Emén Chón Mmasen Kalapus A Wiliiti Chón Kraist

Lón Filipai, a wor emén chón angang fépwúl timon a wááni. Ena timon a néúnéú i an epwe tongeni osuni met epwe fis lón mwach, iwe ren ena, a watte néún néún kewe masta moni. Atun Paul me Sailas ra ló Filipai, ena fépwúl a kan fitifetáler ekis meinisin ren fitu rán. Ewe timon a efisi an epwe púchér me apasa: “Ekkeei mwán iir chón angang ngeni ewe Kot mi Unusen Tekia Seni Meinisin.” Iwe, Paul a ereni ewe timon: ‘Lón iten Jises kopwe towu seni neminnei!’ Iwe, ewe timon a towu seni.

Atun néún ewe fépwúl kewe masta ra kúna pwe a péút seniir winner, ra fókkun song. Ra uwealó Paul me Sailas ngeni ekkewe sounemenemen ewe telinimw me ra ereniir: ‘Ekkeei mwán ra atai allúk me ra osukosuka unusen ewe telinimw!’ Ekkena sounemenem ra allúkú pwe repwe kawet me kalapus. Ewe chón mmasen kalapus a otururelong lón ewe ruumw mi nóm epichikin ewe imwen kalapus, me a ékkúkaaló pecher kewe lefilen ekkewe sópwun irá mi chou.

Atun Paul me Sailas ra eáni kélún mwareiti Jiowa, ekkewe chón kalapus ra akkaúseling ngeniir. Mwittir chék a fis eú watteen chechchechin fénú lukenipwin, me unusen ewe imwen kalapus a chechchech. Ekkewe asam ra suukuló me féféén ekkewe chón kalapus a pichiló. Ewe chón mmasen kalapus a kúna pwe ekkewe asam ra suukuló. A ekieki pwe meinisin ekkewe chón kalapus ra sú, iwe a angei néún we ketilas pwe itá epwele pwisin nieló.

Iwe nge, Paul a léúwommóng le kékkéwu: ‘Kosap pwisin efeiengawók! Ám meinisin mi nóm ikeei!’ Ena chón mmas a sááló ren Paul me Sailas me a chapetiw mwer. A eisiniir: “Met a lamot úpwe féri pwe úpwe kúna manaw?” Ra ereni: ‘A lamot en me chón lón imwom we oupwe lúkú Jises.’ Mwirin, Paul me Sailas ra áiti ngeni ussun án Jiowa kapas, iwe i me chón lón imwan we ra papatais.