Watchtower ONLINE LIBRARY
Watchtower
ONLINE LIBRARY
Chuuk
  • PAIPEL
  • PUK
  • MEETINGS
  • w98 12/1 p. 4-8
  • En Mi Aucheani An Jiowa We Mwicheich?

Ese wor video fán iten ei kinikin.

Omusaaló, a wor osukosuk le eppietá ewe video.

  • En Mi Aucheani An Jiowa We Mwicheich?
  • Ewe Leenien Mas a Esilefeili án Jiowa We Mwú—1998
  • Itelap Kisikis
  • Pwal Ekkóch
  • Emon mi Kuna Ekkewe Chonlang
  • Kakkaeo fan iten Weweoch
  • Kukkutta Mirit
  • Minne Aisea a Kuna
  • Met Isikiel a Kuna?
  • Án Jiowa we Mwichen Soufiu mi Pulopulen Ekkei
    Lesen Ka Tongeni Káé Seni Paipel
  • “Nefotofot Wóón Ekkewe Mettóch mi Fókkun Lamot”
    Ewe Leenien Mas a Esilefeili án Jiowa We Mwú—2013
Ewe Leenien Mas a Esilefeili án Jiowa We Mwú—1998
w98 12/1 p. 4-8

En Mi Aucheani An Jiowa We Mwicheich?

“Iei alon Jiowa: ‘Lang ai leenien nemenem, me ewe fonufan leenien pechei kkewe.’”​—AISEA 66:1.

1, 2. (a) Met sokkun mettoch sia kuna a anneta pwe a wor an Jiowa mwicheich? (b) Ia Jiowa a nonnom ia?

EN MI luku pwe a wor an Jiowa mwicheich? Ika ina, met popun ka luku? Eli kopwe apasa: ‘Maa, a wor ach Kingdom Hall. Mei wor ach mwichefel mi kkotoch me eu mwichen elter lon. Mei wor nouch circuit overseer mi seikita me a kan etto alisikich iteiten ier. Sia kan fiffiti ekkewe mwichelap mi kkotoch. Mei wor ach kisin ofesin ewe Watch Tower Society mi kkan ngeni fonuach. Ese mwaal ekkeei mettoch meinisin me pwal chommong mettoch me lukun ra anneta pwe a wor eu an Jiowa mwicheich mi akkangang iei.’

2 Ekkena lapalap pisekin annet pwe a wor eu mwicheich. Nge ika sipwe kuna me aucheani minne chok a nom won fonufan, sisaamwo unusen weweiti an Jiowa mwicheich. Jiowa a ereni Aisea pwe fonufan leenien chok pechen kkewe, nge lang an leenien nemenem. (Aisea 66:1) Menni “lang” Jiowa a kapas ussun? Ita ina leenien ewe asapwal? Are ina leenien masouen lang? Are ita ina pwal och sokkun tettelin manau? Aisea a kapas ussun ewe “leeni mi tekia, nge a fel me ling,” leenien Jiowa we, me ewe chon makkei kol fel a awewei pwe ena lang, ina “ewe leeni ikewe emonnewe a nonnom ie.” Ina minne, ewe “lang” lon Aisea 66:1 a wewe ngeni ewe leenien ngun ese pwa ngeni mesen aramas, iwe, Jiowa a tekia seni meinisin mi nonnom ie.​—Aisea 63:15; Kol Fel 33:13, 14.

3. Ifa ussun sipwe tongeni amoielo tipemwaramwar?

3 Ina popun, ika sia enletin mochen miritiiti me aucheani an Jiowa we mwicheich, sipwe nenneta lang. Iwe, ina ewe mettoch ekkoch ra osukosuk ren. Pokiten an Jiowa we mwicheich lon lang ese pwa ngeni mesach, ifa ussun sipwe tongeni silei pwe a wesewesen wor ena mwicheich? Eli ekkoch repwe tipemwarar, iwe, repwe ekieki, ‘Ifa ussun sipwe tongeni wesewesen silei?’ Iwe, ifa ussun luku epwe tongeni pworaiti tipemwaramwar? Ikkeei ruu minen alillis mi fokkun lamot: sipwe kaeofichi ewe Kapasen Kot me fiffiti an chon Kraist kkewe mwich me peppeni kokkotun ekkena mwich fan tinikken. Iwe mwirin, saramen ewe enlet epwe tineiti mesach. A fen wor pwal fitemon chon angangen Kot mi tipemwaramwar. Sipwe pi porausen noun Ilaisa we chon angang lupwen ewe kingen Siria a maunei Israel.​—Alollo ngeni Jon 20:24-29; Jemes 1:5-8.

