Alukulukatiu Tipeeu Lon Ekkeei Ranin Le Sopwolon
“Oupwe chok forochu lapalapen ami manau pwe epwe fich ngeni ewe kapas allim. . . oupwe likiitu lon eu chok ngun, ren tipeeu chok oupwe achochofengen ren ach luku usun ewe kapas allim.”—FILIPI 1:27.
1. Ifa usun Chon Pwarata Jiowa ra sokko seni ewe fonufanen lukun?
IKKEEI ekkewe “ran le sopwolon.” Esor tipemwaramwar pwe “fansoun weires” a fen war. (2 Timoti 3:1-5) Lon ei “fansoun sopwolon,” fiti ekkewe watte fitikoko lein aramas, Chon Pwarata Jiowa ra wenewenen sokkolo pokiten ar kinamwe me tipeeu. (Taniel 12:4) Nge iteiten aramas mi choni familien ekkewe chon fel ngeni Jiowa won unusen fonufan a wor wisan, wisen an epwe achocho le alukulukatiu ena tipeeu.
2. Met Paul a makkei usun ach alukulukatiu tipeeu, me ifa ewe kapas eis sipwe kaeo usun?
2 Ewe aposel Paul a pesei chienan kewe chon Kraist pwe repwe alukulukatiu tipeeu. A iei usun makkeian: “Nge oupwe chok forochu lapalapen ami manau pwe epwe fich ngeni ewe kapas allimen Jises Kraist. Pun inaamwo ika upwe feiliu o kunakemi, are usap nonnom remi, nge upwe chok rong usumi pwe oua likiitu lon eu chok ngun, ren tipeeu chok oua achochofengen ren ach luku usun ewe kapas allim, o ami ouse niuokkus och ren ekkewe chon oput ami. Iwe, epwe chok oesini ngenir ar kiteter, nge ngenikemi ami manau. Iwe, nge ekkeei mettoch ra popu seni Kot.” (Filipai 1:27, 28) Makkeien Paul a affata pwe sipwe angangfengen lon wisach, wisen chon Kraist. Iwe, met epwe alisikich le alukulukatiu ewe tipeeu lefilach me chienach kewe chon Kraist lon ekkeei fansoun weires?
Alleasochis ngeni Letipen Lang
3. Inet me ifa usun ekkewe Jentail rese sirkumsais ra keran aewin wiliti noun Kraist chon kaeo?
3 Eu mettoch epwe alukulukatiu ach tipeeu, iei ach alleasochis ngeni letipen lang fansoun meinisin. Eli epwe wewe ngeni ach sipwe siwili ach ekiek. Nengeni mwo ekkewe chon Jus mi wiliti noun Jises Kraist chon kaeo. Lupwen ewe aposel Piter a keran aewin afalafal ngeni ekkewe Jentail rese sirkumsais lon 36 C.E., Kot a tinatiu ngun mi fel won chon ekkewe muun lukun, me ra papataiselo. (Fofor, sopwun 10) Nge me mwan, ekkewe chok Jus, ekkewe mi wiliti chon ewe lamalamen Jus, me chon Sameria ra fen wiliti noun Jises Kraist chon kaeo.—Fofor 8:4-8, 26-38.
4. Met Piter a apasa mwirin an awewei minne a fis ngeni Kornilios, me ena mettoch a efisata met sokkun sossot ngeni noun Jises kewe chon kaeo lon pekin Jus?
4 Lupwen ekkewe aposel me chiener kewe chon luku lon Jerusalem ra rong pwe Kornilios me pwal ekkoch Jentail ra wiliti chon kaeo, ra mochen rong ewe poraus seni Piter. Mwirin an awewei met a fis ngeni Kornilios me ekkewe ekkoch Jentail mi luku, ewe aposel a eani ei saingoon kapas: “Iwe, are Kot a fangelo ngeni ir [ekkewe Jentail mi luku] ewe chok liffang [ngun mi fel] a pwal fang ngenikich [chon Jus] mi luku ewe Samol Jises Kraist, io ngang pwe upwe tongeni pinei Kot?” (Fofor 11:1-17) Ina eu sossot ngeni chon Jus mi wiliti noun Jises Kraist chon kaeo. Repwe alleasochis ngeni letipen Kot me etiwa chon Jentail mi luku pwe repwe chiener chon luku? Are, epwe tongeni ngauolo ewe tipeeu lein noun Jiowa kewe chon angang won fonufan?
