“Oupwe Tipatchem” Atun A Kanoto Ewe Sopwolon

“Sopwolon mettoch meinisin a fen arapoto; iwe, oupwe tipatchem.”​—1 PITER 4:7.

1. Met weween ach sipwe “tipatchem?

ALON ewe aposel Piter asan epwe ita fokkun nemeni ifa ussun ekkewe chon Kraist repwe manaueni manauer. Iwe nge, Piter ese ereni ekkewe chon alleani ei poraus ar repwe ukutiu seni wiser kewe ran me ran lon manauer; ese pwal sotun aniuokkusur ren an a era pwe kiteter epwe muttir fis. Nge a chok eani ewe kapasen pesepes: “Oupwe tipatchem.” “Tipatchem” a wewe ngeni an epwe eani ekiek pwung, an epwe tipemecheres, mirit, me nemeniochu an kewe kapas me foffor. A wewe ngeni ach sipwe mut ngeni an Kot we Kapas an epwe nemeni ach kewe ekiek me foffor. (Rom 12:2) Pokiten sia manau “lein ei tappin aramas mi chok pwor pwal sokkosokkongau,” epwe lamot ngenikich ewe mettoch tipatchem ika sipwe tumunukich seni fitikoko me osukosuk.​—Filipai 2:15.

2. Ifa ussun mosonottamen Jiowa a efeiochu ekkewe chon Kraist ikenai?

² “Tipatchem” a pwal alisikich ach sipwe eani ekiek pwung ussun pwisin kich. (Taitos 2:12; Rom 12:3) A lamot ei mettoch pokiten minne a mak lon 2 Piter 3:9: “Jiowa esap amanga an we pwon, ussun chok ekkoch aramas ra ekieki ussun mang, nge a chok mosonottam ngenikemi, pun ese mochen pwe emon epwe poutmwalilo, pwe aramas meinisin repwe tori aier.” Nengeni pwe Jiowa a mosonottam, sap pokiten chok ekkewe chon lukulukumang, nge pwal “ngenikemi”​—chon ewe mwichefelin chon Kraist. Pwata? Pun “ese mochen pwe emon epwe poutmwalilo.” Eni mei chuen lamot ngeni ekkoch ar repwe siwili are amurinnolo ekkoch lapalaper fan iten ar repwe kuna ewe liffangen manau esemuch. Ina minne sipwe nengeni ekkoch lapalap eni epwe lamot ach sipwe siwili lon manauach.

“Tipatchem” lon Ach Chiechi ngeni Aramas

3. Ikkefa ekkewe kapas eis ekkewe sam me in repwe tongeni pwisin eisinir ussun nour kewe?

³ Imwen aramas epwe ita eu leenien kinamwe. Nge ren ekkoch, ina eu “imw mi wor fitikoko lon.” (An Salomon Fos 17:1) A ifa ussun om famili? Imwom we a ngaselo seni “tipekoum, pwal song, pwal kapasechou”? (Efisus 4:31) A ifa ussun noum kewe? Ra kan meefi ami tonger me aucheanir? (Alollo ngeni Luk 3:22) En mi kan awora fansoun pwe kopwe folenir me kaeo ngenir? En mi eani ewe ‘angangen emirit fan pwung’ nge esap fan song watte? (2 Timoti 3:16) Pokiten ekkewe nau ir “eu alemwir seni Jiowa,” Kot a fokkun ekkekieki ussun an aramas foffor ngenir.​—Kol Fel 127:3.

4. (a) Met epwe tongeni fis ika emon mwan epwe kirikiringau ngeni puluan we? (b) Ifa ussun ekkewe fefin repwe tongeni apochokkulata kinamwe ren Kot me pwapwa lon ewe famili?

