Ewe Alluk Mwen Kraist

“Ifa lapalapen ai aucheani om alluk! Ua chok ekieki usun ran meinisin.”​—KÖLFEL 119:97.

1. Met a nemeni mwokutukutun ekkewe pisekin lang?

SENI le kukkunun, neman Job a mairu ren an nennetai ekkewe fuu. Meni seman me inan ra aiti ngeni iten ekkewe mwichen fuu mi lapalap me minne ra silei ussun ekkewe alluk mi nemeni mwokutukutun ekkewe mwichen fuu lon lang. Popun, pun ekkewe chon lom ra nengeni mwokutukutun ekkewe watten tettelin fuu mi lingoch fan iten ar repwe silei siwilin eu me eu fansoun. Nge inaamwo ika Job a nengeni fan chommong ekkena fuu fan an mairu, nge ese silei met sokkun manaman mi fokkun lapalap mi amwochufengenni ekkena mwichen fuu lon en me leenian. Ina minne, esap tongeni polueni Jiowa Kot lupwen a eisini i: “Ka fen weweiti ewe alluk won mettochun lang?” (Hiop 38:31-33, The New Jerusalem Bible) Ewer, ekkewe fu ra nom fan nemenien alluk, nge ekkena alluk ra kon titchik me alollol pwe ekkewe sou ekiek ikenai rese weweiti mettoch meinisin ussur.

2. Met popun sipwe tongeni apasa pwe forien Kot kewe meinisin ra nom fan nemenien alluk?

² Jiowa ewe Sou Foratiu Alluk, nge a lap seni meinisin lon unuselapen lang me fonufan. An kewe angang meinisin ra nom fan alluk. Noun we mi achengicheng, “ewe mwanichien forien Kot kewe meinisin,” a tuppwol le alleasochisi allukun Seman we mwen forutaan ekkewe masouen lang! (Kolose 1:15) Ekkewe chonlang ra pwal nom fan nemenien alluk. (Kol Fel 103:20) Pwal mwo nge ekkewe man ra nom fan nemenien alluk fansoun ar ra alleasochisi ekkewe alluk ewe Chon Forir a fen foratiu lon inisir.​—An Salomon Fos 30:24-28; Jeremaia 8:7.

3. (a) Met popun a lamot ngeni aramas alluk? (b) Met Jiowa a aea le nemeni ewe muun Israel?

³ Nge, ifa ussun aramas? Inaamwo ika sia feioch pokiten a nom rech ekkeei sokkun liffang, awewe chok ren mirit, mwelien letipach, me ach aucheani mettochun ngun, nge mi chuen lamot ngenikich ekkewe allukun lang pwe repwe emmwenikich le aeaochu ekkena tufich. Popuch kewe, Atam me If, ra unusoch, ina minne, ekkoch chok alluk a lamot ngenir fan iten emmwen. Tong ngeni Semer we lon lang epwe ita awora ngenir eu watten popun ar repwe alleasochis fan pwapwa. Nge ra alleasolap. (Keneses 1:26-28; 2:15-17; 3:6-19) Ina minne, mwirimwirir kewe, ir chon tipis, iwe, a lamot ngenir chommong alluk fan iten emmwen. Mwirin och fansoun, Jiowa a awora met a lamot ngenir pokiten an tong. A ngeni Noa alluk mi titchik, iwe mwirin, epwe aiti ngeni chon an famili. (Keneses 9:1-7) Fitupuku ier mwirin, ren an nounou Moses, Kot a ngeni ewe minefoon muun Israel eu tettelin Alluk mi makketiu me a pwal titchik. Ina ewe aeuin fansoun an a keran fis an Kot nemeni unusen eu muu ren alluk mi fel. Ach kaeo ena Alluk epwe alisikich pwe sipwe weweiti watten lamoten alluk mi fel ngeni manauen chon Kraist ikenai.