5. Met ekiekin ekkewe aposel me pwiir kewe usun an Kot etiwa ekkewe Jentail mi aier, me met sipwe tongeni kaeo seni ar na ekiek?
5 Ewe repot a apasa: “Lupwen ir [ekkewe aposel me ekkewe ekkoch brother] ra rong ei poraus, ra chok fanafanelo, o ra mwareiti Kot, ra apasa, ‘Iwe, Kot a pwal ngeni ekkewe Jentail aier ngeni manau.’” (Fofor 11:18) Ena ekiek a alikiitu me afeffeitai ewe tipeeu lein noun Jises kewe chon kaeo. Mwirin och fansoun mi moch, ewe angangen afalafal a lapalo lein ekkewe Jentail, are chon ekkewe muu, me an Jiowa feioch a nom won ena angang. Sipwe pwal tipemecheres lupwen a wor tingoren ach alillis ika epwe foruta eu minefoon mwichefel are lupwen epwe wor och siwil mi theocratic fan ewe emmwen seni an Kot ngun mi fel. Ach pwarata tipemecheres ren unusen letipach ngeni ekkewe minefon kokkot epwe apwapwai Jiowa me epwe alisikich le alukulukatiu ach tipeeu lon ekkeei ranin le sopwolon.
Kamwochunnuk won ewe Enlet
6. Ifa ukukun lamoten ewe enlet ngeni ewe tipeeu lein ekkewe chon fel ngeni Jiowa?
6 Pokiten sia nom lon ewe familien chon fel ngeni Jiowa, sia kan alukulukatiu tipeeu pun oukich meinisin sia “kait me ren Jiowa” me sia kamwochunnuk won ewe enlet mi pwapwalo seni. (Jon 6:45; Kol Fel 43:3) Pokiten minne sia eani afalafal a longolong won ewe Kapasen Kot, oukich meinisin sia kapas fan tipeeu. Sia kan etiwa ren pwapwa ewe mongoon ngun mi kawor seni Jiowa ren an nounou “ewe chon angang mi tuppwol me tipatchem.” (Mattu 24:45-47) Ach nonnom fan eu chok sokkun kokkotun kaeo a alisikich le alukulukatiu ach tipeeu won unusen fonufan.
7. Ika a weires ach sipwe weweiti och poraus, met sipwe fori, me met sisap fori?
7 Epwe ifa usun ika a weires ach sipwe weweiti are luku och poraus? Sipwe iotek fan iten tipatchem me sipwe kaeofichi ewe Paipel me nouch kewe puk, puken Chon Kraist. (Proverbs 2:4, 5; Jemes 1:5-8) Ach kapasfengen me emon elter epwe tongeni alisikich. Ika sisap tongeni weweiti ewe poraus, eli epwe murinno ach sipwe mwo likitalo ewe mettoch. Eli pwal och poraus usun ewe mettoch epwap katowu, iwe, minne sia weweiti epwe lapelo. Iwe nge, epwe mwaal ach sipwe sotuni le etipetipa pwal ekkoch lon ewe mwichefel pwe repwe fiti ach ekiek mi oro tokolo. Ena mettoch epwe efisata kinikinfesen, nge esap alukulukatiu tipeeu. A kon murinno ach sipwe “feffetal lon ewe enlet” me pesei aramas ar repwe pwal ina usun!—3 Jon 4.