⁴ Ifa ussun puluach? “Epwe chok pwal iei ussun ren mwan, pwe repwe tongei puluer ussun chok pwisin inisir. Ewe mi tongei puluan a tongei pwisin i. Pun esor emon mi oput pwisin fitukan, pwe a chok foleniochu o aucheani, ussun Kraist ren ewe mwichefel.” (Efisus 5:28, 29) Emon mwan mi kirikiringau, kon ekkeipo are tipeforea ese chok atai kinamween ewe famili nge epwe pwal atai an ririoch ngeni Kot. (1 Piter 3:7) Ifa ussun ekkewe fefin? Repwe pwal “nom fan nemenien puluer ussun chok ach Samol.” An ekiekin apwapwai Kot epwe tongeni alisi ewe fefin an epwe omusalo tipisin puluan we me nom fan nemenian nge esap wor tipengau. Fan ekkoch, eni ewe fefin epwe meefi pwe epwe lamot an epwe apasaou meefian. An Salomon Fos 31:26 a apasa ussun emon fefin mi lipwakoch: “A eani kapasen tipatchem, minne a aiti ngeni aramas a fis fan kirikiroch.” Ren an kirikiroch me an sufoliti puluan we, a akkamwochu an kinamwe ngeni Kot, iwe, a pwal apochokkula pwapwa lon ewe famili.​—An Salomon Fos 14:1.

5. Pwata ekkewe nau repwe alleasochisi an ewe Paipel fon ussun ar foffor ngeni semer kewe me iner?

⁵ Ami kana nau, a ifa ussun ami foffor ngeni sememi kewe me inemi? Ami fos ngenir a pwarata sufolungau ussun an a kan pwapwalo ren chon fonufan? Are en mi kan alleasochisi an ewe Paipel alluk: “Ami semirit kana, oupwe alleasochisi sememi kewe me inemi lon ewe Samol, pun ei sokkun foffor mi chok pwung. ‘Kopwe asamolu semom kewe me inom’; iei aeuin alluk mi fiti pwon: ‘pwe kopwe sopwoch, o manauettam won fonufan’”?​—Efisus 6:1-3.

6. Ifa ussun sipwe tongeni efisata kinamwe ren chienach kewe chon fel?

⁶ Sipwe pwal pwarata “tipatchem” lupwen sipwe “kukkutta kinamwe” lein chienach kewe chon fel. (1 Piter 3:11) Fan ekkoch epwe fis wewengau me an aramas tipefesen. (Jemes 3:2) Ika sipwe mut ngeni ewe mettoch oput an epwe mammar, epwe tongeni atai kinamween ewe mwichefel. (Kalesia 5:15) Ina popun sipwe mochen muttir awesalo ekkewe osukosuk; kukutta minne epwe efisata kinamwe.​—Mattu 5:23-25; Efisus 4:26; Kolose 3:13, 14.

“Tipatchem” me Wisen Chon ewe Famili

7. (a) Ifa ussun Paul a pesei an aramas pwarata “tipatchem” ren ekkewe angang ar repwe foffori? (b) Ifa ewe ekiek ekkewe mwan me fefin chon Kraist repwe eani ussun wiser kewe lon pekin famili?

⁷ Ewe aposel Paul a fonou ekkewe chon Kraist ar repwe “manaueni ewe manau mi mirit.” (Taitos 2:12) Iei eu poraus mi amwarar pwe lon ekkewe wokisin, Paul a fonou ekkewe fopul ar repwe “tongei puluer o pwal nour kewe semirit, repwe mosonoson, repwe limelimoch, repwe forfichi lon imwer.” (Taitos 2:4, 5) Paul a makkei ei poraus lon ekkewe ier 61-64 C.E., fitu ier mwen an epwe fis muchuloon ewe ototen chon Jus. Nge, mei chuen lamot ekkewe angang ra kan foffori, awewe chok, ren angang lon imw. Ina minne ekkewe mwan me fefin repwe mochen eani ekiek pwung ussun wiser kewe lon ewe famili pwe aramas resap “turunufasei ewe Kapasen Kot.” Emon mokuren famili a omusomus ngeni emon chon wasola pokiten imwan we a ekis torotorongau “pun i emon pioneer.” A murinno ach sipwe achocho fan iten ewe Muu, nge epwe pwal lamot ach sisap tunalo ach tumunufichi ach famili.

