Lipich​—Eu Asam Ngeni Angang Ren Eu Letip Mi Sap Kinifesen

“[A] wewe ngeni pwe oupwe angang ngeni ewe Samol ren letipemi mi sap kinifesen.”​—1 KORINT 7:35.

1. Menni repot mi alolilen a tori Paul usun ekkewe chon Kraist lon Korint?

EWE aposel Paul a lolileniesini pwiin kewe chon Kraist lon Korint, Kris. Orun nimu ier me mwan, a foratiu ewe mwichefel lon ena telinimw mi pisekisek mi itefoulo ren an kewe foffor-mwaal. Iei, orun 55 C.E., lupwen a nonnom lon Efisus, lon Eisia, a angei ekkoch repot mi alolilen seni Korint usun kinikinfesen lon ewe mwichefel pun ekkoch ra akkappiru aramas pwal mutata eu fofforun lisou-mwaal mi fokkun ngau. Pwal eu, Paul a angei echo taropwe seni ekkewe chon Kraist lon Korint, iwe, ra tingor kapasen emmwen usun ewe fofforun chufengen, lipich, pupulu, imufesen, me pupulusefal.

2. Ifa usun an a pwapwalo pwe ewe fofforingau mi choufetal lon Korint a kku ekkewe chon Kraist lon ena telinimw?

² Ekkewe fofforingau mi choufetal lon Korint a kku ewe mwichefel ikena ie lon ruu sokkun lapalap. Ekkoch chon Kraist ra kuf ren an aramas mutata fofforingau. (1 Korint 5:1; 6:15-17) Iwe, pokiten choufetalin an aramas kukkutta pwapwan inisir lon ena telinimw, pwal ekkoch ra kon ssenuk lon ewe epek, ra pesei aramas ar repwe ti senir ekkewe fofforun chufengen meinisin, pwal mwo nge fan iten ekkewe mi pupulu.​—1 Korint 7:5.

3. Ikkefa ekkewe mettoch Paul a akkom mak usun lon noun we aeuin taropwe ngeni ekkewe chon Korint?

³ Lon ewe taropwe mi ttam Paul a mak ngeni ekkewe chon Korint, a akkom kapas usun ewe osukosuken tipefesen. (1 Korint, sopwun 1-4) A peser ar resap chuen akkappiru aramas, pun epwe chok efisata kinikinfesen. Repwe ita tipeeufengen usun “chon angangen Kot mi akkangangfengen.” Mwirin, a ngenir kapasen emmwen mi titchik fan iten ar repwe tumunu limelimochun ewe mwichefel. (Sopwun 5, 6) Mwirin, ewe aposel a kapas usun nour we taropwe.

A Apochokkulata Lipich

4. Met weween alon Paul lupwen a apasa pwe “a murinno ngeni emon mwan pwe esap attapa fefin”?

⁴ A poputa: “Usun ekkewe mettoch oua fen makkoto rei: A murinno ngeni emon mwan pwe esap attapa emon fefin.” (1 Korint 7:1) Ewe poraus, emon mwan “esap attapa emon fefin” ikei ie a wewe ngeni an esap foffori ewe fofforun chufengen me emon fefin. Pokiten Paul a fen apungu ewe fofforun lisou-mwaal, iei a kapas usun ewe fofforun chufengen lon ewe kokkotun pupulu. Ina minne, iei Paul a apochokkulata ar repwe nonnom chok lon ar lipich. (1 Korint 6:9, 16, 18; alollo ngeni Keneses 20:6; Proverbs 6:29.) Feil, feil, a pwal makkei: “Nge ngenir mi resaamwo pupulu, o pwal ngeni ekkewe fefin mi malo puluer, upwe apasa pwe epwe murinno ngenir are repwe nonnom chok lon ar lipich usun chok ngang.” (1 Korint 7:8) Paul ese pupulu, eni a fen malo puluan we.​—1 Korint 9:5.

5, 6. (a) Pwata a ffatoch pwe Paul ese era pwe chon kraist repwe nonnom touau seni aramas me manaueni ewe manau mi weires? (b) Met popun Paul a pesei chon Kraist ar repwe nonnom lon ar lipich?

