An Kot Nemenem Lon Fansoun Ekkewe Popun Chon Kraist

“Lon an chengel . . . epwe achufengenni mettoch meinisin lon i, mettochun lang pwal mettochun fonufan.”​—EFISOS 1:9, 10.

1, 2. (a) Ifa ussun a fis ewe angangen achufengenni “ekkewe mettochun lang” mi poputa seni 33 C.E.? (b) Ifa ussun ekkewe chon Kraist mi kepit ra pwarata ewe ngunun Moses me Ilaija seni 1914?

ENA angangen achufengenni “ekkewe mettochun lang” a poputa lon 33 C.E. lupwen “ewe Israelin Kot” a uputiu. (Kalesia 6:16; Aisea 43:10) Mwirin ewe aewin senturi C.E., ewe angangen achufengen a mangetiu lupwen ekkewe apostate (“iraan folufol), ekkewe Satan a amorafetalei ra chommongelo lein ekkewe chon Kraist mi enlet (ir kewe Jises a eita ngeni “wit”). Nge lupwen a arapoto “ewe fansoun sopwolon,” ewe Israelin Kot mi enlet ra puksefal, iwe, lon 1919 ra seikita won pisekin Jises kewe meinisin.a​—Mattu 13:24-30, 36-43; 24:45-47; Taniel 12:4.

² Lon fansoun ewe aewin maunen fonufan, ekkewe chon Kraist mi kepit ra fori angang mi manaman, ussun chok Moses me Ilaija ra pin fori.b (Pwarata 11:5, 6) Seni 1919 ra afalafala ewe kapas allim won ei fonufan mi oputer, nge ra fori ena angang ren pwora ussun chok Ilaija. (Mattu 24:9-14) Iwe, seni 1922 ra esileifetalei ussun an Jiowa we kapwung won aramas, ussun chok Moses a atoto won Isip an Kot kewe riaffou lom lom. (Pwarata 15:1; 16:2-17) Ikenai, lusun ekkeei chon Kraist mi kepit, ir longolongun ewe otot sefo an Chon Pwarata Jiowa.

Angangen ewe Mwichen Pwungupwung

3. Ikkefa ekkewe mettoch ra pwarata pwe a kokkotoch ewe mwichefelin chon Kraist lom?

³ Seni le poputaan, a kokkotoch noun Jises kewe chon kaeo mi kepit. Atun ekkewe chon kaeo ra chommongelo, a forutiu ekkewe mwichefel lon eu me eu telinimw, me ekkoch elter ra seikita wor. (Taitos 1:5) Mwirin 33 C.E., ekkewe 12 aposel, ir eu mwichen sou pwungupwung. Lon ena wis, ra fori ewe angangen afalafal fan pwora. (Fofor 4:33, 35, 37; 5:18, 29) Ra akkota ewe angangen aineti mongo ngeni ekkewe mi osupwang, ra pwal tinalo Piter me Jon ngeni Sameria fan iten ar repwe alisi chokewe mi mochen kaeo. (Fofor 6:1-6; 8:6-8, 14-17) Parnapas a ateneki Paul ngenir pwe epwe alukuluku pwe atena mi pin eriaffoua chon Kraist a wiliti emon chon appiru Jises iei. (Fofor 9:27; Kalesia 1:18, 19) Iwe, mwirin an Piter afalafal ngeni Kornilios me chon le imwan kewe, a liwiniti Jerusalem me awewei ngeni ekkewe aposel me ekkewe ekkoch pwin kewe chon Jutia ifa ussun ewe ngun mi fel a pwarata minne letipen Kot.​—Fofor 11:1-18.

4. Ifa ussun an a fis pwe epwe tongeni pout seni Piter manauan, nge ifa ussun a ngaselo seni?

⁴ Iwe mwirin, ewe mwichen sou pwungupwung a kuna riaffou watte. Piter a kalapus, nge ese chok malo pokiten alillisin emon chon lang. (Fofor 12:3-11) Iei ewe aewin fansoun emon lukun ekkewe 12 aposel a wiseni eu wis tekia. Lupwen Piter a ngaselo seni ewe imwen kalapus, a ereni ir kewe mi mwichfengen lon imwen inen Jon Mark: “Oupwe aporausa ei poraus ngeni Jemes [pwin Jises we], pwal ekkewe soulang.”​—Fofor 12:17.

