Epwe Ita Ifa Usun Sipwe Iotek ngeni Kot?

LUPWEN emon chon kaeo a tingor alillis fan iten iotek, sap minne Jises ese mochen alisi. Me ren Luk 11:2-4, a polueni: “Lupwen oupwe iotek, oupwe apasa: Semem, itom epwe pin. Muum epwe feito. Awora ngenikem lon ei ran anem pilaua. Pwal omusalo senikem am kewe tipis, pun am aupwe pwal omusalo meinisin mi tipis ngenikem. Kete emmwenikemelong lon sossot.” (Catholic Douay Version) Chommong ra silei pwe ina ewe Iotekin Ach Samol. A kan affata chommong poraus.

Aewin, ewe kapas mi akkom a aiti ngenikich ewe emon ach kewe iotek epwe weneiti, weween, Semach. Nengeni pwe alon Jises a affata pwe sisap fokkun iotek ngeni pwal emon aramas, och lios, emon “aramasepin”, are pwal mwo ngeni pwisin i. Popun, pun Kot a fen apasa: “Usap ngeni pwal emon ai ling, are ai iteuoch ngeni ekkewe ululun.” (Aisea 42:8, Dy) Ina minne, Semach we lon lang esap auseling ngeni ekkewe iotek mi weneiti och mettoch are pwal emon lukun i, inaamwo ika ewe emon mi iotek a fokkun tinikken fan iten lamalam. Lon ewe Paipel, a eita ngeni Jiowa Kot chok ewe “Chon Auseling ngeni Iotek.”​—Kol Fel 65:2.

Eli ekkoch repwe apasa pwe ekkewe “aramasepin”, ir chon affor chok lefilen aramas me Kot. Nge iei an Jises emmwen: “Ngang ewe aal, o ewe enlet, o ewe manau. Esor emon epwe feilo ren ewe Sam are esap pokiten ngang. Iwe, upwe fori minne oupwe tingorei fan itei, pwe ewe Sam epwe kuna an ling lon Noun we.” (Jon 14:6, 13) Iwe, Jises a affata pwe ese pwung ewe ekiek pwe emon aramasepin epwe tongeni wiseni wisen chon affor. Pwal nengeni mwo alon ewe aposel Paul usun Kraist: “Sap minne a chok malo fan asengesich, nge a utasefal seni malo, iwe, a ukkuta le peliefichin Kot me a tittingor fan itach.” “A manaufochofoch pwe epwe wisen chon affor fan asengesin meinisin mi arap ngeni Kot ren i.”​—Rom 8:34; Ipru 7:25, Catholic Jerusalem Bible.

Ewe It mi Epwe Pinilo

Mwirin, Jises a apasa ei mettoch lon an we iotek: “Itom epwe pinilo.” Epwe ita ifa usun emon epwe tufichin pinini iten Kot we ika ese silei me akapasa ena it? Lap seni fan 6,000 lon ewe “Tesin Lom,” a mak ewe it Jiowa fan iten an epwe affata ika io Kot.

Iei alon eu footnote fan iten Ekistos 6:3 lon ewe Catholic Douay Version: “Ekkoch aramas ikenai ra fen efisata ewe it Jiowa . . . , nge esor emon a silei wesewesen newenewenen ewe it mi mak lon ewe Tesin Ipru, pun aramas rese chuen anewenewena ewe it seni lom.” Ina minne, ewe Catholic New Jerusalem Bible a nounou ewe it Yahweh. Inaamwo ika ekkoch sou kaeo ra meefi pwe a pwung ena it, nge lon fosun English a pwung me a fansoun langattam an aramas anewenewena ena it mi fel ren ar apasa “Jehovah”. Newenewenen ena it a sokkolo lon ekkewe pwal fitu fos. Nge iei ewe mettoch mi lamot seni meinisin, ach sipwe nounou ewe it fan iten ach sipwe pinini. Om lamalam a fen aiti ngonuk om kopwe pappani ewe it Jiowa lon iotek?

Ekkewe Mettoch A Pwung Sipwe Iotek Usun

Mwirin, Jises a aiti ngeni noun kewe chon kaeo ar repwe ioteki ei mettoch: “Muum epwe feito.” Ewe Kapas Allim me ren Mattu a apachalong ekkeei kapas: “Letipom epwe fis won fonufan usun an a fis lon lang.” (Mattu 6:10, Dy) An Kot we Muu eu nemenem le poun Jises Kraist. (Aisea 9:6, 7) Me ren ekkewe oesini lon Paipel, ena muu epwe amoielo an aramas kewe nemenem meinisin me atoto eu fansoun kinamwe won unusen fonufan. (Kol Fel 72:1-7; Taniel 2:44; Pwarata 21:3-5) Ina popun, chon Kraist ra kan ikkioteki warotoon ewe Muu. Om lamalam a fen aiti ngonuk om kopwe ina usun?