⁵ Eni ekkewe chon Kraist lon Korint ra rongorong minne ekkewe chon Kris ra eani ekiek, iwe, ekkoch sou ekiek ra kon ssenuk pwe aramas resap fokkun pwapwaiti och mettochun fonufan. Ita ina ewe popun ekkewe chon Korint ra eisini Paul ika epwe “och” are chon Kraist repwe ti senir ewe fofforun chufengen fansoun meinisin? Minne Paul a eani poluan ese tipeeu ngeni ekiekin ekkewe sou ekiekin Kris. (Kolose 2:8) Ese usun chok ekkewe nouwisen lamalamen Katolik, weween, lon makkeian kewe, ese fokkun pesei chon Kraist repwe manaueni ewe sokkun manau mi aweiresir me pelukuolo pwapwan manau meinisin fan iten ar repwe nonnom lon eu leeni ikewe ie ekkewe samol fel are nianketek repwe imulo seni aramas ie, usun ita nge aramas mi lipich ra fokkun pin lap seni ekkewe ekkoch me repwe tongeni pwisin efisi ar kuna amanau ren lapalapen manauer pwal ar kewe iotek.

⁶ Paul a chok apochokkulata ar repwe lipich “pun riaffou mi arapoto.” (1 Korint 7:26) Eni a kapas usun an chon Kraist kuna weires lon na fansoun, iwe, epwe tongeni lapelo ren ar repwe pupulu. (1 Korint 7:28) Iei an we kapasen fon ngeni ekkewe chon Kraist mi lipich: “Epwe murinno ngenir are repwe nonnom chok lon ar lipich usun chok ngang.” Ngeni ekkewe mi pupulu, a apasa: “Are ka fen riri ngeni emon fefin, kosap kutta om kopwe mu seni; are kesaamwo riri ngeni emon fefin, kosap kutta puluom.” A mak usun emon chon Kraist fefin mi ma seni puluwan we, a makkei: “Neminewe epwe feioch lap seni are epwe chok lipich. O ngang, ua pwal mefi pwe Ngunun Kot mi nonnom rei.”​—1 Korint 7:8, 27, 40.

Esap Eu Minen Erian Ar Repwe Nonnom lon ar Lipich

7, 8. Met a pwarata pwe Paul ese eriani chon Kraist ar repwe nonnom lon ar lipich?

⁷ Ese mwaal, an Jiowa we ngun mi fel a emmweni Paul lupwen a awora ena kapasen fon. Minne a aiti ngenir usun lipich me pupulu a itepok me ruuepek pwal mirit. Ese era pwe ina esissinen an emon tuppwol are ese tuppwol. Iwe nge, emon me emon epwe pwisin filata, nge a chok apochokkulata lipich fan iten ir kewe mi tongeni amwochu ar limelimoch.

⁸ Mwirin an Paul apasa pwe “epwe murinno ngeni emon mwan pwe esap attapa fefin,” a pwal apasa: “Nge pokiten sossotun lisou, ekkewe mwan repwe angei en me pwisin puluan, o ekkewe fefin repwe pwal angei en me pwisin puluan.” (1 Korint 7:1, 2) Mwirin an a pesei ekkewe mi lipich me ekkewe fefin mi ma senir puluwer ar repwe “nonnom chok lon ar lipich usun chok ngang,” a muttir pwal apasa: “Nge are resap tongeni, iwe, repwe apupulu, pun apupulu mi murinno seni karelo.” (1 Korint 7:8, 9) Pwal eu, a fonou ekkewe mwan mi ma seni puluwer: “Kosap kutta puluom. Nge are kopwe pupulu, iwe, kosap tipis ren.” (1 Korint 7:27, 28) Ena kapasen fon mi itepok me ruuepek a pwarata pwe emon epwe tongeni pwisin filata.

9. Me ren Jises me Paul, ifa usun pupulu me lipich, ir eu liffang seni Kot?

⁹ Paul a pwarata pwe pupulu me lipich, ir eu liffang seni Kot. “Amwo aramas meinisin epwe usun chok ngang. Nge mi wor ren aramas meinisin en me liffangen ewe chen me ren Kot, ngeni emon eu sokkun, ngeni pwal emon eu sokkun.” (1 Korint 7:7) Ese mwaal, a ekieki usun alon Jises. Mwirin an a affata pwe pupulu a popu seni Kot, Jises a pwarata pwe an emon filata an epwe nonnom chok lon an lipich fan iten an epwe angang ngeni ewe Muu, ina eu liffang mi sokkolo auchean, a era: “Esap aramas meinisin ra tongeni wewe ren ei kapas pwe ekkewe chok mi angei ewe liffang. Pun mi wor ekkoch iunok, ir mi iunok seni fansoun ar uputiu. Mi pwal wor ekkoch iunok, aramas ra forir pwe repwe iunok. O mi pwal wor ekkoch iunok, ra chok pwisin fori pwe repwe iunok fan iten ewe muun lang. Io mi tongeni wewe ren, epwe wewe.”​—Mattu 19:4-6, 11, 12.

