Jiowa A Kan Aucheani Om Angang Ngeni Ren Unusen Letipom

“Nge minne oupwe fori, oupwe achocho ngeni seni lon letipemi, ussun chok fan asengesin Jiowa, nge esap aramas.”​—KOLOSE 3:23.

1, 2. (a) Ifa ewe wis mi lap seni meinisin sipwe tongeni wiseni? (b) Fan ekkoch, pwata sisap tufichin fori mettoch meinisin sia mochen fori lon ach angang ngeni Kot?

ACH angang ngeni Jiowa, iei ewe wis mi lap seni meinisin sipwe tongeni wiseni. Ren eu popun mi auchea, seni lom ei chassi a peppesei chon Kraist pwe repwe fiti ewe angangen afalafal, me epwe lapalo ar “achocho ngeni” ika pwe mi tufich. (1 Tesalonika 4:1) Iwe nge, sap minne fansoun meinisin sipwe tufichin fori mettoch meinisin letipach a tipeni lon ach angang ngeni Kot. Emon sister mi lipich, nge a papatais arap ngeni 40 ier lom, a apasa pwe “A lamot ai upwe angang full-time pokiten nonnomi. Ua angang, esap fan iten ai upwe kamo chommong uf mi ling are lo kukkunou lon ekkewe fonuen ekis, nge fan iten tufichin manauei, me a kapachelong liwinin lon pioing me leenien fori ni. Ua meefi pwe ua angang ngeni Jiowa ren ewe chok ekis lusun ai fansoun.”

² Tong ngeni Kot a kan amokutukich pwe sipwe apwonueta ewe angangen afalafal ukukun ach tufich. Nge fan chommong nonnomuch epwe eppetikich lon ewe angang. Eli a kan watte ach angang fan iten wisach kewe me ren Paipel, nge a pwal kapachelong wisach ngeni ach famili. (1 Timoti 5:4, 8) Lon ekkeei “fansoun weires mi forea an aramas pwakini,” manauen aramas a fen kon ur ren osukosuk. (2 Timoti 3:1) Lupwen sisap tufichin fori mettoch meinisin sia tipeni lon ewe angangen afalafal, eli letipach epwe mengiringir. Eli sipwe asuku ika Kot a pwapwa ren ach fel ngeni i.

Lingen Ach Fiti ewe Angang ren Unusen Letipach

3. Met Jiowa a ekiekin kuna senikich meinisin?

³ Lon Kol Fel 103:14, Paipel a oururukich ren an apasa pwe Jiowa a “silei ussun meta sia fisita seni; a pwal chechemeni pwe kich seni falangen ppwul.” Lap seni meinisin, a weweiti met esap pwak rech. Esap kutta senikich met sisap tufichin fori. Nge met a kan ekiekin kuna senikich? Iei eu mettoch aramas meinisin, ese lifilifil ika mei fet nonnomur, repwe tongeni fori: “Nge minne oupwe fori, oupwe achocho ngeni, seni lon letipemi, ussun chok fan asengesin Jiowa, nge esap fan asengesin aramas.” (Kolose 3:23) Ewer, Jiowa a ekiekin kuna seni oukich meinisin ach sipwe angang ngeni ren unusen letipach.

4. Met weween angang ngeni Jiowa ren letip mi unus?

⁴ Ifa weween ach sipwe angang ngeni Jiowa ren unusen letipach? Ewe kapasen Kriik mi affou ngeni “unusen letip” a wewe ngeni “seni ewe soul.” Ewe “soul” a wewe ngeni unusen ewe aramas, fiti mettoch meinisin inisin me tupuwan a tufichin fori. Ina minne, ach angang ren unusen letipach a wewe ngeni ach ussun ita asoresini manauach, weween, sipwe aea mettoch meinisin mi nom rech lon an Kot angang ren ukukun ach tufich. A wewe ngeni ach sipwe fori mettoch meinisin sia tufichin fori.​—Mark 12:29, 30.

