Ifa Usun Aramas Repwe Wiliisefallilo Ngeni Susuun Ppwul?
“EN SUSUUN PPWUL me kopwe wiliisefallilo ngeni susuun ppwul.” Lupwen ewe akkaemonun mwan, Atam, a rong ekkena kapas, a silei met epwe fis ngeni. A fen for seni susuun ppwul me epwe wiliisefallilo ngeni chok susuun ppwul. Epwe malo pun a fen alleasolap ngeni ewe Emon mi fori i, Jiowa Kot.—Keneses 2:7, 15-17; 3:17-19.
Ewe Paipel a affata pwe aramas ra for seni susuun ppwul. Iei pwal alon: “Ewe aramas (ngun) mi tipis, pwisin i epwe malo.” (Isikiel 18:4; Kol Fel 103:14) Malo a fen efisata letipeta ngeni chommong, chommong aramas, me fan chommong, a efisata kapas eis ussun met aramas repwe fori ngeni inisin ekkewe mi malo.
Fofforun Chon Lom me Fofforun Aramas Ikenai
Lom, lom, met noun Kot kewe aramas ra fori ngeni inisin ekkewe mi malo leir? Seni le poputaan, ewe Paipel a kapas ussun ekkoch sokkun mettoch ra fori ngeni inisin ekkewe mi malo, me a pachelong ar peiasenir fan ppwul. (Keneses 35:8) Ewe semelap Eperiam me puluwan we, Sara, pwal nour we itan Aisek me noun Aisek we itan Jekop ra peias lon ewe pwang lon achau itan Machpelah. Keneses 23:2, 19; 25:9; 49:30, 31; 50:13) Ekkewe sou kapwung lon Israel iter Kition me Samson ra peias ‘lon leenien peiasen semelaper kewe.’ (Judges 8:32; 16:31) Ena poraus a mwaren pwarata pwe lein noun Kot kewe aramas lom lom ra kan filata leenien peias fan iten unusen ar kewe famili. Lupwen Jises Kraist a malo lon ewe aewin senturi C.E., aramas ra anomu inisin lon eu minefon peias mi ttu lon achau. (Mattu 27:57-60) Iwe, ekkewe soma ra kan peias fan ppwul are lon pwangen achau. A kon lap me lein aramas ar ra chuen foffori ena mettoch ikenai.
Iwe nge, lon ekkoch leeni ikenai, pokiten a nafangau me liwinimmong fonu, a weires an aramas kunakun leenien peias. Ina minne, ekkoch aramas ra kan ekieki ika met repwe tongeni fori ren ekkewe soma.
A kan lapalo an aramas atoropasa ewe susuun ekkei mwirin ar keni ekkewe soma. Lon England, a ina ussun ar fori ngeni orun 40 percentin ekkewe meima. Lon Sweden, ikewe a kan kek lap seni 80 percentin ekkewe meima ie, a kaimulo ekkoch leeni fan iten an aramas atoropasa susuun ekkewe soma ie. Iwe, lon Shanghai me pwal fitu telinimwen China mi nom oroseet, ekkewe muu ra kan filata fitu fansoun iteiten ier fan iten an aramas atoropasa susuun ekkewe soma le seet.
Ia aramas repwe tongeni atoropasa susuun soma ie? Sap lon leeni meinisin, ese lifilifil. Eli ekkoch ra niuokkus pwe an aramas atoropasa susuun soma epwe alimengaua fonuer. Iwe nge, ren enletin, ekkewe monun samau meinisin ra kan malo lupwen a kek ewe soma. Ekkoch leenien peias lon England me pwal lon ewe United States ra kan aimulo ekkoch leeni mi wor sipa are ira ling ie fan iten toropaseloon susuun soma ie. Pwungun pwe chon Kraist ra akkaewin ekieki met Paipel a apasa ussun an aramas keni ekkewe soma me ar atoropasa ewe susu.
Met Paipel a Apasa Ussun?
Lon eu apwung ngeni “ewe kingen Papilon,” iei makkeien ewe soufos Aisea: “Ka fen koturulo nge esor eu leenien peias fan asengesum.” (Aisea 14:4, 19) Toropaseloon ewe susuun soma epwe ita ussun ena sokkun lapalap mi asau? Aapw, pun ena poraus ese kapas ussun an aramas keni ekkewe soma me ar isoni are atoropasa ewe susu mwirin.