Filata ewe Liffangen Lipich

10. Epwe ifa usun emon epwe “filata” ewe liffangen lipich?

¹⁰ Inaamwo ika Jises me Paul ra era pwe lipich, ina eu “liffang,” nge rese apasa pwe ina eu manaman ekkoch chok repwe tongeni angei. Jises a apasa pwe “esap aramas meinisin ra angei ewe liffang,” iwe, a pesei ir kewe mi tongeni ar repwe “pwisin fori pwe repwe iunok,” usun chok Jises me Paul ra fori. Pwungun, Paul a makkei: “Epwe murinno ar repwe pupulu lap seni ar repwe karelo ren mochenia,” nge a kapas usun ir kewe resap “tongeni nemeni mochenien inisir.” (1 Korint 7:9) Lon makkeian kewe me mwan we, Paul a pwarata pwe epwe tufich chon Kraist repwe karelo ren mochenien fituk. (Kalesia 5:16, 22-24) Ach feffetal ren ngun a wewe ngeni ach sipwe mut ngeni an Jiowa we ngun mi fel an epwe emmweni ipwach kewe. Epwe tufich pwe chon Kraist sarafo repwe tongeni fori ena? Ewer, ika repwe alleasochisi an Kot we Kapas. Ewe chon makkei kol fel a makkei: “Meeta emon aluwol epwe fori pwe an foffor epwe limelimoch? Epwe mamasa usun mi fich ngeni om kapas.”​—Kol Fel 119:9.

11. Met weween an emon epwe ‘feffetal lon ewe ngun’?

¹¹ Epwe wewe ngeni ar repwe tumunur seni ekkewe ekiek mi sikepwach mi choufetal ren chommong TV program, kachito, chassi, puk, me kapasen kol. Ena sokkun ekiek a popu seni mochenien fituk. Emon chon Kraist aluwol are fopwul mi mochen amwochu an lipich epwe “fetal, sap lon alen fituk, pwe lon alen ngun. Pun ekkewe ir mi nonnom lon alen fituk ra ekieki chok usun mettochun fituk, nge ekkewe ir mi nonnom lon ewe alen Ngun ra ekieki chok usun mettochun ngun.” (Rom 8:4, 5) Ekkewe mettochun ngun ra pwung, limelimoch, tong, murinno. Epwe murinno ekkewe chon Kraist, kukkun me chinnap, repwe “lefareni ekkeei mettoch.”​—Filipai 4:8, 9.

12. Met epwe kapachelong lon an emon filata ewe liffangen lipich?

¹² An emon pwisin filata an epwe amwochu an lipich epwe akkaeuin wewe ngeni an epwe lefareni ena mettoch lon letipan pwal iotek ngeni Jiowa ren an alillis. (Filipai 4:6, 7) Paul a makkei: “Nge are emon mwan mi tipeppos lon letipan, o a mefi pwe esor lamoten an epwe pupulu, o are a tongeni nemeni pwisin an mochen, o a fen filata lon letipan pwe epwe likiitu lon an lipich, iwe, forian we mi murinno. Iei minne, atewe mi apupulu ngeni kofotun we epwe murinno, nge atewe esap apupulu epwe murinno seni.”​—1 Korint 7:37, 38.

Lipich fan iten Eu Popun mi Auchea

13, 14. (a) Ifa usun ewe aposel Paul a alollofengenni ekkewe chon Kraist mi lipich me chokewe mi pupulu? (b) Epwe chok ifa usun emon chon Kraist mi lipich epwe tongeni “murinno seni” ir kewe mi pupulu?

¹³ An emon nonnom chok lon an lipich esap pukun murinno. Iwe, epwe ifa usun an epwe “murinno seni”? Epwe fokkun alongolong won ifa usun emon epwe aea ekkewe tufich an lipich epwe wato. Paul a makkei: “Ua chok mochen pwe ami ousap aurek ren och. Emon mwan mi sap pupulu a tumunufichi mettochun ach Samol, usun an epwe apwapwai ach Samol. Nge emon mi pupulu a tumunu mettochun fonufan, usun an epwe apwapwai puluan, iwe, letipan we a kinikinfesen. O emon fefin mi sap pupulu, are fopul, a tumunu mettochun ach Samol, usun an epwe fel ren inisin o pwal ren ngunun. Nge emon mi pupulu a chok tumunu mettochun fonufan, usun an epwe apwapwai puluan. Ua apasata ekkeei mettoch pwe ami oupwe murinnolo, sap pwe upwe amwochukemitiu, nge oupwe tetteloch o angang ngeni ewe Samol ren letipemi mi sap kinifesen.”​—1 Korint 7:32-35.