Emon mi Kuna Ekkewe Chonlang

4, 5. (a) Met noun Ilaisa we chon angang a osukosuk ren? (b) Ifa ussun Jiowa a polueni an Ilaisa we iotek?

4 Ewe kingen Siria a tiinalo chommong sounfiu ngeni Totan pwe repwe liapeni Ilaisa. Lupwen noun Ilaisa we chon angang a pwata me lesossorusich me a towu lukun, eli ren an epwe meefi paten ewe asapwal me won osun ewe imw mi chopop, a ruko ren minne a kuna! Eu mwichen sounfiun Siria fitifengen me oris me wokenin maun ra pwelli ewe telinimw pwe repwe turufi noun Kot we soufos. Ewe chon angang a kokko ngeni Ilaisa: “Woone, nei masta! Met sipwe ffori?” Neman fan mosonoson me lukuluk, Ilaisa a polueni: “Kosap niuokkus, pun chokkewe mi nonnom rech ra chommong seni chokkewe mi nonnom rer.” Ese mwaal ewe chon angang a ekieki, ‘Ikkefa ir? Use tongeni kuner!’ Eli fan ekkoch epwe chok pwal ina ussun ach osukosuk, weween, sisap tongeni kuna ren mesen letipach, are weweiti, pwe a wor chommong chonlang mi pwellikich.​—2 King 6:8-16; Efisus 1:18.

5 Ilaisa a iotek pwe mesen noun we chon angang epwe suuk. Met a fis mwirin? “Muttir chok Jiowa a suuki mesen ewe chon angang, me a kuna, iwe, nengeni! lemal a ur ren oris me wokenin maun mi pulopulen ekkei me ra pwelli Ilaisa.” (2 King 6:17) Ewer, atewe a kuna ekkewe chonlang, iwe, ra ussun sounfiu mi mmonleta pwe repwe tumunu noun Kot we chon angang. Iwe, a tongeni weweiti ewe popun Ilaisa a wor an lukuluk.

6. Ifa ussun sipwe tongeni miritiiti porausen an Jiowa we mwicheich lon lang?

6 Fan ekkoch sia ita osukosuk ussun chok noun Ilaisa we chon angang, weween, ese suuk mesen letipach? Sia kan kuna minne chok mi pwa ngeni wesewesen mesach lupwen aramas repwe ekiekin minakich are sotun eppeti angangen chon Kraist lon ekkoch fonu? Ika ina, sipwe ita ekiekin kuna och langepwi pwe epwe saramelo letipach? Aapw, pun a nom rech eu mettoch ese nom ren noun Ilaisa we chon angang, weween, eu puk mi masou ren chommong langepwi, ewe Paipel, iwe, epwe tongeni emiritikich ussun ewe mwicheich lon lang. Ena Kapas mi fel a pwal awora emmwen fan iten an epwe awenechara ekiekich me aalen manauach. Iwe nge, a lamot ach sipwe achocho le kukkutta mirit me amaaraata ach aucheani an Jiowa kokkot. Iwe, sipwe tongeni ffori ena mettoch ren ach pwisin kakkaeo, fitifengen me iotek me ekiekfich.​—Rom 12:12; Filipai 4:6; 2 Timoti 3:15-17.

Kakkaeo fan iten Weweoch

7. (a) Eli ekkoch repwe kuna met sokkun osukosuk fan iten ewe mettoch pwisin kakkaeo Paipel? (b) Pwata a mmen auchea ach achocho le pwisin kakkaeo Paipel?