5. Ifa ussun an a siwil chochoon chon ewe mwichen sou pwungupwung mwirin maloon Jemes?

⁵ Me mwan we, mwirin an Jutas Iskariot nielo pwisin i, nge ina i ewe aposel mi afangema Jises, ra mirititi ewe lamoten ar repwe awisa ngeni emon “wisan we” ewe wis aposel, nge epwe emon mi fen nom ren Jises lon an we angangen afalafal pwal pwisin kuna an malo me manausefal. Iwe nge, lupwen Jemes, pwin Jon we, a ninnilo, esor emon a siwili lon wisan we, emon me lein ekkewe 12. (Fofor 1:20-26; 12:1, 2) Nge, mwirin, lupwen ewe Paipel a kapassefal ussun ewe mwichen sou pwungupwung, a pwarata pwe a chommongelo chochoon. Lupwen a piita tipefesen ren ika ewe Allukun Moses epwe wor an nemenem won ekkewe chon Jentail mi wiliti chon Kraist, ra likiti ngeni “ekkewe aposel me ekkewe mwan mi asimau lon Jerusalem” pwe repwe pwungupwungfengen won. (Fofor 15:2, 6, 20, 22, 23; 16:4) Pwata iei “ekkewe mwan mi asimau” ra fiti ewe mwichen chon pwungupwung? Ewe Paipel ese affata, nge enlet, feioch a popu seni. An Jemes we malo pwal an Piter kalapus a pwarata pwe ekkewe aposel repwe tongeni kalapus are ninnilo eu ran. Ika epwe fis ena, woren pwal ekkoch elter mi lipwakoch lon angangen ewe mwichen sou pwungupwung epwe alukuluku sopwosopwolon ar emmwen.

6. Ifa ussun a sopweilo angangen ewe mwichen sou pwungupwung lon Jerusalem, inaamwo ika ekkewe popun chon ena mwich rese chuen nom lon na telinimw?

⁶ Lupwen Paul a tori Jerusalem orun ewe ier 56 C.E., a fos ngeni Jemes pwal “ekkewe elter meinisin mi nonnom ikewe,” me ren ewe Paipel. (Fofor 21:18) Pwata ese era pwe ekkewe aposel ra pwal nom lon ena mwich? Ewe Paipel ese pwal apasa. Nge emon sou uruwo Eusebius a repotei pwe mwen 66 C.E., “lusun ekkewe aposel ra su seni Jutia pokiten an aramas sotun nnirelo. Nge ra sai ngeni iteiten fonu meinisin fan manamanen Kraist fan iten ar repwe afalafala ar we poraus.” (Eusebius, Book III, V, v. 2) Pwungun pwe alon Eusebius ese nom lon ewe Paipel, nge ra tipeeu ngeni met ewe Paipel a apasa. Awewe chok, lon 62 C.E., Piter a nonnom lon Papilon, towau seni Jerusalem. (1 Piter 5:13) Iwe nge, lon 56 C.E., me ese mwaal tori 66 C.E., eu mwichen sou pwungupwung a angang lon Jerusalem.

Ewe Angangen Emmwen lon Ach Ei Fansoun

7. Ren ach alollofengenni ewe mwichen sou pwungupwung lon ewe aewin senturi me ewe Mwichen Sou Pwungupwung ikenai, ifa sokkofesennin lefiler?

⁷ Seni 33 C.E., tori ewe riaffou won Jerusalem, ekkewe re Jus chon Kraist ra choni ewe mwichen sou pwungupwung. Atun an a chuurir lon 56 C.E., Paul a kuna pwe inaamwo ika chommong chon Kraist chon Jus ra “akkamwochu lukuen ach Samol, Jises Kraist,” nge ra chuen “chon akkapwonueta ewe allukun Moses.”c (Jemes 2:1; Fofor 21:20-25) Eni epwe weires ngeni ekkena chon Jus ar repwe nguuri pwe emon re Jentail epwe nom lon ewe mwichen sou pwungupwung. Iwe nge, lon ach ei fansoun, a fen pwal siwil masouen ena mwichen aramas. Ikenai, a unusen masou ren ekkewe chon Kraist chon Jentail mi kepit, iwe, Jiowa a fokkun efeiochu ar angangen mammasa.​—Efisus 2:11-15.