5. Ifa ussun porausen ekkewe aposel a pwarata pwe sap minne epwe lollopok angangen meinisin lon ewe angangen afalafal?

⁵ Ach angang ren unusen letipach a ita wewe ngeni pwe epwe lollopok angangen meinisin lon ewe angangen afalafal? Esap pwak ena, pun mi sokkofesen nonnomun me tufichin emon me emon. Ekieki mwo noun Jises kewe aposel mi tuppwol. Esap tufich an epwe lollopok ar angang. Awewe chok, sia silei ekis chok ussun ekkoch lein ekkewe aposel, awewe chok ren Saimon ewe re Kenan me Jemes noun Alifios. Eli ese lien watte ar angang lon ewe wis aposel. (Mattu 10:2-4) Nge Piter a tufichin eani chommong angang mi chou pwe iwe Jises a pwal mwo nge ngeni i “ekkewe kien ewe muu”! (Mattu 16:19) Piter ese tekiata mwen ekkewe lusun. Lupwen a tori Jon ewe langepwi ussun ewe Jerusalem Sefo lon ewe Pwarata (ina epwe 96 C.E.), a kuna 12 foun longolong me a mak wor “iten ekkewe engol me ruuemon chon kuno.”a (Pwarata 21:14) Jiowa a aucheani angangen ekkewe aposel meinisin, ikaamwo a mwar watte angangen ekkoch lap seni ekkewe lusun.

6. Lon an Jises kapas awewe ussun ewe chon amora pwikil, met a kan fis ngeni ewe pwikil mi morotiu won “ewe ppwul mi murinno,” me ikkefa ekkewe kapas eis mi piita?

⁶ Pwal ussun chok, Jiowa esap kutta senikich an epwe lollopok ach fiti ewe angangen afalafal. Jises a affata ena lon ewe kapas awewe ussun ewe chon amora pwikil, nge a aweweifengenni ewe angangen afalafal me ewe angangen amorafeili pwikil. Ewe pwikil a morotiu won ppwul mi sokkofesen, weween, a sokkofesen lapalapen letipen ir kewe mi rong ewe afalafal. Jises a awewei pwe “Nge ekkewe mi morotiu won ppwul murinno, iei i ewe mi rong ewe kapas o wewe ren. A fen uwa, ekkoch ra uwaani ipuku, ekkoch wone, o ekkoch ilik. (Mattu 13:3-8, 18-23) Ifa weween ena uwa, me pwata a sokkofesen uwaan emon me emon?

7. Ifa uwaan ewe pwikil mi morotiu, me pwata a sokkopat lollon ekkewe uwa?

⁷ Pokiten ewe pwikil mi morotiu, ina “kapasen ewe muu,” uwaan a wewe ngeni ewe angangen esilefeili are afalafala ena kapas ngeni aramas. (Mattu 13:19) Uwaan a sokkopat, weween, lefilen ilik me ipuku, pun tufichin me nonnomun aramas a sokkofesen. Eli emon mi pochokkul inisin epwe tongeni awattei an fansoun afalafal, nge emon mi apwangapwang are chinnap esap tongeni. Eli emon sarafo mi lipich, nge esor an famili epwe wisen tutumunu, epwe tongeni afalafal lap seni emon mi angang full-time fan iten an awora tufichin an famili.​—Alollo ngeni Än Salomon Fos 20:29.

8. Ifa ekiekin Jiowa ussun ir kewe mi awora ar liffang ren ukukun ar tufich?

⁸ Me ren Kot, ewe emon mi angang ngeni ren unusen letipan, nge a uwaani ilik, a ita kisikis an achocho seni ewe emon mi uwaani ipuku? Aapwi, esap ina! Eli epwe sokkofesen en me uwaan, nge Jiowa a pwapwa ika sipwe angang ngeni ukukun ach tufich. Chechemeni pwe meinisin ekkewe uwa mi sokkopat ra popu seni letip mi wewe ngeni “ppwul mi murinno.” Ewe kapasen Kriik (ka·losʹ) mi affou ngeni “murinno” a wewe ngeni och mettoch mi “lingoch” me a kan “mmeseik ngeni ewe letip, me a eu minen ngonongon.” Sia pwapwa le silei pwe lupwen sipwe angang ukukun ach tufich, letipach a lingoch mwen mesen Kot!

Esap Eani Apopo Lefilach

9, 10. (a) Eli letipach epwe meefata met sokkun ekiek ese pwung? (b) Ifa ussun ewe kapas awewe lon 1 Korint 12:14-26 a pwarata pwe Jiowa ese kan eani apopo woch me chienach kewe lon ach angang?

⁹ Iwe nge, eli epwe sokkolo meefien letipach ese unusoch. Eli epwe apopofengenni ach angang me angangen chienach kewe. Eli epwe meefi pwe ‘Angangen ekkewe fitemon le afalafal a mmen lap seni ai angang. Ita pwata Jiowa epwe pwapwa ren ai angang?’​—Alollo ngeni 1 Jon 3:19, 20.