7 Chommong aramas rese lien efich ar repwe pwisin kaeo, awewe chok ren chokkewe rese efich ar kaeo lon sukul are rese tufichin kaeo me lom. Iwe nge, ika sia mochen wewefichiiti me aucheani an Jiowa we mwicheich ren mesen letipach, a lamot ach sipwe amaaraata ach mochen kaeo. Kopwe tongeni aea och mongo mi anno ika emon ese akkom kuku? Meinisin chon kuk repwe apasa pwe a mmen watte ewe angang fan iten fforun och mongo mi anno. Iwe nge, eli chon aea ewe mongo repwe pwi mwirin chok esopw awa are fen kis seni. Iwe nge, an aramas pwisin kaeo epwe tongeni efeiochur lon unusen manauer. Sipwe tongeni eoreni ach pwisin kakkaeo lupwen sipwe kuna ach mammaarita lon pekin ngun. A pwung an ewe aposel Paul apasa pwe fansoun meinisin sipwe ekkekieki pwisin manauach me ach afalafal me sipwe angochukich fan iten allea. A lamot achocho, nge feiochun epwe tongeni nomofoch.​—1 Timoti 4:13-16.

8. Met sokkun ekiek Än Salomon Fos a peseikich ach sipwe eani?

8 Iei alon emon mwan mi mirit lom lom: “Nei at [are nengngin], ika kopwe auseling ngeni aloi me lefareni ai kkewe alluk ren om kopwe auseling ngeni mirit, pwe kopwe emmwen ngeni weweoch letipom; pwal och, ika kopwe kokkowu ren tipachchem me fosowu ren weweoch, ika kopwe kukkutta ena ussun om kukkutta silifer, me kopwe kukkutta ussun om kutta pisek mi monomon, iwe, epwe ina ussun kopwe weweiti lamoten om kopwe menniniiti Jiowa, me kopwe kuna ewe sile ussun Kot.”​—Än Salomon Fos 2:1-5.

9. (a) Ifa ussun aucheaan kolt a mwaalfesen me aucheaan “ewe sile ussun Kot”? (b) Met sokkun pisek a lamot ngenikich fan iten ach sipwe angei sile mi enlet?

9 Ka miritiiti met sokkun wis a pwalo? Fan fite a mak ei kapas, ‘Ika kopwe.’ Pwal nengeni mwo ei kapas, ‘Ika kopwe kukkutta ussun om kutta pisek auchea mi monomon.’ Ekieki mwo chokkewe mi kutta silifer me kolt fitepuku ier lon Bolivia, Mexico, South America, me pwal fitu fonu. Ra angang weires me ra aea turupwas me sofel ren ar repwe ttu ewe ppwul ekkena mecha ra nom lon. A kon watte ar aucheani kolt, ina minne, lon eu leeni lon California, U.S.A., ra ttu ekkewe pwang fan ppwul ukuukun 367 mwail ttamer, nge alollolun a tori ina epwe eu mwail fan iten ar kutta kolt. Iwe nge, sipwe tongeni mongo are un kolt? Epwe tongeni amanauakich ika sia nom lon eu fonuepwas, nge sipwele malo pokiten esor anach are unumach? Aapw. Aucheaan a longolong won ekiekin me meefien aramas, pwe liwinin a tongeni sissiwil ran me ran me ren minne pekin sopai a apasa. Iwe nge, aramas ra fen malo fan itan. Iwe, ren ach sipwe angei ewe kolt lon pekin ngun, weween, “ewe sile ussun Kot,” epwe ifa ukuukun ach sipwe achocho ngeni? Ekieki mwo pwe ina wesewesen ewe sile ussun ewe Epinkepiisom, an we mwicheich, me an kkewe kokkot! Fan iten ena, sipwe tongeni aea ekkewe turupwas me sofel lon pekin ngun. Ikkena ekkewe puken awewei Paipel mi alisikich pwe sipwe tongeni kutta masouen an Jiowa Kapas me wewefichiiti ekkewe poraus lon.​—Hiop 28:12-19.