8. A pung ach sipwe eani met sokkun ekiek usun ewe enlet?
8 Lon ewe aewin senturi, Paul a apasa: “Lon ei fansoun sia kuna usun chok nge lon kilas mi topotop, nge mwirin, sipwe kunafichi. Lon ei fansoun, ua silei chok ekkoch kinikin, nge mwirin, upwe sileifichi unusan, usun chok Kot a sileifichiei.” (1 Korint 13:12) Inaamwo ika ekkewe popun chon Kraist rese weweiti mettoch meinisin, nge ir mi chuen tipeeufengen. Iei a fen mwaren ffatolo ngenikich weween an Jiowa kewe kokkot me an we Kapas mi enlet. Ina popun, amwo sipwe meefi kilisou ren ewe enlet sia fen angei me ren ewe ‘chon angang mi tuppwol.’ Sipwe pwal kilisou pwe Jiowa a fen emmwenikich ren an we mwicheich. Inaamwo ika ese lollopok fansoun meinisin minne sia kakkaeo, nge sisaamwo echik are kaka lon pekin ngun fan eu. Nge nouch we Chon Mas, Jiowa, a fen atipeeufengennikich me tuttumunukich.—Kol Fel 23:1-3.
Aea ewe Chonau fan iten Minne mi Pung!
9. Ifa usun sipwe tongeni aea chonauach le alapalo tipeeu?
9 Eu mettoch mi lamot epwe afeffeitai tipeeu me ewe ngunun pwipwifengen, iei ach aea chonauach le apochokkula aramas. Ewe taropwe mi awewei minne a kapungulo fan iten ewe mettoch sirkumsais, ewe mi titiilo seni ewe mwichen sou pungupung lon ewe aewin senturi, ina eu minen apochokkul. Mwirin ar alleani, ekkewe chon kaeo lon pekin Jentail lon Antiok “ra pwapwa ren ekkewe kapasen apochokkul.” Jutas me Sailas, ekkewe mi uwei ewe taropwe seni Jerusalem, “ra afalafala pwiir kewe soulang ren chommong kapas, o ra pwal apochokkula ir.” Ese mwaal, an Paul me Parnapas nom ren chiener kewe chon luku lon Antiok a apochokkulereta. (Fofor 15:1-3, 23-32) Sipwe tongeni pwal ina usun lupwen sia kan chufengen lon ach kewe mwich fan iten chon Kraist me ‘apochokkula emon me emon leich’ ren ach fiffiti mwich me ach uwawu meefiach lon.—Ipru 10:24, 25.
10. Ren ach sipwe alukulukatiu tipeeu, met sipwe fori ika epwe wor chon esiit leich?
10 Iwe nge, aeamwaallin ewe chonau epwe tongeni angaua ach tipeeu. Ewe chon kaeo Jemes a makkei pwe “Chonmonguch mi eu kifetin inisich mi chok kisikis, nge a sikasini ekkewe mettoch mi lap. Ia lollon petewel a karelo ren eu ekkei mi kisikis!” (Jemes 3:5) Jiowa a oput ekkewe mi efisata kinikinfesen. (Proverbs 6:16-19) Ena sokkun kapas epwe tongeni efisata tipefesen. Iwe, epwe ifa usun ika epwe wor esiit, weween, an emon akkapi pwal emon are an turunufasei i? Ekkewe elter repwe sotuni le alisi ewe mi fofformwaal. Iwe nge, ika ewe chon esiit esap aier, epwe katowu pwe esap talo ewe kinamwe, kokkotoch me tipeeu lon ewe mwichefel. A iei usun makkeien Paul: “Oute chiechi ngeni emon mi iteni pwiich are a . . . lalengau . . . , ousap eti ekkeei sokkun aramas le mongo.”—1 Korint 5:11.
11. Pwata a lamot tipetekison ika sia fen apasa och mettoch mi efisata osukosuk lefilach me emon chienach chon luku?
11 Ach nemeniochu chonauach a kan alisikich le alukulukatiu tipeeu. (Jemes 3:10-18) Nge sipwe era pwe ach kapas a fen efisata fitikoko lefilach me emon chienach chon Kraist. Esap pung ach sipwe akkom mwokut le forata kinamwe lefilach me pwiich we, me omusomus ngeni ika epwe lamot ena? (Mattu 5:23, 24) Pungun pwe ach fori ena mettoch a wewe ngeni ach sipwe tipetekison, nge iei makkeien Piter: “Ami meinisin oupwe pwilitalong tipetekison lefilemi, pun Kot a u ngeni ir mi lamalam tekia, nge a fangelo chen ngeni ir mi tipetekison.” (1 Piter 5:5) Tipetekison epwe amwokutukich pwe sipwe ‘kukkutta kinamwe’ lefilach me pwiich kewe, iwe, sipwe pwarata ach kewe tipis me omusomus ngenir. Ina eu mettoch epwe alukulukatiu ewe tipeeu lon an Jiowa famili.—1 Piter 3:10, 11.