¹⁰ Ekiekin me fofforun Jiowa a mmen tekia seni ekiekich me fofforuch. (Aisea 55:9) Sia ekis weweiti ekiekin Jiowa ussun angangen emon me emon seni 1 Korint 12:14-26, pwe me ikewe ie ewe mwichefel a ussun eu inis mi wor chommong kifetin, weween, a wor foun mesan, poun, pechen, selingan, me met kewe. Ekieki mwo inisich. Sipwe umwes ika sipwe apopofengenni mesach me pouch are pechech me selingach! Eu me eu kifetin a wor en me wisan, nge meinisin kifetin ra lamot me auchea. Pwal ussun chok, Jiowa a kan aucheani om angang ren unusen letipom, ese lifilifil ika angangen chienom kewe a lap are kis sonuk.​—Kalesia 6:4.

11, 12. (a) Pwata ekkoch repwe tongeni meefi pwe ir mi “apwangapwang” are “rese lien auchea”? (b) Ifa ekiekin Jiowa ussun ach angang?

¹¹ Pokiten sia ppet ren apwangapwangen inisin, ach chinnapelo, are met kkan mwo, eli fan ekkoch sipwe meefi pwe sia “apwangapwang” are sise “lien auchea.” Nge esap ina ussun ekiekin Jiowa. Iei alon Paipel: “Nge a fokkun lamot rech ekkewe kifetin inisich inaamwo pwe mi apwangapwang seni ekkewe ekkoch. O sia pwal aucheani ekkewe kifetin inisich sia ekieki ese mwo auchea . . . Nge iei ussun Kot a apachafengenni ewe inis; a fokkun aucheani ekkewe kifetin mi sap auchea.” (1 Korint 12:22-24) Iwe, meinisin repwe tongeni ar repwe achengicheng ngeni Jiowa. A kan aucheani ewe ukukun angang sia fori fan ach kewe apwangapwang. Letipom ese kan achunguk pwe kopwe mochen angang ren unusen om tufich ngeni ena Kot mi pwarata tong me weweoch?

¹² Iwe, ewe mettoch mi lamot ngeni Jiowa, esap om fori ewe ukukun angang pwal emon a fori, nge minne chok pwisin en kopwe tongeni fori. A pwa an Jiowa aucheani angangen emon me emon leich ren an Jises foffor ngeni ruuemon fefin mi fokkun sokkofesen nonnomur lon ekkewe saingoon ranin manauan won fonufan.

Eu Liffang mi “Fokkun Liwinimmong” seni Emon Fefin mi Meefi Kilisou

13. (a) Met sokkun poraus a chu ngeni ewe fansoun an Meri epiti ngeni lo mokuren me pechen Jises? (b) Ifa liwinin ewe lo Meri a epiti ngeni?

¹³ Lekuniolun Alimu, Nisan 8, Jises a tori Petani, eu kukkun sopw leotiuen ewe Chuukun Olif, ina epwe ruu mwail towauan seni Jerusalem. A wor chienen Jises mi achengicheng lon ena sopw, weween, Meri, Marta, me mongeier we Lasares. Eli a fan chommong ar awasola Jises lon imwer. Nge lekuniolun Ammol, Jises me chienan kewe ra mongo lon imwen Saimon, emon mi fen pin uri rupwun pwotur me lom, nge eli a chikareta ren Jises. Lupwen Jises a konetiu unukkun ewe chepel, Meri a eani och foffor fan tipetekison, nge a pwarata an tong mi lap ren ewe mwan mi amanauata mongeian we. A suuki eu ruumen lo mi pwokkus, nge a “mmen liwinimmong.” Ewer, a fokkun mowatte! Liwinin a ukukun 300 denarii, liwinin an emon angang ukukun eu ier. A ninatiu won mokuren Jises ena lo mi pwokkus me pwal won pechen kewe. A pwal mwo ngeni tolupwasei pechen kewe ren mokuran.​—Mark 14:3; Luk 10:38-42; Jon 11:38-44; 12:1-3.

14. (a) Met meefien ekkewe chon kaeo ussun fofforun Meri? (b) Ifa ussun Jises a peni Meri?

¹⁴ Ekkewe chon kaeo ra song! Ra eis, ‘Pwata a solap ena?’ Jutas a tukumi an ekiek sola ren an eani och kapas ussun lamoten alillis ngeni chon osupwang, nge iei alon: “Pwata ese amomolo ei lo pwokkus won ulupuku moni silfer o fangolo ngeni chon woungau?” Meri a chok fanelo. Iwe nge, iei alon Jises ngeni ekkewe chon kaeo: “Likiti chok. Pwata oua pweni neminnan, nge a fen fori ngeniei eu foffor mi murinno [eu fos mi ussun ka·losʹ]. . . . Neminnan a chok fori ukukun an tufich. A fen epiti won inisi mwen ai peias. Iwe, enlet, upwe apasa ngenikemi, pwe ekis meinisin repwe afalafala ewe kapas allim won unusen fonufan, repwe pwal apasata minne neminnan a fori pwe epwe ussun chok achechemenian.” Neman murinnon alon Jises a oururu letipen Meri!​—Mark 14:4-9; Jon 12:4-8.

