Repotun Chon Afalafala Porausen Ewe Muu
A Kuna Efou “Foun Pwei mi Fokkun Auchea”
“EWE muun lang a wewe ngeni emon chon kamo a kutta foun pwei mi auchea. Iwe, lupwen a kuna efou foun pwei mi fokkun auchea, a feilo amomolo mettoch meinisin minne mi wor ren, o a moni ewe foun pwei.” Ren ekkena kapas, Jises a awewei watten aucheaan an Kot Muu. (Mattu 13:45, 46) Fan chommong, ir mi mirititi aucheaan ewe Muu ra pennuku pwisin letiper pwe repwe tori ewe Muu. Ei poraus seni Pingtung County, Taiwan, a affata ena mettoch.
Lon 1991, Mr. and Mrs. Lin ra poputa le kaeo Paipel ren alillisin Chon Pwarata Jiowa. Lupwen emon nouwisen lamalam a rong ussun ar kaeo, a sotun peser pwe repwe fiti an lamalam. Pokiten ekkewe Lin ra eani angangen amomo chchaan pik me chek lon ewe leenien amomo, ra eisini ewe nouwis ika met meefian ussun ar angang. A apasa, “Mettoch meinisin Kot a forata aramas mi tongeni mongo.” Iwe nge, ekkewe Chon Pwarata ra peser pwe repwe pi met ewe Kapasen Kot a apasa. Ra kaeo pwe chcha a pin me ren Jiowa Kot, pun “manauen ewe man a nom lon chchaan.” (Lifitikos 17:10, 11, The New English Bible) Ina minne, chon Kraist mi enlet repwe “tumunur . . . seni chcha.” (Fofor 15:20) Pokiten ar kaeo Paipel ussun ena mettoch ekkewe Lin ra aukatiu ar amomo chcha, ikaamwo a watte ewe moni tolong ren. Iwe nge, ekiselo mwirin, a watte seni ena ewe sossot ra kuna.
Mwen ar kaeo ewe enlet, ekkewe Lin ra ffotuki 1,300 iraan pu won fonuer. Ikaamwo repwap kuna winner seni uwaan ekkena ira mwirin limu ier, nge, lupwen repwe uwaoch, ukukun moni tolong epwe tori $77,000 iteiten ier. Lupwen a arapoto fansoun ras, a nom ren ekkewe Lin eu kefil mi lamot. Ra fen kaeo seni Paipel pwe chon Kraist repwe alimochur seni “sokkun limengauen futuk meinisin me limengauen ngun meinisin” ren ar tumunur pwe rete un suupwa, safeien opuchopuch, are nunu pu, nge resap pwal apochokkula an aramas fori ekkena mettoch. (2 Korint 7:1) Met repwe fori?
Pokiten letipan a osukosuk, Mr. Lin a aukatiu an kaeo Paipel. Iwe, Mrs. Lin a amomo won lap seni $3,000 ekkewe foun pu seni ffotar kewe ira minen lom. Ina akaekis chok seni ewe ukukun moni repwe tongeni winneni ika repwe kini uwaan ffotar kewe ira meinisin. Iwe nge, mwelien letipen Mr. Lin a chuen akapwungu i.
A chuen chok osukosuk letipan, iwe, eu ran a tingorei ekkewe Chon Pwarata lon leenian pwe repwe wisen pokuetiu ffotan kewe ira pu. Ekkewe Chon Pwarata ra awewei ngeni pwe ina pwisin filian, ina popun, epwe ‘uwei pwisin osan’ me pwisin pokuetiu ekkewe ira. (Kalesia 6:4, 5) Ra pesei pwe epwe chechemeni ewe pwon lon 1 Korint 10:13, ewe mi apasa: “Esor eu sossot mi torikemi, pwe ekkewe chok mi fen tori aramas meinisin. Kot mi tuppwol, o esap mut ngenikemi sokkun sossot mi lap seni ami tufich, nge ren ekkewe sossot, epwe forata alen angasakemilo, pwe oupwe tongeni pworacho ngeni.” Ekkewe Chon Pwarata ra pwal awewei ngeni pwe “Ika am aupwe pokuetiu ffotom kewe ira, mwirin, epwe tufich om kopwe meefi pwe a mmen solap, iwe, kopwe apasa pwe tipisim minne a pout sonuk.” Ekiselo mwirin, Mrs. Lin a nelo, iwe, a rong akurangen efoch ngerenger. Puluwan me nour kewe ra pokuetiu ekkewe ira pu!
Mr. Lin a kuna pwe mi enlet an Jiowa pwon. A kunakun ewe sokkun angang mwelien letipan a kinamwe ren, me a atufichi an epwe wiliiti emon chon mwareiti Jiowa. A papatais lon eu an Chon Pwarata Jiowa mwichelap lon 1996 fan April.
Ewer, a ussun ita Mr. Lin a fen “amomolo mettoch meinisin mi nom ren” me a kamo “efou foun pwei mi fokkun auchea.” Iei a wiseni ewe wis mi auchea seni meinisin, wisen an epwe ririoch ngeni Jiowa Kot me angang ngeni an Muu.