12. Ifa usun sipwe tongeni aea chonauach le alapalo me alukulukatiu ewe tipeeu lein noun Jiowa kewe aramas?
12 Sipwe tongeni alapalo ewe ngunun famili lein chon an Jiowa mwicheich ika sipwe aea chonauach fan iten minne mi pung. Pokiten a ina usun fofforun Paul, a tongeni eani ei kapasen achechem ngeni ekkewe chon Tesalonika: “Usun chok ami oua pwal silei pwe, usun chok emon sam ren noun kewe, am aia afalafalakemi emon me emon, o apochokkulakemi, pwal fonoukemi, pwe ami feffetal epwe fich ngeni Kot.” (1 Tesalonika 2:11, 12) Pokiten Paul a isetiu eu leenien appiru mi murinno fan iten ena mettoch, a tongeni pesei chienan kewe chon Kraist pwe repwe “oururu ekkewe mi letipechou.” (1 Tesalonika 5:14) Ekieki mwo ukukun watten ewe alillis sipwe tongeni awora ren ach aea chonauach le oururu, apochokkula, me achungu aramas. Ewer, a ifa murinnon “sokkun kapas mi fichiti eu me eu fansoun!” (Proverbs 15:23) Ena sokkun kapas a pwal afeffeitai me alukulukatiu ewe tipeeu lein noun Jiowa kewe aramas.
Okomusalo Tipisin Aramas!
13. Pwata sipwe omusomusfengen lefilach?
13 A lamot ach sipwe omusalo tipisin emon mi omusomus ngenikich ika sia mochen alukulukatiu ewe tipeeu lefilen chon Kraist. Nge fan fite sipwe omusalo tipisin emon? Jises a ereni Piter: “Sap minne tori fan fisu chok, nge, tori fan fiik me fisu.” (Mattu 18:22) Ika sisap omusalo tipisin aramas, ena mettoch epwe tongeni angaua pwisin manauach. Ifa usun? Iwe, oput me ach amwochu song epwe atai ach kinamwe. Ika aramas ra silei pwe sia sorosorongau me tipeforea, eli resap mochen chiechi ngenikich. (Proverbs 11:17) Ach amwochu song a ngau me ren Kot me epwe tongeni emmwen ngenikich tipis watte. (Lifitikos 19:18) Chechemeni pwe a tun uen Jon Papatais pokiten eu rau Erotias a ekiekieta, pun ena fefin mi ngau a “amwochu an song” ngeni.—Mark 6:19-28.
14. (a) Met Mattu 6:14, 15 a aiti ngenikich usun ach omusalo tipisin aramas? (b) Sipwe chok witi an emon omusomus ngenikich mwen ach sipwe tongeni omusalo tipisin?
14 Ekkeei kapas a nom lon ewe iotek Jises a eani minen kait: “Kopwe omusa senikem am tipis, pun am aua pwisin omusalo iteiten aramas mi tipis ngenikem.” (Luk 11:4) Ika sisap kan omusalo tipisin aramas, neman eu ran Jiowa Kot esap chuen omusalo ach kewe tipis, pwe iei alon Jises: “Are oupwe omusalo tipisin aramas, iwe, Sememi esap pwal omusalo tipisimi.” (Mattu 6:14, 15) Iwe, ika sia wesewesen mochen alukulukatiu ewe tipeeu lon ewe familien chon fel ngeni Jiowa, sipwe kan okomusalo tipisin aramas, me eli sipwe chok monukalo eu tipis mi fis neman pokiten chok an emon tumunungau nge esor och ekiek mi ngau ren. Iei alon Paul: “Oupwe songommangfengen lefilemi o omusomusfengen, are emon a tipi ngeni emon. Usun chok Jiowa a fen omusakemi, ami oupwe pwal omusomusfengen.” (Kolose 3:13) Lupwen sia kan okomusalo tipisin aramas, sia awora ach alillis le alukulukatiu ewe tipeeu mi auchea a nom ren an Jiowa mwicheich.