15. Pwata a chung letipen Jises ren fofforun Meri, me ifa ewe lesen sia kaeo seni ussun ach angang ngeni Kot ren unusen letipach?

¹⁵ A mmen chung letipen Jises ren minne Meri a fori. An ekiek nge fofforun neminewe a wesewesen auchea. Sap minne liwinin ewe liffang a lamot ngeni Jises pwe an neminewe “fori minne a tufich ngeni.” Lupwen a suuk ewe alen pwarata kisaseu, neminewe a muttir mokut me a liffangolo minne a tufich ngeni. Pwal ekkoch Paipel ra apasa pwe “Neminewe a fori ukukun an tongeni,” are, “Neminewe a fen fori minne a tufich ngeni.” (An American Translation; The Jerusalem Bible) An Meri liffang a popu seni unusen letipan pun a fori ewe nampa eu mettoch a tufichin fori. Ina weween ach fori ewe angang ren unusen letipach.

Emon Fefin mi Ma Puluwan a Liffangolo “Ruuefou Kukkun Senis”

16. (a) Pwata Jises a tongeni kuna ewe liffang emon fefin mi ma puluwan a eani? (b) Ifa ukukun ewe senis ewe fefin mi ma puluwan a eani asor?

¹⁶ Ruu ran mwirin, lon Nisan 11, Jises a nomottam lon ewe imwen fel, iwe, me ikana ie aramas ra anini ngeni ussun an nemenem me a polueni kapas eis mi forea ussun takises, ewe manausefal, me met kkan mwo. A apwungu ekkewe soumak me Farisi pokiten ar kewe foffor mi ngau me ar “angei seni fefin mi ma puluwer imwer kewe.” (Mark 12:40) Iwe, Jises a mottiu, neman lon ewe Leenien Chulapen Fefin, nge me ren eorenien chon Jus, a wor 13 pworun asor ikewe ie. Atun an mommot, a nengeni an ekkewe aramas walong ar kewe asorun moni. Chommong aramas mi pisekisek ra feito, nge eli ekkoch leir ra eani pwomwen aramas mi pwung pokiten ar mochen pwe aramas repwe ingeitir. (Alollo ngeni Mattu 6:22.) Jises a annefota emon fefin. Eli ekkewe aramas mi nom ikewe ie rese kuna och mettoch mi sokkolo ussun ewe fefin are an liffang. Nge Jises, ewe mi tufichin silei masouen letipen aramas, a silei pwe neminewe “emon fefin mi ma puluwan, nge mi woungau.” A pwal silei ukukun an liffang, “ruuefou moni kisikis.”b​—Mark 12:41, 42.

17. Ifa ukukun an Jises aucheani ewe liffang seni ewe fefin mi ma puluwan, me met sia kaeo ussun ach kewe liffang ngeni Kot?

¹⁷ Jises a korata noun kewe chon kaeo, pun a mochen ar repwe pwisin kuna ewe lesen epwe aiti ngenir. Jises a apasa pwe neminewe “a isenalong lap seni ir meinisin mi isenalong lon ewe leenien asor.” An ekiek nge minne neminewe a walong a lap seni ekkewe moni meinisin ekkewe lusun ra walong. Neminewe a liffangolo “meinisin mi nom ren,” weween, lusun noun senis. Ren an foffor, a anomu manauan le poun Jiowa. Ewe aramas mi awora ewe lesen fan iten ewe fofforun liffangolo ngeni Kot, ina i emon mi eani eu liffang mi fokkun kisikis. Iwe nge, mwen mesen Kot, ese tongeni kauk liwinin!​—Mark 12:43, 44; Jemes 1:27.