8. Ifa ussun ekkewe mokuren famili repwe tongeni itepok me ruuepek lon ar awora tufichin ewe famili?

⁸ Ewe Paipel a pesei ekkewe sam ar repwe akkomwa ar famili, iwe, a apasa pwe ika emon esap tumunufichi an famili “a fen pout seni ewe luku, o i a ingau lap seni emon chon lukun.” (1 Timoti 5:8) Nonnomun aramas epwe sokkofesen ren eu me eu fonuen fonufan, nge epwe murinno ach sipwe nemenifichi ach mocheniaiti pisek. Ewe sou makkei An Salomon Fos 30:8, a iotek, “Kosap mut ngeniei ai upwe woungau ika woumong.” Iwe nge, ekkewe sam me in rese mochen tunalo ekkewe mettoch lon pekin inis mi lamot ngeni nour kewe. Awewe chok, epwe eu ita alen tipatchem pwe emon esap awora tufichin an famili fan iten chok an epwe achocho fan iten ekkewe angangen Kot? Esap kan asonga noun kewe? Iwe nge, An Salomon Fos 24:27 a apasa: “Kopwe akkomwen ammolata o fotuki om kewe tanipi, pwe epwe wor minne kopwe manau seni, mwirin na kopwe apochokkulata chon le imwom kana.” Ewer, inaamwo ika a wor lamoten ekkewe mettoch lon pekin inis, nge a fokkun lamot ach ‘apochokkula chon le imwach kewe’ lon pekin luku me memmeef.

9. Pwata epwe eu alen tipatchem pwe ekkewe mokuren famili repwe ekieki ussun ar tufichin malo are uri och semmwen?

⁹ En mi fen mmolneta pwe epwe wor alillis ngeni om famili ika kopwe malo? An Salomon Fos 13:22 a apasa: “Emon aramasoch a likiti woun ngeni noun noun kana.” Lukun an ekkewe sam me in likiti ngeni nour kewe ewe mettoch sile ussun Jiowa me ar ririoch ngeni, repwe pwal mochen awora ngenir ekkewe mettoch lon peki inis. Won chommong fonu ekkewe sam mi ekiekin apwonuetaochu wiser, repwe sotun isoni och moni lon bank, repwe eani echo taropween minne letiper (will), me moni insurance. Popun pun, sap minne noun Kot kewe aramas repwe ngaselo seni “fetalin fansoun me minne epwe tongeni serenikich.” (Än Salomon Afalafal 9:11) Moni epwe “fan iten tumun,” iwe, fan chommong an aramas mmolneta epwe tongeni tumunur seni osukosuk. (Än Salomon Afalafal 7:12) Won ekkewe fonu, ikkewe ese wor alillis lon pekin tokter seni ewe muu ie, ekkoch ra filata pwe repwe isoni och moni fan iten ika epwe fis semmwen, are repwe moni medical insurance.a

10. Ifa ussun ekkewe sam me in chon Kraist repwe tongeni “iseis” fan iten nour kewe?

¹⁰ Ewe Paipel a pwal apasa: “Ese murinno ngeni semirit repwe iseis ngeni semer kewe me iner, pwe semer me iner ngeni nour kewe.” (2 Korint 12:14) Lein chon fonufan, ekkewe sam me in repwe kan isoni moni fan iten nour kewe repwe fiti sukul me repwe pupulu, iwe, epwe fan iten ar repwe sopwoch. En mi fen ekieki ussun met kopwe fori pwe noum we epwe sopwoch lon pekin ngun? Ren chok awewe, sipwe apasa pwe emon aluwon a achocho ngeni an epwe angang ngeni Jiowa full-time. Inaamwo ika ekkewe pioneer rese ekiekin kukkutta seni are meefi pwe ekkewe ekkoch repwe alisir, nge eni fan tong seman me inan repwe filata ar repwe ‘awora ngeni me ren minne a osupwang ren’ pwe epwe tongeni likiitu lon ewe angang afalafal full-time.​—Rom 12:13; 1 Samuel 2:18, 19; Filipai 4:14-18.