8, 9. Ikkefa ekkewe mettoch ra fis lon ewe Mwichen sou Pwungupwung lon ach ei fansoun?

⁸ Seni le poputaan ewe mwicheichin Watch Tower Bible and Tract Society of Pennsylvania lon 1884 tori 1972, a pochokkul nemenemen ewe peresetenin ewe Society, nge ewe mwichen sou pwungupwung a pachengeni ewe mwichen chon emmweni ewe mwicheich (board of directors). Ekkewe feioch seni Jiowa lon ekkena ier ra annetata pwe Jiowa a pwapwaiti ena kokkot. Lefilen 1972 me 1975, a chommongelo chochoon ewe mwichen Sou Pwungupwung, iwe, 18 ra choni. Lap seni lom, a arap ngeni ewe kokkot lon ewe aewin senturi lupwen nemenem watte a nom ren ena mwichen sou pwungupwung mi chommongelo, nge ekkoch leir ra wisen chon emmwen (directors) lon ewe Watch Tower Bible and Tract Society of Pennsylvania.

⁹ Seni 1975 fitemon lein ekkena 18 ra malo. Ra pworacho ngeni fonufan me ‘motiu ren Jises won an we leenien motun king lon lang.’ (Pwarata 3:21) Ren ekkana popun, iei a wor 10 chon ewe Mwichen Sou Pwungupwung, pachelong emon mi poputa le eani ewe wis lon 1994. Lap ngenir meinisin ra fen chinnap. Iwe nge, ekkena chon kepit ra kuna alillisoch mi murinno atun ra akkapwonueta wiser kewe. A feito me ia ena alillis? Ach nengeni minne a fis lein noun kot kewe aramas epwe polueni ena kapas eis.

Alillis fan iten ewe Israelin Kot

10. Io kewe ra fiti ekkewe mi kepit lon an Jiowa we angang lon ekkeei ranin le sopwolon, me ifa ewe oesini ussun ei mettoch?

¹⁰ Lon ewe ier 1884, arapakan ir meinisin mi eti ewe Israelin Kot, ir chon Kraist mi kepit. Iwe nge, ekis me ekis, a pwapwalo pwal eu mwichen aramas, me lon 1935 a ffat pwe ei mwichen aramas, ir ewe “mwich mi lapalap” lon Pwarata sopwun 7. Pokiten ra eani ewe apilukulukun manau won fonufan, ra liosueta “ekkewe mettochun fonufan” Jiowa a akkota pwe epwe achufengenni lon Kraist. (Efisus 1:10) Ra liosueta “ekkewe ekkoch siip” lon an Jises kapas monomon ussun ekkewe tittin siip. (Jon 10:16) Seni 1935, pwal ekkoch siip ra kito ngeni an Jiowa we mwicheich. Ra “aas ussun kuchu, pwal ussun lisom mi liwin ngeni faser.” (Aisea 60:8) Pokiten a chommongelo chon ewe mwich mi lapalap me a chokukkunulo chon ewe mwich mi kepit atun ra malo won ei fonufan, a lapalapelo wisen ekkoch me lein ekkewe ekkoch siip mi lipwakoch lon pekin angangen chon Kraist. Ifa ussun?