Ewe Allukun Moses​—An we Kokkot

4. Pwata epwe weires ngeni mwirimwirin Eperiam kewe mi filita ar repwe aupuatiu ewe Mwirimwir mi pwonetiu?

⁴ Ewe aposel Paul, emon chon kaeo alollolun ewe Alluk, a kapas eis: “Iwe, met lamoten ewe Alluk?” (Kalesia 3:19) Ren poluan, a lamot ach sipwe chechemeni pwe Jiowa a pwon ngeni chienan we Eperiam pwe epwe wor emon mwirimwirin lon tettelin an epwe atoto feioch lapalap ngeni muu meinisin. (Keneses 22:18) Nge iei och osukosuk: Sap minne mwirimwirin Eperiam kewe meinisin mi kefilita, ekkewe chon Israel, ra tongei Jiowa. Mwirin och fansoun, a kon lap me leir ra pwarata pwe ra lukumach me tipeforea, me a ussun ita nge ekkoch ra rrech! (Ekistos 32:9; Tuteronomi 9:7) Ren chokena, ar nom lein noun Kot kewe aramas a fis pokiten chok uputiuer, nge esap pokiten ina filier.

5. (a) Met Jiowa a aiti ngeni ekkewe chon Israel ren an ngenir ewe Allukun Moses? (b) Ewe Alluk a for lon met sokkun anapanap pwe epwe emmweni fofforun ekkewe mi nom fan?

⁵ Ifa ussun ekkena sokkun aramas repwe tongeni foratiu ewe Mwirimwir (Seed) mi pwonetiu me kuna feioch seni? Sap minne Jiowa a nemenir ussun ita nge ir mwesin, nge a emiritir ren an awora alluk. (Kol Fel 119:33-35; Aisea 48:17) A enlet pwe ewe kapasen Ipru fan iten “alluk,” toh·rahʹ, a wewe ngeni “minen kait.” Met a aiti ngenir? A akkaeuin aiti ngeni ekkewe chon Israel pwe a lamot ngenir ewe Messaia, pun ena emon epwe angaserelo seni fotekin tipis. (Kalesia 3:24) Ewe Alluk a pwal aiti ngenir pwe repwe niuokkusiti me alleasochisi Kot. Ekkewe chon Israel repwe chon pwarata fan iten Jiowa ngeni ekkewe muu meinisin, nge ina eu mettoch mi tipeeu ngeni ewe pwon ngeni Eperiam. Ina minne, ewe Alluk epwe wisen aiti ngenir eu kokkot mi tekia me auchea fan iten foffor murinno me mwareiti Jiowa, nge epwe pwal alisi Israel pwe epwe imulo seni ekkewe foffor ese pwung mi nom ren ekkewe muun lukun.​—Lifitikos 18:24, 25; Aisea 43:10-12.

6. (a) A wor fitu alluk lon ewe Allukun Moses, me pwata esap kon chommong ena ukukun? (Nengeni ewe footnote.) (b) Met sipwe mirititi seni ach kakkaeo ewe Allukun Moses?

⁶ Ina minne, sise mairu ren ach kuna pwe a wor chommong alluk lon ewe Allukun Moses pun a wor lap seni 600 alluk lon.a Ena tettelin alluk mi makketiu a weneiti ekkewe mettoch lon pekin lamalam, nemenem, foffor murinno, kapwung, pwal mwo nge mongo me limochun inis. Iwe nge, a ita wewe ngeni pwe ewe Alluk a chok masou ren ekkewe chok sokkun alluk mi kon eipo me tuwenewen? Apwi, esap fokkun ina! Ach kaeo ena Alluk mi tettelitiu epwe suuki mesach ngeni lapalapen Jiowa kewe mi pwarata tong. Nengeni mwo ekkoch poraus awewe.

Eu Alluk mi Pwarata Umoumoch me Tong

7, 8. (a) Ifa ussun ewe Alluk a itelapei umoumoch me kirokiroch? (b) Ifa ussun Jiowa a pwarata umoumoch lupwen a apwonueta pwungun ewe Alluk ngeni Tafit?

⁷ Ewe Alluk a menlapei umoumoch me tong, akkaeuin fan iten ekkewe mi tekisosson are ekkewe mi osupwang. Ekkewe fefin mi ma senir puluwer me ekkewe semirit mi masen ra akkaeuin kuna tummun. (Ekistos 22:22-24) Ekkewe man fan iten angang ra kuna tumun seni kirikiringau. Ekkewe alluk ra tumunu pisekin me fonuen aramas. (Tuteronomi 24:10; 25:4) Ikaamwo ewe Alluk a era pwe chon nnielo aramas repwe nninnilo, nge a awora umoumoch ika emon epwe nnielo emon nge a fis pokiten accident. (Numperis 35:11) Neman ekkewe sou kapwung lon Israel repwe tongeni pwisin filata liwinin ekkoch sokkun tipis, nge minne repwe apwungalo epwe longolong won sorosorun ewe chon tipis.​—Alollo ngeni Ekistos 22:7 me Lifitikos 6:1-7.