11. An emon ekieki pwe a wor lamoten ewe mettoch moni epwe wewe ngeni pwe a lukulukumang? Awewei mwo.

¹¹ Ach eani ekiek pwung ussun ifa ukukun lamoten ngenikich moni, ese wewe ngeni pwe sise luku pwe a arapoto muchuloon an Satan otot mi ngau. A chok wewe ngeni ach pwarata “tipatchem” me mirit. (An Salomon Fos 2:7; 3:21) Lon eu fansoun, Jises a apasa pwe “noun ei fonufan ra tipatchem lap seni noun saram” lon ar nounou moni. (Luk 16:8) Ina popun, ekkoch ra kuna ewe lamoten ar repwe siwili ifa ussun repwe nounou nour moni pwe repwe tongeni tumunufichi ar famili.

“Tipatchem” lon Ach Ekiek ussun Sukul

12. Ifa ussun Jises a aiti ngeni noun kewe chon kaeo ifa ussun repwe siwil ngeni ekkewe minefon lapalapen fonufan?

¹² “Lapalapen fonufan a chok sissiwil,” me a muttir fis siwil watte lon pekin pochokkulen moni me afeffeitaan forutaan mwesin (technology). (1 Korint 7:31) Iwe nge, Jises a aiti ngeni noun kewe chon kaeo ar repwe sissiwil. A erenir lupwen a keran tinirelo lon ar angangen afalafal: “Ousap uwei gold are silfer are kapa lon ami pwes; ousap pwal uwei chota lon ami fetal, are ruu soch, are tukutukun pechemi, are efoch wok. Pun ewe chon angang a fich ngeni anan mongo.” (Mattu 10:9, 10) Iwe nge, lon pwal eu fansoun, Jises a apasa: “Nge iei, are mi wor ren emon eu pwes, epwe uwei; o pwal ussun chok chota.” (Luk 22:36) Met a siwil? Lapalapen fonufan. A kon weires ngenir pokiten ekkewe chon lamalam, iwe iei, repwe pwisin uwei aner mongo.

13. Epwe ifa populapen an emon fiti sukul, me ifa ussun ekkewe sam me in repwe tongeni alisi nour kewe lon ei mettoch?

¹³ A pwal ussun chok ikenai, eni ekkewe sam me in repwe ekieki ussun pochokkulen moni ikenai. Awewe chok, en mi fen akkota pwe epwe nafoch an noum kewe fiti sukul? Ewe popun noum kewe repwe fiti sukul epwe akkaeuin fan iten ar repwe lipwakoch lon ewe wis chon angang ngeni Jiowa. Iwe, ewe sile mi lamot seni meinisin epwe ewe sokkun lon pekin silei Kot. (Aisea 54:13) Ekkewe sam me in repwe pwal ekieki ussun an nour kewe tufichin pwisin tuttumunur lon pekin moni. Ina minne, emmweni noumi kewe me alisir pwe repwe filiochu minne repwe kaeo lon sukul, me fos ngenir ussun ika epwe, are esap eu alen tipatchem ar repwe fiti eu sukul tekia. Ewe famili epwe wisen filata, iwe, ese pwung ren ekkewe ekkoch ar repwe turunufasei minne ra fori. (An Salomon Fos 22:6) Nge epwe ifa ussun ren ir kewe mi filata ar repwe pwisin asukula nour kewe lon imwer we?b Inaamwo ika chommong ra fen sopwoch, nge ekkoch ra kuna pwe a fokkun weires, me nour kewe rese kon lien mirit. Iwe, ika en mi ekieki ussun om kopwe pwisin asukula noum kewe, ekiekifichi mwo ika ka wesewesen lipwakoch ren ena sokkun angang me ika kopwe ekita met kopwe sopwoch ren?​—Luk 14:28.

‘Kosap Chechei Ekkewe Mettoch mi Watte’

14, 15. (a) Pwata a pout seni Baruch an itepok me ruuepek lon pekin ngun? (b) Pwata epwe umwes an epwe ‘chei ekkewe mettoch mi watte’?