11. Ikkefa ekkewe wis auchea ekkewe chon Kraist mi kepit chok ra pin eani, nge iei ekkewe ekkoch siip ra pwal eani?

¹¹ An Kot we “muu mi pin” a kan wisen esileifeili amwararen Jiowa. Paul a apasa pwe a ussun chok eu asor lon ewe imwenfel, iwe, Jises a awisa ngeni ir kewe repwe wisen “samol-fel” ar repwe afalafal me asukula aramas. (Ekistos 19:5, 6; 1 Piter 2:4, 9; Mattu 24:14; 28:19, 20; Ipru 13:15, 16) Iwe nge, Ewe Watchtower, minen August 1932, a akkaewin pesei ir kewe mi liosutiu ren Jonadab ar repwe fiti ei angang. Pwungun pwe chommong lein pwal ekkoch siip ra fen fori ena. Ikenai, ewe mwichen pwal ekkoch siip ra fori arapakan unusen ewe angangen afalafal, iwe, ina ewe akkaewin kinikinin ar “angang mi pin ngeni Kot le ran o lepwin lon an we imwenfel.” (Pwarata 7:15) A pwal ina ussun le poputaan uruwoon noun Jiowa kewe aramas lon ach ei fansoun, ekkewe elter lon ekkewe mwichefel ir pwal chon Kraist mi kepit, “ekkewe fu” peliemwanin poun Jises Kraist. (Pwarata 1:16, 20) Nge Ewe Watchtower, minen May 1, 1937, a apasa pwe ekkewe ekkoch siip mi lipwakoch repwe pwal tongeni wisen company servant (presiding overseers). Pwal mwo nge ika mei wor ekkoch mwan mi kepit, nge rese tongeni wiseni ei wis, ekkewe ekkoch siip repwe tongeni wiseni ena wis. Ikenai, arapakan meinisin ekkewe elter lon ekkewe mwichefel, ir chon ewe mwichen ekkewe ekkoch siip.

12. Ikkefa ekkewe poraus lon Paipel ra pwarata pwe mi fich ngeni ekkewe ekkoch siip mi lipwakoch ar repwe wiseni ekkewe wis tekia lon an Kot mwicheich?

¹² Mei mwaal ar repwe awisa ngeni ekkewe ekkoch siip ekkena wis tekia? Aap, pun a fen fis me lom. Ekkoch chon ekis (chon siamu) ra wiseni ekkoch wis tekia lon Israel lom lom. (2 Samuel 23:37, 39; Jeremaia 38:7-9) Mwirin ar ngaselo seni Papilon, ekkewe Nethinim (ekkewe chon angang lon ewe imwenfel nge esap ir chon Israel) mi lipwakoch, ra wisen fori ekkoch angang lon ewe imwenfel ekkewe chok chon Lifai ra pin fori me lom. (Esra 8:15-20; Nehemia 7:60) Pwal eu, emon mi nom ren Jises lon ewe langepwi ussun ewe wililo, Moses a etiwa ewe kapasen fon mi murinno seni Jethro emon chon Mitia. Mwirin, a tingorei noun Jethro we mwan itan Hobab an epwe emmwenir lon ewe fonu poon.​—Ekistos 18:5, 17-24; Numperis 10:29.

13. Lon ar awisa ngeni ekkewe ekkoch siip mi lipwakoch ekkoch angang auchea ren tipetekison, ekkewe mi kepit ra akappiru menni leenien appiru mi murinno?

¹³ Pokiten Moses a silei pwe esap tolong lon ewe fonu mi pwon, arapakan le muchuloon ekkewe 40 ier lon ewe fonu poon, a iotek pwe Jiowa epwe awora emon chon wii. (Numperis 27:15-17) Jiowa a ereni an epwe seikata Joshua mwen mesen ekkewe aramas meinisin, iwe, Moses a fori ena, inaamwo ika a chuen pochokkul lon pekin inis me esap muttir ukkutiu an angang ngeni Israel. (Tuteronomi 3:28; 34:5-7, 9) Fan ena sokkun ngunun tipetekison, ekkewe mi kepit ra fen ngeni ekkewe mwan mi lipwakoch lein ewe mwichen ekkewe ekkoch siip ekkoch wis tekia.