⁸ Jiowa a isetiu eu leenien appiru fan iten ekkewe sou kapwung ren an tipeppwos le apwonueta pwungun ewe Alluk lon fansoun mi fich ngeni, nge a pwarata umoumoch ika pwe mi tufich ena. King Tafit a liwowu mwaal me a tipisin nni manau, nge a kuna umoumoch. Sap minne ese kuna liwinin tipisin, pun Jiowa ese ttielo seni liwiningauen an kewe tipis. Iwe nge, pokiten ewe pwon fan iten ewe Muu me pwal pokiten Tafit emon mwan mi umoumoch me a aier seni alollolun letipan, iwe, ese ninnilo.​—1 Samuel 24:4-7; 2 Samuel 7:16; Kol Fel 51:1-4; Jemes 2:13.

9. Ifa ukukun lamoten tong lon ewe Allukun Moses?

⁹ Pwal och, ewe Allukun Moses a menlapei tong. Epwe eu minen amairu ika eu muu ikenai epwe eani eu tettelin alluk mi apasa pwe aramas repwe pwarata tong! Ina popun, sap minne ewe Allukun Moses a chok pinei nni manau, nge a pwal apasa: “Kopwe tongei chon orum usun chok pwisin en.” (Lifitikos 19:18) Sap minne a chok pinei kirikiringau ngeni chon ekis, nge a pwal apasa: “Kopwe acheni i ussun pusin om echenuk, pun ami oua fen pin wasola lon ewe fonu Isip.” (Lifitikos 19:34) Sap minne a chok pinei lisou-mwaal; nge a pwal alluku ngeni ewe mwan pupulu pwe epwe efisata chengelin puluwan! (Tuteronomi 24:5) Lon ewe chok puken Tuteronomi, ekkewe kapasen Ipru mi weneiti ewe lapalap itan tong a mak fan 20. Jiowa a affata ngeni ekkewe chon Israel pwe a tonger fansoun meinisin, seni lom lom tori ekkewe fansoun mwer. (Tuteronomi 4:37; 7:12-14) A enlet pwe iei ewe alluk mi lapalap seni meinisin lon ewe Allukun Moses: “Kopwe echeni Jiowa om Kot ren unusen lelukom, ren unusen ngunum, pwal ren unusen tufichum.” (Tuteronomi 6:5) Jises a apasa pwe unusen ewe Alluk a alongolong won ena alluk, fitifengen me ewe alluk mi apasa pwe repwe tongei chon orur kewe. (Lifitikos 19:18; Mattu 22:37-40) Ina ewe popun ewe sou mak kol fel a makkei: “Ua fokkun aucheani om alluk, ua ekinlonei fansoun meinisin.”​—Kol Fel 119:97.

Aeamwaallin ewe Alluk

10. A kon lap me lein ekkewe chon Jus ar ra fetei ewe Allukun Moses?

¹⁰ A fokkun alolilen pwe lap ngeni chon Israel meinisin rese aucheani ewe Allukun Moses! Ekkewe aramas ra alleasolapa, tunalo, are monukalo ewe Alluk. Ra alimengaua fel mi pin ren ar foffori foforun lamalamen ekkewe ekkoch muu mi anioput. (2 Kings 17:16, 17; Kol Fel 106:13, 35-38) Iwe, ra pwal amam ewe Alluk lon pwal ekkoch lapalap.

11, 12. (a) Ifa ussun ekkewe mwichen sou emmwen lon pekin lamalam ra angaua ewe Alluk mwirin ranin Esra we? (b) Pwata ekkewe rappai me lom ra meefi pwe mi lamot ar repwe “ttitti ewe Alluk”?

¹¹ Ekkewe mi apasa pwe ir sense fan iten ewe Alluk me ir chon tumunuochu masouan ra wesewesen angaua ewe Alluk. Ena mettoch a fis mwirin ranin ewe sou mak mi tuppwol itan Esra mi tuppwol lon ewe animuen senturi B.C.E. Esra a pochokkul le fiu ngeni ekkewe mettoch mi limengau seni ekkewe muun lukun me a menlapei lamoten an aramas alleani me kaeo ewe Alluk. (Esra 7:10; Nehemia 8:5-8) Ekkoch senseen ewe Alluk ra apasa pwe ra appiru Esra me ra forata minne aramas ra eita ngeni ewe “Sinakok mi Lap.” Ei emmwen a nom lein ekkewe mwiitun a kan eani: “Ttitti ewe Alluk.” Ekkena sense ra ekieki pwe ewe Alluk a usun eu atake mi auchea. Ren an esap wor emon epwe tomwaalilong lon ena atake ren an ipweri an kewe alluk, ra forata pwal ekkoch alluk, weween, ewe “Alluk mi Popu Seni Auen Aramas,” pwe repwe pinei aramas seni ar repwe kine ngeni ekkewe fofformwaal.

