Amaaraata Ewe Ngunun Kilisou

EMON tokter lon New York State a selani manauen Marie lupwen och mettoch mi efeiengau a tori. Nge Marie, lime ierin, ese ereni ewe tokter an kilisou me ese monatiu liwinin an angang won. A ifa watteen an aramas pwarata nafangauen kilisou!

Paipel a apasa pwe fan eu lupwen Jises a tori eu sopw, a chuuri engol mwan mi uri ewe samau mi fokkun aniuaniu itan rupun pwotur. Ra leuwommong le kokko ngeni i: “Jises, Sense, kopwe umoumoch ngenikem!” Jises a ereniir: “Ou lo pwarikemilo ngeni ekkewe samol fel.” Ekkena chon rupun pwotur ra luku alon, iwe, lupwen ra fetalelo, ra poputa le kuna me meefi pwe ra chikareta.

Tiuemon me lein ekkena chon rupun pwotur ra chok feffetalelo. Nge ewe emon chon rupun pwotur, emon chon Sameria, a liwin pwe epwe pi Jises. Emonna mi fen piin uri rupun pwotur me lom a mwareiti Kot, iwe, lupwen a kuna Jises, a chapetiu mwen pechen kkewe, me a ereni an kilisou. Iwe, Jises a apasa: “Ekkewe engol ra limochulo, are met? Iwe, ikkefa ir chok ekkewe tiuemon? Esor emon leir mi liwinsefal pwe epwe alinga Kot chilon chok ei mwan seni pwal eu muu?”​—Luk 17:11-19.

Eu lesen mi lamot a pwa ren ei kapas eis: “Iwe, ikkefa ir chok ekkewe tiuemon?” Ussun Marie, a wor och mettoch mi fokkun ngau ren ekkewe tiuemon chon rupun pwotur, weween, rese pwarata ar kilisou. Ikenai a fokkun choufetal nafangauen kilisou. Met popun?

Popun An Esor Kilisou

An aramas kutta pwisin letiper a kan efisata nafangauen kilisou. Ekieki mwo popuch kkewe, Atam me If. Jiowa a fforiir pwe repwe eani lapalapan kkewe me a awora mettoch meinisin pwe repwe pwapwa, pachelong eu leenier mi fokkun ling, nonnomun manauer mi unusoch, me angang mi murinno me auchea. (Keneses 1:26-29; 2:16, 17) Iwe nge, fan choun an Setan sossot mi weneiti ewe ekiekin ar repwe kutta pwisin letiper, ir me ruuemon ra alleasolap me ra esiita kisaseun Jiowa.​—Keneses 3:1-5; Pwarata 12:9.

Pwal ekieki mwo chon Israel lom lom, pwe Kot a filiireta pwe repwe noun aramas mi sokkolo aucheaar. Neman meinisin chon Israel mi wor nour ra mmen kilisou lon ewe pwinin Nisan 14, 1513 B.C.E.! Lon ena pwinin mi auchea, ewe chonlangin Kot a nnielo “iteiten mwennau meinisin lon fonuen Isip,” nge a lu seni imwen chon Israel mi wor ewe esissin won. (Ekistos 12:12, 21-24, 30) Iwe, lupwen ra ngaselo seni noun Farao kkewe sounfiu lon ewe Setipar, ren letiper mi ur ren kilisou, ‘Moses me noun Israel kkewe ra poputa le kol ngeni Jiowa.’​—Ekistos 14:19-28; 15:1-21.

Iwe nge, fitu chok wiik mwirin ar lo seni Isip, “unusen mwicheichen noun Israel kkewe ra poputa le ngunungun.” A fet muttirin ar rese chuen meefi kilisou! Ra positi ar “mot ngeni ekkewe napeen futuk . . . , me ar mommongo pilawa tori ar motulo,” nge ikkena ekkewe mettoch ra pwapwaesini lon Isip, ikewe ra fotek ie. (Ekistos 16:1-3) A ffat pwe an aramas kutta pwisin letiper epwe pinei maaritaan me pwarataan kilisou.

Pokiten aramas meinisin mwirimwirin ewe chon tipis Atam, ir meinisin ra eani ewe ekiekin kutta pwisin letiper me a mecheres ar resap meefi kilisou. (Rom 5:12) Nafangauen kilisou a pwal popu seni ewe ngunun kichingau mi nemeni chon fonufan. Ussun ewe asapwal sia ngasangas seni, ena ngun a nom ekis meinisin, me a kku manauach. (Efisus 2:1, 2) Ina minne, a lamot ach sipwe amaaraata ewe ngunun kilisou. Ifa ussun sipwe tufichin ffori ena mettoch?

A Lamot Ach Ekkekiek Won!

