Lukuluk lon eu Fonufan ese Unusoch
“USE mwo fori minne mi murinno, ewe ua mochen; nge minne mi ngau, ewe use mochen, iei ewe ua fori.” Ka kuna pwe a kan ina ussum? Epwe pochokkuleta letipom pun a pwal ina ussun ewe aposel Paul, iwe nge, i emon chon Kraist mi fokkun tuppwol. Esap pwe ekkena ruu mettoch ra polufengen? Lon noun taropwe ngeni ekkewe chon Kraist lon Rom, Paul a atittina ewe osukosuk: “Nge are ua fori minne use mochen, iwe, esap ngang ewe chon fori, pwe ewe tipis mi nonnom lon ngang.” Met sokkun tipis a kapas ussun, me ifa ussun a pworaiti pwe epwe emon mwan mi tuppwol?—Rom 7:19, 20.
Mesemwan lon noun taropwe, iei makkeien Paul: “Iei minne, ussun chok tipis a tolong lon fonufan ren emon aramas, o pwal malo ren tipis; iei ussun malo a pwal tori aramas meinisin, pun aramas meinisin ra tipis.” Ewe “emon aramas,” ina i Atam. (Rom 5:12, 14) Tipisin ewe akkaemonun mwan Atam, ina ewe popun a wor apwangapwangen aramas, me ina eu popun a mmen weires ngeni aramas ar repwe tipewen.
Ikenai aramas rese kan luku met Paul a makkei ussun “popun tipis” pun ekkewe sou ak lon pekin lamalam rese achifoua met Paipel a apasa ussun forutaan aramas, nge ra luku evolution. Emon mi mak ussun Rom 5:12-14 a apasa pwe “ekkewe sou kaeo ra fen monelo unusen ena poraus.” Iwe nge, ipuku ier lom, ekkewe mi mak ussun Paipel ra awewei fansoun meinisin “lupwen Atam a tipis . . . a alimengaua mwirimwirin kewe meinisin ren ena tipis fitifengen me sopwongauan.”a
Poutuloon Tipewen me le Poputaan
Ikenai, chommong rese luku pwe a wor emon akkaemonun mwan itan Atam, iwe, pwal ussun chok, ra apasa pwe porausen Setan ewe Tefil eu chok tutunlap.b Nge Jises Kraist a apasa pwe ena emon “ese mwo nonnom lon minne mi enlet,” weween, ese tuppwol. (Jon 8:44) Iwe, fan an Setan pesepes, Atam me If ra u ngeni Jiowa me a talo ar tipewen fan sossot.—Keneses 3:1-19.
Pokiten kich meinisin mwirimwirin Atam, a mecheres ach sipwe tipis. Iei alon ewe mwan tipatchem Solomon: “Enlet, esap fokkun wor emon chon pwung won fonufan a chok fori minne a pwung fansoun meinisin, nge esap wor an tipis.” (Eklesiastis 7:20) Iwe nge, aramas meinisin repwe tufichin wiliiti aramas mi wenechar. Ifa ussun? Pun sap minne emon epwe unusoch fan iten an epwe tufichin pwarata tipewen.
Liwinin Tuppwol
Emon aramas mi tipewen epwe tongeni meefi watte kinamwe lon letipan. Emon mi wenechar mwen mesen Kot epwe kuna feioch esemuch. Ikenai, “eu mwich mi lapalap,” mwichen chon fel mi enlet, a kan akammol pwe repwe tolong lon eu fonufan sefo, ikewe epwe wor kinamwe me tipeeu, fitifengen me ewe apilukulukun manau esemuch. (Pwarata 7:9) A lamot ar repwe tuppwol le alleasochisi ekkewe alluk fan iten foffor mi limoch me fan iten ar fel ngeni Kot, inaamwo ika repwe kuna sossot seni ei otot minen lom me pwal seni Setan. Epwe pochokkul om luku pwe fan ewe manaman Jiowa epwe awora, kopwe tongeni likiitu!—Filipai 4:13.
Lon an kapas ussun ewe fansoun iei me pwal mwach kkan, ewe sou mak kol fel itan Tafit a awora eu minen alukuluk ngenikich meinisin lupwen a eani ei iotekin kilisou ngeni Jiowa: “Ka amwochuei pokiten manauei mi enlet, o ka isetiu ngang mwen mesom feilfeilo chok. Amwo Jiowa epwe feioch . . . Amen o Amen.”—Kol Fel 41:12, 13.
[Footnote]
a Eu poraus lon The New Testament of Our Lord and Saviour Jesus Christ, according to the Authorised Version, with a brief commentary by various authors.
b Ewe it Setan a wewe ngeni “Chon U Ngeni.” “Tefil” a wewe ngeni “Chon Pweni.”