Iei alon Jises Kraist lupwen a kapas ussun manausefallin ekkewe mi malo an epwe fis atun ewe Engerou Ierin an Nemenem: “Meinisin mi nom lon ekkewe leenien peias repwe rong leuwei, iwe, repwe towu.” (Jon 5:28, 29) Iwe nge, esor lamoten an epwe wor wesewesen eu peias fan iten an emon epwe tufichin manausefal pwe ena mettoch a ffatolo ren pwal eu oesini mi awewei ewe manausefal. Iei alon Pwarata 20:13: “Iwe, ewe matau a fangeta ekkewe mi malo mi nonnom lon i, o malo me Eitis ra fangeta ekkewe mi malo ra nonnom lon ir.” Iwe, ese lamot ikewe emon aramas a malo ie are ifa ussun an ‘wiliisefallilo ngeni susu.’ Iwe nge, a lamot ika Kot epwe chechemeni me amanauasefalli ewe emon. (Job 14:13-15; alollo ngeni Luk 23:42, 43.) Sap minne a lamot ngeni Jiowa ekkewe leenien peias mi lingoch fan iten an epwe chechemeni aramas. Ewe fofforun keni ekkewe soma esap pinei ir seni ar repwe manausefal. Ika aramas repwe atoropasa susuun ekkewe soma fan och popun mi pwung me esap fiti fofforun ekkewe lamalam chofona, iwe, sap minne epwe u ngeni Paipel.
A lamot ngeni ekkewe mi filata pwe repwe atoropasa susuun soma ar repwe pi allukun fonuer. Epwe pwal murinno ar repwe ekieki mefien aramasen ewe meima me ekkewe ekkoch. Epwe murinno ngeni noun Jiowa kewe chon angang ar repwe tumunu pwe ar fori minne Paipel a mut ngenir esap angaua itochun chon Kraist. A akkaewin lamot ena lon ekkewe fonu mi mutata an aramas keni me a toropasa susuun ekkewe soma fan pwungun alluk, iwe nge, aramas rese unusen tipeeu ngeni ena foffor. Pwungun pwe chon Kraist repwe tumunu pwe resap fiti ekkewe foffor are eoreni mi longolong won an aramas luku pwe ngunun aramas esap tongeni malo.
Unusen Ngaselo Seni ewe Peias!
Ekkoch mi apochokkula ewe fofforun atoropasa sussun soma ra apasa pwe a angasalo aramas seni ar repwe peias fan ppwul. Iwe nge, ewe minen ngaselo mi lap seni meinisin, iei pwonutaan an ewe Paipel pwon pwe “aterielon mettoch meinisin, epwe nnielo ewe chon oput, iei i malo.”—1 Korint 15:24-28.
A wewe ngeni pwe ekkewe peias me ewe fofforun keni me atoropasa susuun soma repwe morolo. Ewer, esap chuen wor malo. Iei makkeien ewe aposel Jon fan an lang emmwen: “O ua rong eu mongungu mi leuwommong seni won ewe leenien motun king, o a apasa, ‘Nengeni, ewe imwen Kot a nom ren aramas. Pwisin i epwe nonnom rer, o ir repwe noun aramas, o Kot epwe pwisin nonnom rer. I epwe tolu seni meser chonun meser meinisin, o esap chuen wor malo, esap pwal chuen wor kechiu, are akurang, are metek, pun ekkewe mettochun lom ra fen morolo.’”—Pwarata 21:3, 4.
Ekkena mettoch meinisin repwe pwonuta lupwen ewe malo mi tori aramas seni an Atam tipis epwe unusen morolo fan nemenien an Kot we Muu. Lon ena atun ekkewe aramas mi alleasochis resap chuen ekieki ewe fansoun repwe wiliisefallilo ngeni susuun ppwul.
[Sasing lón pekin taropwe 31]
An aramas atoropasa susuun soma lon Sagami Bay, Japan
[Credit Line]
Courtesy of Koueisha, Tokyo