Webster’s Third New International Dictionary a apasa pwe kilisou a wewe ngeni “ach meefi pwe mi auchea minne emon a fen ffori fan itach: ach meefi tong me pwipwioch ngeni emon mi liffangoto och mettoch, iwe, sia ekiekin enniwili ngeni ewe chok sokkun kisaseu.” Esap tufich ach sipwe onnei me offei och memmeef, nge epwe chok pwisin towu seni letipen emon. Sap minne kilisou a chok wewe ngeni an aramas pwarata fairo are sufol, nge a popu seni ewe letip.

Ifa ussun sipwe tongeni kaeo pwe sipwe meefi kilisou lon letipach? Paipel a apasa pwe meefiach a kan longolong won met sia filata sipwe ekkekieki ussun. (Efisus 4:22-24) Ach kaeo fan iten ach sipwe meefi kilisou epwe poputa ren ach ekkekieki ekkewe ffofforun kirokiroch mi tottorikich. Fan iten ena, Dr. Wayne W. Dyer, emon mi angang lon pekin kaeo ekiekin aramas, a apasa pwe “Esap tongeni nom rech och memmeef ika sise akkom ekieki ussun och mettoch.”

Ren chok awewe, ekieki mwo ach meefi kilisou ren fforien Kot kkewe. Lupwen kopwe nenneta fan lang le pwin me kuna ekkewe chommong fuu, met meefiom ussun minne ka kuna? King Tafit a mairu, iwe, iei meefian: “Lupwen ua kuna om kkewe lang, angangen autun poum kkewe, ewe maram me ekkewe fuu ka fen ammonlata, ita ifa lamoten aramasen fonufan pwe kopwe chechchemeni i, me ewe noun aramas pwe kopwe tuttumunu i?” Iwe, fan kinamween lepwin, ekkewe fuu ra fos ngeni Tafit, iwe, a amwokutu an epwe makkei pwe “Ekkewe lang ra esileilo lingen Kot; me masouen lang ra aporausa angangen poun kkewe.” Pwata masouen lang kkewe ra achungu letipen Tafit? A iei ussun an polueni: “Ua fen ekkekieki ffofforum kkewe meinisin; ren pwisin letipei ua ekkekieki angangen poum kkewe.”​—Kol Fel 8:3, 4; 19:1; 143:5.

Noun Tafit we Solomon a pwal miritiiti aucheaan an aramas ekkekieki amwararen fforien Kot kkewe. Ren chok awewe, iei makkeian ussun wisen ekkewe kuchu fan iten ewe angangen achochonu ach ei fonufan: “Ekkewe chanpupuun fansoun affoou ra pupuwu ngeni leset, nge ewe matau ese uroureta. Ikewe ekkewe chanpupuun fansoun affoou ra feffeil ngeni ie, ikewe ie chok ra pwal liwiniiti lupwen repwe pupulo.” (Eklesiastis 1:7) Iwe, mwirin an ekkewe ut me chanpupu achochonu fonufan, ewe konik a feita seni ewe matau me a liwinsefallita lon ekkewe kuchu. Epwe fet ei fonufan ika konik ese achochonu, iwe mwirin, a liwinsefallita fan lang? Ese mwaal a watte an Solomon kilisou lupwen a ekieki ekkena poraus!

Emon aramas mi meefi kilisou a pwal aucheani an riri ngeni chon an famili, chienan kkewe, me io kkan mwo a sissileer. Ar kkewe ffofforun kirokiroch a kku letipan. Lupwen a aucheani ar kkewe alillis ngeni, a meefi kilisou lon letipan.

Pwarataan Kilisou

A ifa ffaten ewe kapas “kilisou”! A mmen mecheres ach sipwe apasa ena kapas. Iwe, a mmen chommong ekkewe fansoun sipwe tongeni pwarata kilisou. Ach apasa Kilisou Chapur seni letipach ngeni emon mi suuki eu asam fan itach are mi cheri och mettoch mi turutiu senikich epwe apwapwai letipan! Ika emon chon angang lon sitowa are kafie are posto epwe rong ena kapas, epwe tongeni lapalo pwapwaan me feiochun lon an angang.

Ach tinalo kaatoon pwarataan kilisou a kan amecheresi ach apasa kilisou fan iten ffofforun kirokiroch. Chommong ekkan kaato mi kamolo lon sitowa a fen mak ewe kapas kilisou won, iwe, ra kan affata watteen ach kilisou. Nge esap eu ffofforun tong ach sipwe pwisin makkei ach aucheani met emonnewe a ffori? Ekkoch rese kan nounou ena esin kaato, nge ra pwisin makkei ar kilisou.​—Alollo ngeni Än Salomon Fos 25:11.