Tipeeu me Met Sipwe Pwisin Filata
15. Met a kan alisi noun Jiowa kewe aramas pwe repwe alukulukatiu tipeeu lupwen repwe pwisin apungalo och mettoch?
15 Kot a forikich fiti ewe tufichin ach sipwe pwisin filata fofforuch, nge ina eu liffang mi auchea me eu wis mi lapalap. (Tuteronomi 30:19, 20; Kalesia 6:5) Iwe nge, sia tufichin alukulukatiu ach tipeeu pun sia kan apwonueta ekkewe alluk me emmwen lon Paipel. Sia kan pippir lupwen sipwe filata fofforuch. (Fofor 5:29; 1 Jon 5:3) Sipwe era pwe a piita eu kapas eis usun ewe fofforun imulo seni kokkotun ekkewe muun fonufan. Sipwe tongeni filioch fan mirit ren ach chechemeni pwe esap kich “seni fonufan” me sia fen ‘amani nouch ketilas o awili ngeni pisekin ttu ppwul.’ (Jon 17:16; Aisea 2:2-4) Pwal usun chok, lupwen sipwe pwisin filata fofforuch usun ach riri ngeni ewe Muu, sia kan ekieki met ewe Paipel a apasa usun ach ngeni “Kot minne an Kot,” nge sia anomukich fan nemenien “ekkewe nemenem mi tekia” fan iten kokkotun fonufan. (Luk 20:25; Rom 13:1-7; Taitos 3:1, 2) Ewer, ach pippi an Paipel kewe alluk me emmwen lupwen epwe wor och mettoch sipwe pwisin apungalo epwe alukulukatiu an chon Kraist tipeeu.
16. Ifa usun sipwe tongeni alukulukatiu tipeeu lupwen sipwe apungalo och mettoch ese pung are mwaal me ren Paipel. Awewei mwo.
16 Sipwe tongeni alukulukatiu an chon Kraist tipeeu pwal mwo nge lupwen sipwe pwisin apungalo och mettoch ese pung are mwaal me ren Paipel. Ifa usun? Ren ach ekieki fan tong ir kewe mi tongeni kku manauer minne sipwe filata. Awewe chok, lon ewe mwichefel lon Korint lom, a piita eu kapas eis usun futuk mi asor ngeni ululun. Pungun pwe emon chon Kraist esap fiti och fofforun fel ngeni ululun. Iwe nge, esor tipisin an emon ochoch ena sokkun futuk mi kamolo lon leenien amomo ika a fen kusulo chchaan ewe man fan pungun allukun Paipel. (Fofor 15:28, 29; 1 Korint 10:25) Iwe nge, mwelien letipen ekkoch chon Kraist ra osukosuk usun an aramas ochoch ena sokkun futuk. Ina minne, Paul a pesei ekkewe ekkoch chon Kraist pwe resap isetiu och minen chepetek ngenir. Iei makkeian: “Are mongo epwe oturukapa pwii, iwe, usap chuen ochoch futuk feilfeilo chok, pun ute oturukapa pwii.” (1 Korint 8:13) Iwe, inaamwo ika esor och alluk are emmwen seni Paipel, nge epwe ifa watten ach tong ika sipwe ekieki chienach kewe lupwen sipwe pwisin filata fofforuch mi tongeni kku ewe tipeeu lon an Kot famili!
17. Met sipwe fori lupwen sipwe pwisin apungalo och mettoch?
17 Ika ese ffat met sipwe fori, sipwe mirit ika sipwe filata eu mettoch esap u ngeni mwelien letipach, iwe mwirin, chienach kewe repwe sufoluti met sia filata. (Rom 14:10-12) Pungun pwe lupwen sipwe pwisin filata fofforuch, sipwe kutta an Jiowa emmwen lon iotek. Usun chok ewe sou makkei kol fel, epwe tongeni an epwe iei usun ach iotek fan lukuluk: “Selingom epwe aueto rei . . . Ewer, en chok ai achau o ai imwen maun; kopwe emmweniei o awenaeilo fan asengesin itom.”—Kol Fel 31:2, 3.