¹⁴ Emon chon Kraist mi lipich mi aea an lipich pwe epwe chechei pwisin mochenin letipan esap “murinno seni” ekkewe chon Kraist mi pupulu. Weween, a chok amwochu an lipich fan iten pwisin an kewe mochen, nge sap “fan iten ewe muun lang.” (Mattu 19:12) Ewe mwan are fefin mi lipich epwe ita “aureki ekkewe mettochun ewe Samol,” aureki an “epwe apwapwai ach Samol,” me epwe “angang ngeni ewe Samol ren letipan mi sap kinifesen.” Epwe wewe ngeni an epwe angang ngeni Jiowa me Kraist Jises ren letipan mi sap kinifesen. Epwe chok ina usun ekkewe chon Kraist mi lipich repwe “murinno seni” ekkewe chon Kraist mi pupulu.

Angang ren Eu Letip mi Sap Kinifesen

15. Ifa menlapen an Paul awewe lon 1 Korint sopwun 7?

¹⁵ Iei an Paul awewei lon ei sopwun: Inaamwo ika pupulu a pwung me ren alluk me, fan ekkoch lapalap, epwe murinno fan iten ekkoch, nge lipich epwe murinno seni fan iten ewe chon Kraist mwan are fefin mi mochen angang ngeni Jiowa ren letipan mi sap kinifesen. Letipen chon pupulu a “kinifesen,” nge ewe ese pupulu epwe tongeni tuttumunu “mettochun ewe Samol.”

16, 17. Epwe ifa usun emon chon Kraist mi lipich epwe tumunu “ekkewe mettochun ewe Samol” lap seni chokewe mi pupulu?

¹⁶ Ikkefa ekkewe mettochun ewe Samol emon chon Kraist mi lipich epwe tongeni tuttumunu lap seni chokewe mi pupulu? Lon pwal eu awewe, Jises a kapas usun “minne an Kot”​—ekkewe mettoch chon Kraist resap ngeni Sisar. (Mattu 22:21) Ekkena mettoch ra akkaeuin weneiti manauen emon chon Kraist, an fel, me an we angangen afalafal.​—Mattu 4:10; Rom 14:8; 2 Korint 2:17; 3:5, 6; 4:1.

¹⁷ Ekkewe mi lipich repwe tongeni aea watten ar fansoun le angang ngeni Jiowa, iwe, repwe tongeni pochokkuleta lon pekin ngun. Repwe tongeni awattei ar fansoun kakkaeo me ekkekiek won Paipel. Fan chommong, epwe mecheres ngeni ekkewe chon Kraist mi lipich ar repwe tongeni alleani nour Paipel lap seni chokewe mi pupulu. Eni repwe tongeni ammolnaochu fan iten ekkewe mwich me ewe angangen afalafal. Ekkeei mettoch meinisin repwe pwisin efeiochur.​—1 Korint 7:35.

18. Ifa usun chommong brother mi lipich repwe pwarata pwe ra mochen angang ngeni Jiowa ren “eu letip sap kinifesen”?

¹⁸ Chommong brother mi lipich mi fen eani ewe wis ministerial servant repwe tongeni ereni Jiowa: “Ngang iei! Tinieilo!” (Aisea 6:8) Repwe tongeni achocho le fiti ewe Ministerial Training School, ewe a foretiu fan iten ekkewe ministerial servant me elter mi lipich, ir kewe mi tongeni feilo angang ikewe ie ra osupwang ren chon afalafal ie. Pwal mwo nge ekkewe brother esap tufich ngenir ar repwe likitalo ar mwichefel, repwe tongeni angang ngeni pwiir kewe lon ekkewe wis ministerial servant are elter.​—Filipai 2:20-23.

19. Ifa usun chommong sister mi lipich ra feioch, iwe, ifa usun repwe wiliti eu feioch ngeni ekkewe mwichefel?

¹⁹ Pokiten esor puluwer ar repwe kapas ngeni, eni ekkewe sister mi lipich repwe ‘likiti ngeni Jiowa ar kewe chourek’. (Kol Fel 55:22; 1 Korint 11:3) Epwe akkaeuin lamot ngeni ekkewe sister mi lipich pokiten ar tongei Jiowa. Ika repwe pupulu mwirin och fansoun, epwe “lon chok ewe Samol,” weween, ngeni chok emon mi fangelo manauan ngeni Jiowa. (1 Korint 7:39) Ekkewe elter ra kilisou ren ekkewe sister mi lipich lon ar kewe mwichefel; fan chommong ra chuchuuri me alisi ekkewe mi semmwen me ekkewe mi chinnap. Epwe atoto pwapwa ngeni meinisin.​—Fofor 20:35.