Neman mi akkaewin fichiiti chon le imwach ach sipwe pwarata ngeniir ach kilisou. Iei alon Paipel ussun emon fin pupulu mi lipwakoch: “Puluwan we a pwata, me atewe a mwareiti neminnewe.” (Än Salomon Fos 31:28) Esap pwe an emon mwan pwarata seni letipan an kilisou ngeni puluwan we epwe alapalo kinamwe me pwapwa lon ewe famili? Iwe, esap pwe ewe mwan epwe pwapwa le wareiti imwan we, iwe, epwe rong och kapong seni puluwan we mi pwarata an aucheani i? Ikenai, a mmen chommong ekkewe osukosuk mi chouni chon pupulu, me lupwen a lapalo osukosuk, a mecheres an epwe fis song. Emon mi kan meefi kilisou epwe tipemecheres me muttir monuki me omusalo mwaallin aramas.

A pwal lamot ngeni ekkewe sarafo pwe repwe ekiekin pwarata ar kilisou ngeni semer me iner kkewe. A enlet pwe sam me in rese unusoch, nge esap ina eu popun om kosap meefi kilisou ren minne ra fen ffori fan asengesum. Kosap tongeni moni ewe tong me tumun ra fen awora ngonuk seni uputiuom. Ika ra fen aiti ngonuk ewe sile ussun Kot, ina pwal eu popun om kopwe meefi kilisou ngeniir.

Kol Fel 127:3 a apasa pwe “Nouch kkewe at alemwiriach seni Jiowa.” Ina minne, sam me in kkana repwe pi ifa ussun repwe tongeni apunga ffofforun nour kkewe, nge resap akkappiir ren mettoch mi lamot kisikis. (Efisus 6:4) Iwe, a ifa aucheaan wiser, wisen ar repwe alisi ekkewe kukkun mi nom fan ar tumun pwe repwe amaaraata ewe ngunun kilisou!​—Alollo ngeni Än Salomon Fos 29:21.

Kilisou ngeni Kot

Jiowa Kot ewe Chon Tinato “iteiten liffang mi murinno me iteiten minen efeioch meinisin.” (Jemes 1:17) A akkaewin lamot ewe liffangen manau, pun mettoch meinisin sia eani are akkota epwe lamotongauolo ika a pout senikich manauach. Ewe Paipel a peseikich ach sipwe chechchemeni pwe “a nom ren [Jiowa Kot] ewe puachen manau.” (Kol Fel 36:5, 7, 9; Fofor 17:28) Ren ach sipwe amaaraata eu letip mi meefi kilisou ngeni Kot, a lamot ach sipwe ekkekieki minne kkewe a awora mi amanauakich lon pekin aion me pekin ngun. (Kol Fel 1:1-3; 77:11, 12) Ena sokkun letip epwe amwokutukich pwe sipwe pwarata ach kilisou lon kapas me ffoffor.

A ffat pwe iotek eu mettoch epwe pwarata ach kilisou ngeni Kot. Iei alon Tafit, ewe chon makkei kol fel: “Ka fen ffori chommong mettoch O Jiowa ai Kot, om kkewe ffoffor mi amwarar me om kkewe ekiek ngenikem; esor emon epwe lollo ngonuk. Ika upwe ekiekin aporausa me kapas ussur, ra fen kon chommong seni minne upwe tongeni chechchemeni.” (Kol Fel 40:5) Amwo letipach epwe amwokutukich pwe sipwe pwal ina ussun.

A pwal pposolo letipen Tafit pwe epwe pwarata ngeni Kot an kilisou ren an kkewe kapas ngeni aramas. Iei alon: “Upwe mwareituk, O Jiowa, ren unusen letipei; upwe esileifeili om kkewe ffoffor mi murinno meinisin.” (Kol Fel 9:1) Neman ach kapas ngeni aramas ussun Kot, me ach awewei ngeniir ewe enlet seni an Kapas, iei ewe nampa eu mettoch epwe pwarata ngeni i ach kilisou. Iwe, ena mettoch epwe alisikich pwe epwe lapalo ach kilisou lon ekkewe lusun mettochun manauach.

Jiowa a apasa pwe “Ewe emon mi eani kilisou pwe an asor, ina i ewe emon mi alingaei; me ren ewe emon mi pposolo lon aalan, upwe emmwen ngeni amanau.” Amwo kopwe kuna ewe chengel mi popu seni om pwarata kilisou seni letipom ngeni i.​—Kol Fel 50:23; 100:2.

[Sasing lón pekin taropwe 7]

Manau eu liffang seni Kot. Kosap monuki om kopwe pwarata om aucheani aramas