¹² Eni ekkoch repwe apasa pwe mi pwung ngeni ekkewe sou emmwen lein ekkewe chon Jus ar repwe eani ena memmeef. Mwirin ranin Esra, ekkewe chon Jus ra nom fan nemenien ekkewe muun lukun, akkaewin, muun Kris. Ren ar repwe pinei katolongen ekiekin me eorenien chon Kris, ekkewe sou emmwen lon pekin lamalam ra uta lein ekkewe chon Jus lon en me mwichan. Feil, feil, ekkoch me lein ekkena mwich ra lollo ngeni are pwal lap seni ekkewe samol-felin Lifai le asukula ngeni aramas ewe Alluk. (Alollo ngeni Malakai 2:7.) Iwe, lupwen a tori 200 B.C.E., ewe alluk mi popu seni auen aramas a fen poputa le tolong lon manauen chon Jus. Akkom, esap mak ekkena alluk, pwe aramas resap ekieki pwe ra lollo ngeni ewe Alluk mi makketiu. Nge ekis me ekis, an aramas ekiek a akkomelo mwen ekiekin lang, ina minne, ewe “ttit” a aingaua minne epwe ita tumunu, weween, ewe “atake.”

Limengauen Pekin Farisi

13. Ifa ussun ekkoch sou emmwen lon ewe lamalamen Jus ra pwisin efisata ewe ekiek pwe mi pwung an epwe foruta chommong alluk?

¹³ Ekkewe rappai ra ekieki pwe pokiten ewe Torah, are ewe Allukun Moses, a unusoch, iwe, epwe tufichin polueni sokkun kapas eis meinisin epwe tongeni piita. Nge ena ekiek ese pwarata sufol. Ren enletin, a mut ngeni ekkewe rappai ar repwe eani ekiekin aramas pwe epwe ussun ita nge ewe Kapasen Kot, iei longolongun ekkewe alluk won sokkopaten lapalap meinisin, nge ekkoch leir pukun nemenien aramas, me pwal ekkoch mi chok lamot kisikis.

14. (a) Ifa ussun ekkewe sou emmwen lon ewe lamalamen Jus ra wasi an Paipel alluk ussun an chon Jus imulo seni ekkewe muun lukun tori an a lu seni minne Paipel a apasa? (b) Met a pwarata pwe ekkewe alluk, forien ekkewe rappai, rese tumunu ekkewe chon Jus seni etipetipaen ekkewe chon lukun?

¹⁴ Fan chommong ekkewe nouwisen lamalam ra kon eipo le awewei ekkewe allukun Paipel. Awewe chok, ewe Allukun Moses a affata pwe ekkewe chon Jus repwe imulo seni ekkewe muun lukun, nge ekkewe rappai ra eani afalafal ewe sokkun oput ese pwung fan iten mettoch meinisin lukun ewe muun Jus. Ra afalafal pwe emon chon Jus esap anomu noun kewe kou ren eu leenien wasola, minne an emon chon Jentail, pwe ekkewe Jentail “lisowu ngeni man.” Ese mutata ngeni emon fin Jus an epwe alisi emon fin Jentail mi metekin nounou pun neminewe epwe “awora an alillis le anounou emon monukol mi uputiu fan iten fofforun fel ngeni ululun.” Pokiten ir mi meefi pwe mi ngau an chok Kris kewe leenien urumot, ekkewe rappai ra pinei meinisin taiso fan iten urumot. Porausen uruwo a anneta pwe ekkena mettoch rese tumunu chon Jus seni minne chon Jentail ra luku. A enlet pwe ekkewe Farisi ra eani afalafal pwe ngunun aramas ese tongeni malo, nge ina eu afalafal mi popu seni chon Kris!​—Isikiel 18:4.

