. Lón eú rán, mwirin leolowas, a kúna Piter me Jon ar feilong lón ewe imwenfel. A ereniir: ‘Ouse mochen ngeniei och.’ Piter a ereni: ‘A wor och mettóch rei mi múrinné seni moni úpwe ngonuk. Lón iten Jises, kopwe útá me fetál!’ Mwirin Piter a álisi ewe mwán lé útá, me a poputá lé fetál! Ekkewe aramas ra fókkun pwapwa ren ena manaman, iwe a chómmóngoló aramas ra wiliiti chón lúkú.

Nge ekkewe souasor me Satusi ra fókkun song. Ra turufi ekkewe aposel, uweir ngeni imwen kapwúng, me ra ereniir: ‘Ié a ngenikemi manaman ámi oupwe echikara ei mwán?’ Piter a erá: ‘Áúa angei manaman seni Jises Kraist, ewe oua nieló.’ Ekkewe meilapen ewe imwenfel, ra púchér me erá: ‘Oupwe wes le fósun Jises!’ Nge ekkewe aposel ra erá: ‘Áúpwe chék fósun. Áúsapw fókkun úkútiw.’

Mwirin chék án Piter me Jon musowu, ra feiló ren ekkewe pwal ekkóch chón káé me apwóróusa ngeniir met a fis. Ra iótek me tingorei Jiowa: ‘Kese mochen apworakem pwe áúpwe tongeni sópweeló le féri óm ei angang.’ Jiowa a ngeniir an we ngún mi fel, iwe ra sópweeló le afalafal me echikara aramas. Iwe a chómmóngoló aramas ra wiliiti chón lúkú. Ekkewe Satusi ra fókkun lólówó pwe iwe ra aresini ekkewe aposel me otururelong lón kalapus. Nge atun a pwiniló, Jiowa a tiinatiw emén chónláng me a suuki asamen ewe imwen kalapus me ereni ekkewe aposel: ‘Oupwe liwiniti ewe imwenfel, me afalafal ié.’

Sorotáán ewe rán, ekkewe chón mmas ra ereni ewe mwichen soukapwúng mi tekia: ‘Ewe leenien kalapus a chúen lok, nge ekkewe mwán oua aresiniir rese chúen nóm!’ Emén a pwal kétá: ‘Ra nóm lón ewe imwenfel me asukula ekkewe aramas!’ Iwe, ra pwal aresini ekkewe aposel me uweiireto ngeni ewe mwichen soukapwúng mi tekia. Ewe souasor mi lapalap a erá: ‘Áúa fen allúkú pwe ousap fósun Jises!’ Nge Piter a pélúweni: “Ám áúpwe álleasochisi Kot lap seni aramas.”

Ekkewe néúwisin lamalam ra fókkun song pwe ra mochen nieló ekkewe aposel. Nge emén Farisi itan Kamaliel a útá me erá: ‘Oupwe túmúnúkemi pwe eli Kot a nónnóm ren ekkeei mwán. Oua wesewesen mochen fiu ngeni Kot?’ Ra aúselinga an na éúréúr. Mwirin ar awater ra pwal allúkú ar repwe úkútiw le afalafal, me ra mut ngeniir ar repwe feiló. Nge ena ese pwal aúkaretiw le afalafal. Ra pwora le sópweeló ar esilefeili ewe kapas allim lón ewe imwenfel me seni imw ngeni imw.