¹⁴ Pokiten esaamwo fis muchuloon ei otot, eni ekkoch repwe ekiekin chei ekkewe mettochun fonufan​—ewe esin angang mi atoto iteuoch, ekkewe sokkun angang repwe pisekisek ren, me ar repwe woummong. Ekieki mwo ussun noun Jeremaia we seker, Baruch. A eani och kapasen alolilen: “Riaffou ngeniei, pun Jiowa a achu riaffou ngeni ai weires. Ua malulu ren ai ngungu, nge esap wor ai leenien kinamwe.” (Jeremaia 45:3) A malulu Baruch. A fokkun weires an angang ngeni Jeremaia. (Jeremaia 36:14-26) Ussun ita nge esap wor muchuloon an angang weires. Iwe, epwe 18 ier tori fansoun tatiuen Jerusalem.

¹⁵ Jiowa a ereni Baruch: “Nengeni! Upwe ataetiu minne ua aueta o uttata minne ua fotukatiu. Iei ussun minne upwe fori ngeni unusen ewe fonu. Nge, ka kutta mettoch mi watte fan itom. Kosap kutter.” Baruch ese chuen itepok me ruuepek. A poputa le ‘kutta mettoch mi watte fan itan,’ eni pwe epwe pisekisekilo, an epwe kuna eingeing seni aramas, are lukulukoch ren pisekin kewe. Pokiten Jiowa epwe “uttata, pwal mwo nge ekkewe fonu meinisin,” epwe met popun an emon epwe chei ekkena mettoch? Ina minne, Jiowa a ngeni Baruch ei kapasen achechem: “Pun upwe awarato feiengau won aramas meinisin. Nge ngang upwe amwochu manauom lon ekkewe leeni meinisin ia kopwe feilo ie.” Ekkewe pisek repwe fiti kiteterin Jerusalem! Jiowa a apasa pwe epwe “amwochu chok manauan.”​—Jeremaia 45:4, 5.

16. Ifa ewe lesen noun Jiowa kewe aramas ikenai repwe tongeni kaeo seni kunaen Baruch?

¹⁶ Baruch a etiwa an Jiowa we angangen kapwung, iwe, ren enletin an Jiowa we pwon, Baruch ese malo. (Jeremaia 43:6, 7) Met ren pochokkulen ewe lesen fan iten noun Jiowa kewe aramas ikenai! Esap iei ewe fansoun ach sipwe ‘kutta ekkewe mettoch mi watte fan itach.’ Pwata? Popun, pun “ewe fonufan epwe morelo, o pwal an kewe mochenia-ingau.”​—1 John 2:17.

Aeafichi ewe Nusun Fansoun

17, 18. (a) Ifa meefien Sona lupwen ekkewe chon Ninifa ra aier? (b) Ifa ewe lesen Jiowa a aiti ngeni Sona?

¹⁷ Ifa ussun sipwe tongeni aeafichi ewe lusun fansoun? Sipwe kaeo seni kunaen ewe soufos Sona. A “feilo Ninifa. . . , iwe, a koko, ‘Mwirin faik ran Ninifa epwe talo.’” Sona a mairu lupwen chon Ninifa ra aeir! Jiowa ese atai ewe telenimw. Met meefien Sona? “O Jiowa, ua fokkun tingor ngonuk pwe kopwe angei seniei manauei, pun ua efich ai upwe malo mwen ai upwe manau.”​—Sona 3:3, 4; 4:3.

¹⁸ Jiowa a aiti ngeni Sona eu lesen mi lamot. A “amarata efoch ira, pwe epwe anuru mokuren Sona . . . Iwe, Sona a fokkun pwapwa ren ewe ira.” Iwe nge, a chok mwochomwoch an Sona pwapwa pun a muttir pwasalo me malo ewe ira. Sona a “aiengau” pokiten pwichikaren inisin. Jiowa a apochokkulata ewe lesen ren an apasa: “En mi song pokiten maloon ewe ira . . . Nge ngang usap achika Ninifa ewe telinimw mi lapalap, ia a wor ie lap seni ipuku ruwengerou aramas resaamwo silei lefilen och me ngau, a pwal wor chommong man lon?”​—Sona 4:6, 7, 9-11.