Me ren alon Jises, a pwal ffatolo pwe sipwe tongeni apachalong lon ach kewe iotek ekkewe mettoch mi lamot lon pwisin manauach. Iei alon: “Kopwe ngenikem ran me ran anem mongo iteiten ran. O kopwe omusa senikem am tipis, pun am aua pwisin omusalo iteiten aramas meinisin mi liwinimmang senikem. O kete emmwenikemelong lon sossot.” (Luk 11:3, 4, Dy) Alon Jises a aiti ngenikich pwe sipwe tongeni kutta letipen Kot lon ekkewe mettoch mi fiffis lon manauach iteiten ran, me sipwe tongeni kapas ngeni Jiowa usun mettoch meinisin sia aurek ren are mi tongeni atai ach kinamwe. Ach ikina usun le tingorei Kot ren an alillis a kan alapalo ach weweiti pwe unusen manauach a longolong won i. Iwe, a pwal lapalo ach mefi an nemenem lon manauach. Sia pwal kuna feioch seni ach tittingorei Kot pwe epwe omusalo ach kewe tipis iteiten ran. A ina usun an a lapelo ach mefi ach kewe apwangapwang me ach tufichin omusalo apwangapwangen ekkewe ekkoch. A pwal fichitikich an Jises peseikich ach sipwe iotek pwe esap torikich sossot, nge akkaewin pokiten an a kon ngauolo letipen chon fonufan. Ren an epwe tipeeufengen manauach me ena iotek, sipwe kan tumunukich pwe sipwe touau seni ekkewe sokkun leeni me lapalap mi tongeni emmwen ngenikich fofforingau.

Iwe, esor tipemwaramwar pwe ewe Iotekin Ach Samol a aiti ngenikich chommong mettoch fan iten ach sipwe eani ekkewe iotek mi apwapwai Kot. Nge Jises a ita mochen ach sipwe silei ena iotek me apiapini chok iteitan?

Pwal Och Fon fan iten Iotek

Jises a awora pwal och emmwen fan iten iotek. Iei alon Mattu 6:5, 6: “Iwe, fansoun ami iotek, ousap appiru ekkewe chon likotupotup; pun ra efich uta o iotek lon ar kewe sinakok me le pukopuken al, pwe aramas repwe katol ir. . . Nge fansoun om iotek, kopwe tolong lon leeniom mi monomonelo, o apungalo ewe asam, o iotek ngeni Semom mi nom le monomon. Iwe, Semom mi nengeni le monomon epwe liwini ngonuk.” Ekkena kapas ra aiti ngenikich pwe sisap iotek fan iten ach sipwe lingelo mwen mesen aramas. En mi kan suuki letipom ngeni Jiowa le monomon, usun an ewe Paipel peseikich?​—Kol Fel 62:8.

Iei an Jises ourour: “Lon ami kewe iotek, ousap apiapini ami kapas usun fofforun chon lukun, pun ra ekieki pwe ren ar eani kapas chommong epwe wor chon auseling.” (Mattu 6:7, JB) A ffat pwe me ren Jises, ese pwung ach sipwe amwochulukun ach kewe iotek, me sisap pwal alleanir seni eu puk. Alon a pwal pwarata pwe ese pwung nounoun ewe rosario.

Eu puk lon pekin Catholic a pwarawu ei mettoch: “Eli ewe sokkun iotek mi murinno seni meinisin a wewe ngeni ach pwisin meefata ekiekich lupwen sipwe fos ngeni i ren watten ach kilisou are osupwang lon fansoun letipechou, are lon ach feffel ngeni i iteiten ran.” An Jises kewe iotek a pwarata wesewesen meefian are mochenin, nge sap minne a amwochulukun. Ren chok awewe, alleani mwo ewe iotek Jises a eani lon Jon sopwun 17. A tipeeu ngeni ewe iotek a awora fan iten emmwen, iwe, a menlapei an Jises mochen kuna iten Jiowa an epwe pinilo. An Jises iotek a pwarata wesewesen meefian me a popu seni alollolun letipan.

Ekkewe Sokkun Iotek Kot a kan Auseling Ngeni

Ika om lamalam a fen aiti ngonuk pwe kopwe eani ekkewe iotek ka kan amwochulukun, are om kopwe iotek ngeni ekkewe “aramasepin” are ngeni ekkewe lios, are om kopwe nounou ekkewe minen lamalam, awewe chok ren ewe rosario, eli le poputaan kopwe pireir ren om eani ewe sokkun iotek Jises a aiti ngenikich usun. Iwe nge, a kon lamot om kopwe silei Kot, weween, itan we, an kewe kokkot, me lapalapan kewe. Kopwe tongeni fori ena mettoch ren om kaeofichi ewe Paipel. (Jon 17:3) Chon Pwarata Jiowa ra tufichin alisuk ren ena mettoch me ina wesewesen ar mochen. Won unusen fonufan, ra fen alisi chommong, chommong aramas pwe repwe “neni o nengeni pwe Jiowa mi murinno”! (Kol Fel 34:8) Fansoun epwe lapelo om silei Kot, epwe pwal lapelo om mochen mwareiti i lon iotek. Iwe, lupwen epwe lapelo om akarap ngeni Jiowa lon ewe sokkun iotek mi pwarata sufol, epwe pochokkuleta om riri ngeni i.

Ina minne, a wor ewe kapasen pesepes ngeni meinisin mi eani ewe lamalam mi enlet ngeni Kot pwe repwe “iotek fansoun meinisin.” (1 Tesalonika 5:17) Kopwe pi pwe om kewe iotek repwe enletin tipeeu ngeni ewe Paipel me ewe emmwen seni Jises Kraist. Epwe ina usun om kopwe tongeni wesewesen silei pwe Kot epwe akauseling ngeni om kewe iotek.

[Sasing lón pekin taropwe 7]

Lupwen epwe lapelo sileiach usun Jiowa, epwe lapelo ach mochen iotek ngeni i seni letipach