14. Ikkefa ekkewe oesini mi kapas ussun wattetaan angangen ekkewe ekkoch siip lon ar emmweni ewe mwicheich?

¹⁴ An ekkewe ekkoch siip wiseni ekkewe wis tekia le emmweni an Kot mwicheich a pwal apwonueta oesini. Sekaraia a oesini pwe emon chon Filistia, nge esap emon chon Israel, epwe “ussun chok eu eterekes me lon Juta.” (Sekaraia 9:6, 7) Ekkewe eterekes, ir samolun eterenges, ina minne Sekaraia a apasa pwe emon mi pin oputa Israel epwe eani fel mi enlet me wiliti emon mi ussun chok emon samolun eterenges lon ewe Fonu mi Pwon. Pwal eu, atun a fos ngeni ewe Israelin Kot, Jiowa a apasa: “Iwe, chon ekis repwe foleni noumi pwiin man, wasola repwe pwal noumi chon tuu pwul me chon angang ngeni ami tanipin wain. Nge ami oupwe iteni noun Jiowa kewe souasor, pwal noun ach we Kot chon angang.” (Aisea 61:5, 6) Ekkewe ekkoch siip, ir ekkewe “chon ekis” me ekkewe “chon wasola.” A chommongelo wiser kewe pwe repwe wisen apwonueta ekkewe angang atun lusun ekkewe mi kepit mi chinnap repwe malo me feita lang pwe repwe unusen fori angangen “samol-felin Jiowa,” iwe, repwe pwelli an Jiowa we leenien mot mi lingoch fan ewe wis “chon angang ngeni ach Kot.”​—1 Korint 15:50-57; Pwarata 4:4, 9-11; 5:9, 10.

“Ewe Tappin Aramas . . . Epwe Feito”

15. Lon ei fansoun le sopwolon, menni mwichen chon Kraist ra fen tori “chinnap,” me menni mwichen aramas ra liosutiu ren “ewe tappin aramas . . . epwe feito”?

¹⁵ Lusun ekkewe mi kepit ra pwapwaiti ar repwe asukula ekkewe ekkoch siip fan iten ar repwe wiseni ekkewe wis tekia. Kol Fel 71:18 a apasa: “Iwe, inaamwo ika upwe chinnapelo, o meten mokurei epwe uanelo, nge kosap likitieilo, Kot, tori fansoun ai upwe arongafetalei om manaman ngeni ekkewe tappin aramas meinisin repwe feito.” Lon an kapas ussun ei wokisin, The Watchtower, minen Tisamper 15, 1948, a apasa pwe ewe mwichefelin chon Kraist mi kepit a fen chinnapelo. Iwe, a sopweilo le apasa pwe ekkewe mi kepit ra pwapwaesini ar “nengeni minne epwe fis lon mwach kkan me ren ekkewe oesini lon Paipel me kuna eu tappin aramas mi fo.” A wesewesen wewe ngeni io kewe? The Watchtower a apasa: “Jises a apasa pwe ir noun ‘ekkewe ekkoch siip.’” ‘Ewe tappin aramas epwe feito’ a wewe ngeni ekkewe aramas repwe manau fan eu minefoon kokkot won fonufan, ewe epwe nom fan nemenien ewe Muun lang.

16. Ikkefa ekkewe feioch ‘ewe tappin aramas epwe feito’ a ukkuti?

¹⁶ Ewe Paipel ese affata inet ekkewe chon Kraist mi kepit meinisin repwe likitalo pwiir kewe lon ewe ‘tappin aramas epwe feito’ me eti Jises le kuna ling. Nge ekkeei chon kepit ra achifoua pwe a chok arapoto ena fansoun. Ekkewe mettoch lon an Jises we oesini mi lapalap ussun “ewe fansoun sopwolon” ra fen pwonueta seni 1914, iwe, a pwarata pwe a fen arapoto kiteterin ei fonufan. (Taniel 12:4; Mattu 24:3-14; Mark 13:4-20; Luk 21:7-24) Arapakan chok, nge Jiowa epwe awarato eu fonufan sefo, ikkewe ie ‘ewe tappin aramas epwe feito’ epwe ‘alemwiri ewe muu [ewe fonufan] mi mmolneta fan iter seni le poputaan fonufan.’ (Mattu 25:34) Ra pwapwaiti ar ukkuti forsefallin ewe Paratis me manausefallin ekkewe fitu million aramas mi malo seni Eitis. (Pwarata 20:13) Lon na fansoun ekkewe mi kepit repwe chuen nom fan iten ar repwe etiwasefalli ekkewe aramas repwe manausefallita? Lon 1925, Ewe Watchtower, minen May 1, a apasa: “Sisap anicho le apasa met Kot epwe fori are esap fori. . . . [Nge] sia tori ewe ekiek pwe chon ewe mwichefel [ekkewe chon Kraist mi kepit] repwe lingelo mwen manausefallin ekkewe chon luku lom lom [ekkewe chon luku mwen fansoun Kraist].” Lon pwal eu poraus ussun ika ekkoch me lein ekkewe mi kepit repwe pwal nom pwe repwe etiwasefalli ekkewe mi manausefal, The Watchtower, minen September 1, 1989 a apasa: “Esap lamot ena mettoch.”d