15. Ifa ussun ekkewe sou emmwen lon ewe lamalamen Jus ra amwaalli ekkewe alluk fan iten alimelim me weyingau?

¹⁵ Ekkewe Farisi ra pwal amwaalli ekkewe allukun limelim. Aramas ra era pwe ekkewe Farisi repwe pwal alimochu ewe akkar ika pwe mi tufich ar repwe fori ena mettoch. Ar alluk a era pwe emon epwe limengauolo ika epwe mmang le feilo ren ewe imwen ngaselo! An aramas tolu pour a wiliti och foffor mi pin, pwe a wor alluk fan iten menni pau epwe akkom tottol me ifa ussun an epwe tottol. A wor ewe ekiek pwe a akkaeuin limengau fefin. Fan iten ewe allukun Paipel mi apasa pwe emon esap “kan ngeni” mararin (nge ina wesewesen eu alluk ussun weyingau), ekkewe rappai ra alluku pwe emon mwan esap tongeni fetal lukisokurun chon imwan me esap fos ngeni neminewe lon leenien amomo.​—Lifitikos 18:6.

16, 17. Ifa ussun ewe alluk mi popu seni aramas a wasi ewe alluk ussun pinin ewe Raninfel, me met a fisilo mwirin?

¹⁶ A akkaeuin ngau ifa ussun ewe alluk seni auen aramas a amwaalli ewe allukun Raninfel. Kot a ngeni Israel ei alluk mi ffatoch: Ousap fori och angang lon ewe afisuen ran. (Ekistos 20:8-11) Iwe nge, ewe alluk seni auen aramas a awewei 39 sokkun angang mi pinipin, me a kapachelong an emon pukei are epichi och pukopuk, an tei och mettoch, an makkei ruuefou mesen maken Ipru, me met kewe. A pwal wor chommong alluk fan iten eu me eu ekkena sokkun angang. Met sokkun pukopuk a pinepin me met sokkun a mumuta? Ewe alluk seni auen aramas a foratiu alluk mi popu seni chok mefien aramas. A pinepin ewe fofforun achikara ir mi semmwen. Awewe chok, mi pinepin an emon seneti efoch chuu mi kup lon Raninfel. Emon mwan mi metek niin epwe tongeni aea finikar lon anan mongo, nge esap tumuri ewe finikar lefilen niin kewe pwe ete molo metekin niin! Pokiten an a ireirelo fan fitepuku alluk, forien aramas, a morolo aucheaan ewe allukun Raninfel ngeni ekkewe chon Jus. Lupwen Jises Kraist, “Samolun ewe sabbath,” a fori manaman mi fokkun amwarar me attong lon ewe Sabbath, ese kku letipen ekkewe soumak me Farisi. Ra chok ekieki pwe a ussun ita nge atewe a tunalo ar kewe alluk.​—Mattu 12:8, 10-14.

¹⁷ Iwe, ren an topotopelo pokiten ekkewe fitepuku allukun aramas, a pout seni lap ngeni chon Jus meinisin weween ewe allukun Raninfel lon pekin ngun. Lupwen Jises Kraist, “Samolun ewe raninfel,” a forata manaman mi fokkun amwarar me apwapwa lon Raninfel, ekkewe soumak me Farisi rese mefi och. Ra ekieki chok pwe usun ita nge Jises a tunalo ar kewe alluk.​—Mattu 12:8, 10-14.

Ach Miritilo Seni Umwesin ekkewe Farisi

18. Met a fis pokiten an a pacheta ngeni ewe Allukun Moses ekkewe alluk mi popu seni aramas me ekkewe eoreni? Awewei mwo.

¹⁸ Sipwe tongeni apasa pwe ekkena alluk me eoreni aramas ra forata ra pacheri ewe Allukun Moses ussun chok an ekkewe poon monuch pacheri epin efoch sip. Minne waan ewe sip a achocho le minalo ekkena man seni ewe sip pun ewe waa a kan mangolo rer me ra atai peinitin. Pwal ussun chok, ekkewe alluk aramas ra forata me ekkewe eoreni ra chounatiu ewe Alluk me ra mut ngeni an aramas angaua are aeamwaalli ewe Alluk. Iwe nge, ekkewe rappai rese minalo ekkena alluk aramas ra forata, nge ra pacheta pwal chommong. Atun ewe Messaia a war pwe epwe apwonueta ewe Alluk, ewe ita “sip” a kon choutiu ren ekkewe “poon monuch”, ina minne, a ussun ita nge epwe kokolo! (Alollo ngeni An Salomon Fos 16:25.) Ekkena sou emmwen lon lamalam rese tuttumunu ewe Alluk mi longuni eu pwon, nge ra umwesin amam ewe Alluk. Iwe nge, met popun ewe “tittin alluk” ra forata ese tumunu ewe Alluk?

