Eché Taropwe Seni ewe Mwichen Soupwúngúpwúng

Ngeni Pwiim Kewe Áchengicheng Chón Kraist:

Pokiten kich sia fel ngeni Jiowa, sia aúcheani an we Kapas, ewe Paipel. Sia lúkúlúk pwe a pwúng uruwoon ekkewe pwóróus lón, a pwal awora emmwen mi alúkúlúk fán iten manawach, me a wor pisekin pwáraatá ussun án Jiowa tongei aramas. (Kölfel 119:105; Luk 1:3; 1 Jon 4:19) Áúa fókkun mochen álisi ekkewe pwal ekkóch ar repwe káé ekkewe pwóróus mi aúchea lón án Kot we Kapas. Ina minne, áúa fókkun pwapwa le awora ei puk itelapan, Lesen Ka Tongeni Káé Seni Paipel. Ouse mochen mut ngenikem ám áúpwe erenikemi ussun masouan.

Ei puk a ákkáeúin ffér fán iten ekkewe semirit. Iwe nge, a pwal tongeni álisi ekkewe watte iir mi mochen alapaaló ar káé ussun ewe Paipel. Me pokiten ewe Paipel ina eú puk fán iten meinisin, sipwe kúna álillis atun sia enniwili ekkewe lesen lón, iwe sipwe enletin pwapwa.

Ei puk a masou ren ekkewe pwóróus seni Paipel mi fósun uruwoon aramas, me a poputá seni ewe atun Kot a féri láng me fénúfan. Áúa achocho le áweweei ekkewe pwóróus lón ewe Paipel lón ewe napanap mi fataffatéch, mecheres, me lón tettelin ineet ra fis.

Ei puk ese chék menlapei ekkewe pwóróus lón ewe Paipel. Nge a mak lón ewe napanap epwe álisikich le kachitooni ekkewe pwóróus seni Paipel me ekkewe sasing ra álisikich le anchangei meefien chókkewe sia állea ussur.

Ei puk epwe álisikich le kúna pwe ewe Paipel a fósun chókkewe mi álleasochisi Jiowa me ekkewe rese. Me sia tongeni káé seni ar leenien áppirú. (Rom 15:4; 1 Korint 10:6) A wor 14 kinikin lón ei puk. Lepoputáán eú me eú kinikin, a menlapei ekkóch ekkewe lesen sia tongeni káé.

Iká en sam are in, eli ka tongeni álleani eú lesen ngeni noum we me pwóróus wóón ekkewe sasing. Mwirin oua tongeni álleani ekkewe wokisin ena lesen a lóngólóng wóón. Álisi noum we an epwe eririfengeni met a álleani lón ewe Paipel ngeni ekkewe lesen lón ei puk. Ka pwal tongeni féri ena atun ka álisi emén watte an epwe weweiti ewe menlapen pwóróus seni ewe Paipel.

Áúa áneán pwe ei puk epwe álisi meinisin mi letipwenechar, ese lifilifil iká iir kúkkún are watte, ar repwe káé án Kot we Kapas me apwénúetá ekkewe lesen. Iwe, ra pwal tongeni chóni an we famili me fel ngeni.