19. Ifa ewe sokkun ekiek-mwaal sia mochen tumunukich seni?

¹⁹ Sona a ekieki chok pwisin i! A tongeni meefi lolilen pokiten efoch ira, nge ese wor ekis chok tong ngeni ekkewe chon Ninifa​—ekkewe aramas ‘rese silei lefilen peliefichir me peliemwaalir,’ lon pekin ngun. Eni sipwe pwal mochen an epwe war kiteterin ei fonufan mi ngau, iwe, epwe pwung! (2 Tesalonika 1:8) Iwe nge, lon ach fansoun witiwit, mei wor wisach ach sipwe alisi ir kewe mi letipwenechar, ir kewe rese silei ‘lefilen peliefichir me peliemwaalir’ lon pekin ngun. (Mattu 9:34; Rom 10:13-15) Kopwe aea ewe nusun fansoun mwochomwoch pwe kopwe alisi aramas ar repwe angei ewe sile mi auchea ussun Jiowa? Ifa ewe angang epwe tongeni nonno ngeni ewe angangen alisi emon pwe epwe kuna manau?

Sopweilo le Manau Ren “Tipatchem”

20, 21. (a) Epwe ifa ussun sipwe tongeni pwarata “tipatchem” lon ekkewe ran mwach? (b) Ikkefa ekkewe feioch epwe torikich seni ach manaualo ren “tipatchem”?

²⁰ Ren feffetalin an Satan otot ngeni kiteter, epwe tori kich ekkewe minefon sossot. Oruuen Timoti 3:13 a oesini: “Ekkewe aramas ingau, pwal ekkewe chon likotuputup, repwe chok alapalo ar foffor-ingau.” Nge sisap “chipwangelo are apwangapwangelo, lon ngunumi.” (Ipru 12:3) Kutta pochokkul seni Jiowa. (Filipai 4:13) Sipwe tufichin sissiwil fan iten ach sipwe likiitu lon ekkeei fansoun mi ngangauelo, nge sisap chok lesokuriiti ekkewe lapalapen lom. (Än Salomon Afalafal 7:10) Sipwe tipatchem, me sipwe kukutta ekkewe emmwen seni ewe “chon angang mi tuppwol me tipatchem.”​—Mattu 24:45-47.

²¹ Sise silei ukukun nusun ewe fansoun. Nge, sia tongeni apasa pwe “a arapoto sopwolon mettoch meinisin.” Tori warotoon ewe sopwolon, sipwe manau ren “tipatchem” lon ach foffor ngeni ekkewe ekkoch, lon ach tutumunu ach famili, me pwal wisach lein ekkewe chon nukun. Ren ach sipwe fori ena, oukich meinisin sipwe tongeni luku pwe sipwe “kinamwe, o esap wor remi och sor are tikitikipwul.”!​—2 Piter 3:14.

[Footnote]

Ekkewe Poraus Sipwe Enniwili

◻ Ifa ussun sipwe tongeni pwarata “tipatchem” lon ach chiechi ngeni aramas?

◻ Ifa ussun sipwe tongeni itepok me ruuepek lon ach akkapwonueta wisach kewe lon ach famili?

◻ Pwata a lamot ngeni ekkewe sam me in ar repwe ekieki ussun minne nour kewe repwe kaeo lon sukul?

◻ Ikkefa ekkewe lesen sipwe tongeni kaeo seni Baruch me Sona?

[Sasing lón pekin taropwe 10]

Lupwen emon mwan me fefin repwe kirikiringaufengennir, repwe atai ar ririoch ngeni Jiowa

[Sasing lón pekin taropwe 11]

Ekkewe sam me in repwe mochen ekieki ussun minne nour kewe repwe kaeo lon sukul