20. Ifa usun chommong Chon Kraist ra pwarata pwe ra “tuttumunu mettochun ewe Samol ren letiper mi sap kinifesen”?

²⁰ Chommong chon Kraist sarafo ra fen akkota ar kewe foffor fan iten ar repwe “tuttumunu mettochun ewe Samol ren eu letip mi sap kinifesen.” (1 Korint 7:35) Ra angang ngeni Jiowa lon ewe wis pioneer full-time, misineri, are lon eu me lein an ewe Watch Tower Society kewe branch ofes. Iwe, ir eu mwich mi fokkun pwapwa! A fokkun apwapwa ach sipwe nonnom leir! Mwa, mwen mesen Jiowa me Jises, ir ra “usun chok amurenipwin.”​—Kol Fel 110:3.

Esor Eu Pwonen Ar Repwe Lipich Tori Feilfeilo Chok

21. (a) Pwata a ffatoch pwe Paul ese pesei aramas ar repwe fori eu pwonen lipich? (b) Met weween alon Paul lupwen a apasa pwe emon epwe “lu seni kukkun ierin”?

²¹ Iei eu ki lon an Paul we kapasen fon, pwe epwe “murinno” ika ekkewe chon Kraist repwe filata pwe repwe lipich. (1 Korint 7:1, 8, 26, 37) Iwe nge, ese fokkun erenir ar repwe fori och pwonen lipich. Apw, nge a makkei: “Are emon mwan a mefi pwe minne a fori ngeni an lipich ese fich ngeni, o a lu seni kukkun ierin o an we mochen epwe pochokkul, iwe, letipan chok, esap tipis ren, repwe apupulu.” (1 Korint 7:36) Ewe kapasen Krik (hy·peʹra·kmos) mi affou ngeni “lu seni kukkun ierin” a wesewesen wewe ngeni “lu seni ewe fansoun mochenin fitukan a fokkun pochokkul.” Iwe, ir kewe mi fen lipich fansoun langattam mi mefi pwe repwe mochen pupulu repwe tongeni pulueni emon chiener chon luku.​—2 Korint 6:14.

22. Pwata epwe murinno pwe emon chon Kraist esap pupulu lupwen a chuen kukkun ierin?

²² Ekkewe ier emon chon Kraist sarafo a angang ngeni Jiowa ren letipan mi sap kinifesen, ina eu fansoun auchea. A mut ngenir ar repwe angei tipatchem, awattei kunaen manauer, me mirit. (Proverbs 1:3, 4) Mwirin, epwe fen murinno ngeni emon mi nonnom lon an lipich pokiten ewe Muu pun epwe fen lipwakochulo ika epwe filata an epwe eani ekkewe wis mi fiti pupulu me nounou.

23. Met ekkoch mi ekiekin pupulu repwe mefata, nge menni kapas eis epwe polu lon ekkewe lesen mwirin?

²³ Ekkoch Chon Kraist mi lipich mi fen angang ngeni Jiowa fitu ier repwe filiochu emon an epwe puluwan ika a tipeeu ngeni ar repwe sopweilo lon ewe angangen afalafal full-time. Epwe fokkun murinno ena. Eni ekkoch repwe pwal mwo nge ekieki pwe repwe pupulu nge resap fokkun mut ngeni ar pupulu an epwe eppeti ar angang ngeni Kot. Nge ita ekkewe chon Kraist mi pupulu repwe ita mefi pwe mi fich ngenir ar repwe akkomwa ar angang ngeni Jiowa usun chok ra fori lupwen ra chuen lipich? Sipwe kapas usun ena kapas eis lon ekkewe lesen mwirin.

Enniwili

◻ Pwata ewe aposel Paul a mefi lamoten an epwe mak ngeni ewe mwichefelin Korint?

◻ Pwata sia silei pwe Paul ese era pwe chon Kraist repwe manaueni ewe sokkun manau mi kon weires?

◻ Epwe ifa usun emon epwe “filata” an epwe lipich?

◻ Epwe ifa usun ekkewe sister mi lipich repwe kuna feioch seni ar nonnom lon ar lipich?

◻ Epwe ifa usun ekkewe brother mi lipich repwe tongeni aeaochu ar ngas pwe repwe angang ngeni Jiowa “ren letiper mi sap kinifesen”?