19. (a) Pwata ewe “ttit mi pwelli ewe Alluk” ese tumunu ewe Alluk? (b) Met a pwarata pwe ekkewe sou emmwen lon ewe lamalamen Jus ra nafangau ren luku mi enlet?

¹⁹ Ekkewe sou emmwen lon ewe lamalamen Jus rese weweiti pwe ewe maun ngeni mettoch mi ngau a kan fis lon ewe letip nge esap lon ekkewe pekin taropwe lon ekkewe puken alluk. (Jeremaia 4:14) Tong a akkufu mettoch mi ngau, weween, tong ngeni Jiowa, ngeni an alluk me ngeni an kewe emmwen mi pwung. Ena sokkun tong a efisata an aramas oput minne Jiowa a kan oput. (Kol Fel 97:10; 119:104) Ekkewe mi eani letip mi ur ren tong ra kan likiitu lon ar tuppwol ngeni an Jiowa kewe alluk lon ei fonufan mi ngau. Ekkewe sou emmwen lon ewe lamalamen Jus ra wiseni ewe wis mi lapalap, wisen ar repwe emiriti aramas, weween, repwe apochokkulereta me amwokutur pwe repwe amarata ena tong. Pwata rese apwonueta wiser? Neman a nafangau ar luku. (Mattu 23:23, footnote) Ika ra fen luku pwe manamanen an Jiowa we ngun mi fel epwe tufichin amwokutu letipen aramas mi tuppwol, iwe, resap meefi pwe mi lamot repwe pochokkul le nemeni manauen aramas. (Aisea 59:1; Isikiel 34:4) Pokiten a nafangau ar luku, rese apochokkula lukuen aramas, nge ra chounatiu aramas ren ar wata wor chommong alluk, forien aramas.​—Mattu 15:3, 9; 23:4.

20, 21. (a) Met a fis ngeni ewe lamalamen Jus pokiten an aramas akkomwa ekkewe eoreni? (b) Ifa ewe lesen sia kaeo seni minne a fis ngeni ewe lamalamen Jus?

²⁰ Ekkena sou emmwen lon pekin Jus rese amarata tong. Ar kewe eoreni ra efisata eu lamalam mi kon tinikken fan iten minne epwe pwa ngeni mesen aramas, iwe, aramas ra kan alleasochis fan iten chok lapalaper me lukun, nge ina eu mettoch mi efisata foffor mi likotupotup. (Mattu 23:25-28) Ar kewe alluk ra efisata chommong popun ar repwe apungu aramas. Ina minne, ekkewe Farisi mi lamalam tekia me tipemmong won nemenem ra meefi pwe mi pwung ar repwe akkapii Jises Kraist. A namelo senir popunlapen an a kawor ewe Alluk me ra u ngeni ewe emon chok Messaia mi enlet. Iwe, mwirin, iei alon Jises ngeni ewe muun Jus: “Nengeni! Imwemi we a poutulo senikemi.”​—Mattu 23:38; Kalesia 3:23, 24.

²¹ Ifa ewe lesen ngenikich? A ffat pwe ewe sokkun ekiek mi kon eipo me tinikken fan iten eoreni ese kan apochokkula ewe lamalam mi enlet ngeni Jiowa! Nge a ita wewe ngeni pwe esap wor alluk ngeni ekkewe chon fel ngeni Jiowa ikenai ika pwe ese affatetiu lon ewe Paipel mi Fel? Aap. Ren poluen ena kapas eis, sipwe pi ifa ussun Jises Kraist a akkasiwili ewe Allukun Moses me eu minefoon alluk mi murinno seni.

[Footnote]

En mi Tongeni Awewei?

◻ Ifa ussun mettoch meinisin mi foruta ra nom fan allukun Kot?

◻ Ifa popunlapen an a kawor ewe Allukun Moses?

◻ Met a pwarata pwe ewe Allukun Moses a itelapei umoumoch me kirokiroch?

◻ Pwata ekkewe sou emmwen lon ewe lamalamen Jus ra pacheta chommong alluk ngeni ewe Allukun Moses, iwe, met a fisilo mwirin?