17. Ikkefa ekkewe wis mi amwarar ewe mwichen chon kepit repwe eti ewe King, Jises Kraist le eani?

¹⁷ Enlet, sise silei met epwe fis ngeni emon me emon chon Kraist mi kepit. Nge, an Moses me Ilaija nonnom ren Jises lon ewe wililo a pwarata pwe ekkewe chon Kraist mi kepit repwe nom ren Jises lupwen epwe feito lon lingan fan iten an epwe “aliwini emon me emon me ren an kewe foffor” atun an epwe apwungu aramas. Pwal eu, sia chechemeni an Jises we pwon pwe ekkewe chon Kraist mi kepit mi ‘pworacho’ repwe eti le ‘nemeni ekkewe mu ren wok mecha’ lon Armaketon. Lupwen Jises epwe feito lon lingan, repwe mommot ren me “apwungu ekkewe engol me ruu einangen Israel.” Repwe eti Jises le ‘kiterialo Setan fan pecher.’​—Mattu 16:27–​17:9; 19:28; Pwarata 2:26, 27; 16:14, 16; Rom 16:20; Keneses 3:15; Kol Fel 2:9; 2 Tesalonika 1:9, 10.

18. (a) Ifa lapalapen ewe angangen ‘achufengenni ekkewe mettochun lang lon Kraist’? (b) Met sipwe tongeni apasa ussun ‘ewe angangen achufengenni ekkewe mettochun fonufan lon Kraist’?

¹⁸ Ren an epwe nemeni mettoch meinisin, ekis me ekis Jiowa a mwokutukut pwe epwe “achufengenni mettoch meinisin lon ewe Kraist.” Ren “ekkewe mettochun lang,” a kanoto pwonuetaan an we kokkot. A fen arapoto ewe fofforun achufengenni Jises me meinisin ekkewe 144,000 lon lang ren “pupuluun ewe Lam.” Ina minne, a lapelo lamoten ekkewe brother mi asimau lein ekkewe ekkoch siip mi tupuni “ekkewe mettochun fonufan” ar repwe wiseni ekkoch wis tekia me ren ekkewe mi kepit fan iten ar repwe alisi pwiir kewe mi kepit. Met ren amwararen ewe fansoun sia manau lon! Sia fokkun pwapwa ren ach sipwe kuna pwonuetaan an Jiowa kokkot! (Efisus 1:9, 10; 3:10-12; Pwarata 14:1; 19:7, 9) Iwe, ekkewe ekkoch siip ra pwal pwapwaiti ar peppeni pwiir kewe mi kepit ren ir me ruu mwichen aramas ar repwe angangfengen ussun “eu chok mwichen siip” fan “emon chon mas” fan nemenien ewe King, Jises Kraist, me pwal ar repwe alinga ewe mi tekia seni meinisin, Jiowa Kot!​—Jon 10:16; Filipai 2:9-11.

[Footnote]

En mi Tongeni Awewei?

◻ Ifa ussun an Kot mwicheich a feffeita lon ewe aewin senturi?

◻ Ifa ussun ewe Mwichen Sou Pwungupwung a feffeita lon uruwoon Chon Pwarata Jiowa lon ach ei fansoun?

◻ Ikkefa ekkewe wokisin a pwarata pwe mi fich ngeni ekkewe ekkoch siip ar repwe eani ekkoch wis tekia lon an Jiowa we mwicheich?

◻ Ifa ussun “ekkewe mettochun lang” me “ekkewe mettochun fonufan” ra chufengen lon Kraist?

[Sasing lón pekin taropwe 16]

Inaamwo ika ese chuen nom lon Jerusalem ekkewe popun chon ewe mwichen sou pwungupwung lon Jerusalem, nge ena mwich a sopweilo an angang ikkewe ie

[Ekkewe sasing lón pekin taropwe 18]

Ekkewe chon Kraist mi kepit me asimau ir eu feioch ngeni noun Jiowa kewe aramas

C. T. Russell 1884-1916

J. F. Rutherford 1916-42

N. H. Knorr 1942-77

F. W. Franz 1977-92

M. G. Henschel 1992-