Eu Lesen Seni Ekiekin Jiowa Ussun Ach Angang ren Unusen Letipach

18. Ifa ewe lesen sia kaeo seni an Jises memmeef ussun ekkena ruuemon fefin?

¹⁸ Seni an Jises kapas ussun ekkena ruuemon fefin, sia kaeo ekkoch lesen mi auchea fan iten ekiekin Jiowa ussun ach angang ngeni ren unusen letipach. (Jon 5:19) Jises ese apopofengenni ewe fefin mi ma puluwan me Meri. A lollopok an aucheani ekkewe ruuefou senis seni ewe fefin mi ma puluwan me ewe lo mi “fokkun liwinimmong” seni Meri. Pokiten ir me ruuemon ra liffangolo ewe nampa eu mettoch mi nom rer, mwen mesen Kot ir me ruu ar kana liffang ra auchea. Iwe, kosap lichipwung ika kosap tongeni fori mettoch meinisin ka mochen fori lon om angang ngeni Kot. Jiowa a pwapwa ren minne ka tufichin fori. Chechemeni pwe Jiowa a “kuna leluken aramas,” ina minne, a unusen weweiti mochenin letipom.​—1 Samuel 16:7.

19. Pwata sisap apwungu met chienach kewe ra foffori lon ar angang ngeni Kot?

¹⁹ Ekiekin Jiowa ussun an aramas angang ngeni ren unusen letiper epwe ita nemeni ach ekiek me foffor lefilach. Esap eu fofforun tong ach esiita angangen chienach kewe are ach apopofengenni angangen ruuemon! A eu minen aletipechou makkeien emon chon Kraist: “Fan ekkoch aramas ra ameef ngenikich pwe esor aucheaach ika esap kich pioneer. Nge a lamot ngenikem mi angang weires pwe aupwe likiitu le afalafal ussun ewe Muu am aupwe meefi pwe am mi pwal auchea, ikaamwo esap am pioneer.” Sipwe chechemeni pwe esap wisach ach sipwe apwungalo fan iten emon chienach chon Kraist met epwe fori ren an epwe angang ren unusen letipan. (Rom 14:10-12) Jiowa a kan aucheani ewe angang ekkewe fitu million chon afalafala ewe Muu ra fori ren unusen letiper, me epwe pwal ita ina ussun ach memmeef.

20. A kan nampa eu ach sipwe eani met sokkun ekiek ussun chienach kewe chon fel ngeni Kot?

²⁰ Iwe nge, epwe ifa ussun ika angangen ekkoch le afalafal a kukkun seni minne ra tufichin fori? Eli kukkunuloon angangen emon chienach chon luku epwe pwarata pwe a lamot ngeni och alillis are kapasen apochokkul. Nge sisap monuki pwe ren ekkoch, eli ar angang ren unusen letiper a ussun ekkewe ruufou moni kisikis a nom ren ewe fefin mi ma puluwan, nge esap ewe lo mi liwinimmong a nom ren Meri. Epwe kan nampa eu ach sipwe ekieki pwe pwiich kewe ra tongei Jiowa me ena tong epwe amokutur pwe repwe angang ngeni ukukun ar tufich, nge sap minne repwe liseangas. A enlet pwe emon mi aucheani wisan ngeni Jiowa esap filata pwe an angang ngeni Kot epwe kukkun seni minne a tufich ngeni!​—1 Korint 13:4, 7.

21. Menni angang mi auchea chommong ra kan achocho ngeni, me ikkefa ekkewe kapas eis mi piita?

²¹ Iwe nge, ren chommong lein noun Kot kewe aramas, ar angang ren unusen letiper a wewe ngeni ar fiti eu angang mi fokkun watte feiochun, nge iei ewe angangen pioneer. Met sokkun feioch ra kan kukkuna? Nge ifa ussun ika sise tufichin pioneer? Ifa ussun sipwe tongeni pwarata pwe a nom rech ewe ngunun pioneer? Ikkena ekkewe kapas eis sipwe kaeo ussun lon ena lesen mwirin ei.

[Footnote]

Ifa Ussun Kopwe Polueni?

◻ Met weween an aramas angang ngeni Jiowa ren unusen letiper?

◻ Ifa ussun ewe kapas awewe lon 1 Korint 12:14-26 a pwarata pwe Jiowa ese kan eani apopo woch me chienach kewe?

◻ Met sia kaeo ussun ach eani liffang ren unusen letipach seni alon Jises ussun ewe lo mi liwinimmong Meri a epiti ngeni me ekkewe ruuefou moni kisikis ewe fefin mi ma puluwan a eani asor?

◻ Ifa ussun ekiekin Jiowa ussun an aramas angang ngeni i ren letip mi unus epwe nemeni ewe ekiek sia eani lefilach?

[Sasing lón pekin taropwe 10]

Meri a fori ewe nampa eu mettoch a tufich ngeni, weween, a epiti ngeni inisin Jises lo mi “fokkun liwinimmong”

[Sasing lón pekin taropwe 11]

Ewe fefin mi ma puluwan a eani asor ruuefou moni kisikis, nge ese tongeni kauk liwinin mwen mesen Jiowa