Alukulukatiu An Chon Kraist Tipeeu Fansoun Meinisin
18. Ifa usun Paul a awewei ewe tipeeu lon ewe mwichefelin Kraist?
18 Lon 1 Korint sopwun 12, Paul a eani awewe won inisin aramas pwe epwe awewei ewe tipeeu lon ewe mwichefelin Kraist. A menlapei ewe riri lefiler me lamoten emon me emon leir. Paul a eis, “Are ekkewe kifetin meinisin repwe wiliti eu chok kifetin, iwe, ifa ewe inis? Nge a chok iei usun, kifetin inisich mi chommong, nge inisich mi eu chok. Foun mesach ese tongeni apasa ngeni pouch, ‘Esor lamotom rei,’ o pwal usun chok mokurach ngeni pechech, ‘Esor lamotemi rei.’” (1 Korint 12:19-21) Pwal usun chok, sap minne oukich meinisin lon ewe familien chon fel ngeni Jiowa sia kan fori eu chok sokkun angang. Iwe nge, sia tipeeu, me a lamot oukich meinisin.
19. Ifa usun sipwe tongeni kuna feioch seni minne Kot a awora lon pekin ngun, me met emon brother mi chinnap a apasa usun ena mettoch?
19 Usun an a lamot ngeni ewe inis mongo, tumun, me emmwen, iwe, a lamot ngenikich ekkewe alillis lon pekin ngun Kot a kan awora ngenikich seni an Kapas, an ngun mi fel, me an we mwicheich. Ren ach sipwe kuna feioch seni ekkena alillis, sipwe kapachelong lon an Jiowa famili won fonufan. Iei makkeien emon brother mwirin an angang ngeni Kot fitu ier: “Ua fokkun kilisou pwe ua fen manau lon ai silei an Jiowa kewe kokkot seni ekkewe ran lom ekis chok mwen 1914 lupwen ese kon lien ffat ekkewe poraus . . . tori ei ran lupwen ewe enlet a ttinoch usun ewe akkar me leoloken. Ika a fen wor eu mettoch mi kon lamot me rei, iei ewe mettoch ririoch ngeni an Jiowa mwicheich won fonufan. Minne kunaei me le poputaan a aiti ngeniei pwe a fokkun lukulukungau ach sipwe eani lukuluk won ekiekin aramas. Lupwen a pposolo ai ekiek won ena mettoch, ua achocho ngeni ai upwe pachoch ngeni ewe mwicheich mi tuppwol. A wor ita pwal eu mettoch me lukun epwe tongeni atoto an Jiowa chen me feioch?”
20. Sipwe appwosalo letipach le fori met usun ach tipeeu pokiten kich noun Jiowa aramas?
20 Jiowa a fen korawu noun kewe aramas seni ewe fonufan mi kiroch me tipefesen. (1 Piter 2:9) A fen efisata tipeeu lefilach me i me pwal lefilach me chienach kewe chon luku. Ena tipeeu epwe nom lon ewe otot sefo mi arapoto. Ina popun, lon ekkeei sopwolon ran mi kkolo ngauan, sipwe ‘akaufoufa ngenikich tong’ me achocho ren unusen ach tufich le alapalo me alukulukatiu ach tipeeu mi auchea.—Kolose 3:14.
Ifa Usun Om Kopwe Polueni?
◻ Pwata ach foffori letipen Kot me ach kamwochunnuk won ewe enlet epwe alisikich le alukulukatiu tipeeu?
◻ Ifa usun tipeeu a kan chu ngeni ach aea chonauach fan iten minne mi pung?
◻ Met sokkun mettoch a pacheri ewe fofforun omusalo tipisin aramas?
◻ Ifa usun sipwe tongeni alukulukatiu tipeeu lupwen sipwe pwisin filata fofforuch?
◻ Met popun sipwe alukulukatiu ewe tipeeu lefilen chon Kraist?
[Sasing lón pekin taropwe 14]
Usun an ei chon masen siip tumunu pwe esap toropaselo noun kewe siip, a ina usun an Jiowa atipeeufengenni noun kewe aramas
[Ekkewe sasing lón pekin taropwe 16]
Ren ach omusomus fan tipetekison lupwen sia tipis ngeni emon, sia kan alapalo tipeeu