Kukkutta Mirit

10. Met Taniel a kuna lon eu langepwi?

10 Sipwe aea ach kkewe pisekin ttu ppwul lon pekin ngun ren ach sipwe poputa le angei ewe sile ussun an Jiowa we mwicheich lon lang. Sipwe pi an Taniel we langepwi ussun ewe Chinnapen Ran won an we leenien nemenem ren eu minen emirit mi watte lamotan. Iei makkeien Taniel: “Ua akkatola tori an a mmonleta leenien motun nemenem me ewe Chinnapen Ran a mottiu. Ufan a pwech ussun sino, me meten mokuran a pwech ussun unen siip. An leenien nemenem a ussun ngeten ekkei; willan kkewe ra ussun pulopulen ekkei. A wor ekkei mi ngetewu me mwan. A wor engerou fan engerou mi ateneki i, me engol ngerou fan engol ngerou mi ukkuta mwen i. Ekkewe Sou Kapwung ra mottiu, me a suuk ekkewe puk.” (Taniel 7:9, 10) Io kkana fite ngerou mi ateneki Jiowa? Lon ewe New World Translation, a mak pwal fitu wokisin lukanapen ekkewe chon taropwe, iwe, ra ussun “turupwas” me “sofel,” awewe chok ren Kol Fel 68:17 me Ipru 1:14. Ewer, ekkena chon alillis, ir chonlang!

11. Ifa ussun an Taniel langepwi a tongeni alisikich le weweiti alon Ilaisa?

11 An Taniel poraus ese apasa pwe a kuna meinisin ekkewe chonlang mi tuppwol mi nom fan nemenien Kot. Eli a wor pwal fite, fite, million. Nge iei sipwe tongeni weweiti ewe popun Ilaisa a apasa ei mettoch: “Chokkewe mi nonnom rech ra chommong seni chokkewe mi nonnom rer.” Ewe mwichen sounfiu mi nom ren ewe kingen Siria, inaamwo ika ekkewe chonlang mi ngau, are timon, ra peniir, ra chokukkun seni ekkewe mwichen sounfiu mi nom ren Jiowa!​—Kol Fel 34:7; 91:11.

12. Ifa ussun kopwe tongeni alapalo sileiom ussun ekkewe chonlang?

12 Eli ka mochen alapalo sileiom ussun ekkena chonlang, awewe chok ren wiser lon ar angang ngeni Jiowa. Seni ewe kapasen Kriik fan iten chonlang, sia kuna pwe ir chon kuno pwe a pwal wewe ngeni “chon kuno.” Iwe nge, wiser a lap seni ena. Iwe, ren om kopwe pi ika ifa wiser, mi lamot kopwe kutta porauser. Ika a wor noum Insight on the Scriptures, kopwe tongeni kaeo ewe itelap “Chonlang,” are kopwe tongeni pi ekkewe lesen lon Ewe Leenien Mas ussun chonlang. Kopwe mairu ren met kopwe tufichin kaeo ussun ekkena chon angang lon lang me kopwe aucheani ar alillis. (Pwarata 14:6, 7) Iwe nge, lon an Kot we mwicheich lon lang, ekkoch ngun ra wisen apwonueta ekkoch sokkun angang mi sokkolo aucheaar.

Minne Aisea a Kuna

13, 14. Met Aisea a kuna lon an we langepwi, me met meefian ussun?

13 Iwe iei, sipwe kutta porausen an Aisea we langepwi. Lupwen kopwe alleani sopwun 6, wokisin 1 tori 7, kopwe ita ingelo ren. Aisea a apasa pwe a “kuna Jiowa an a mommot won eu leenien nemenem,” me “seraf ra ukkuta me asan.” Ra arongafeili lingen Jiowa, me ra esileilo pinin. Letipom epwe ita chung ren om alleani ena poraus. Met meefien Aisea? “Ua apasa: ‘Riaffou ngeniei! Pwe ussun ita upwe fanelo [lon Seol], pun ngang emon mwan mi limengau tinauei, me ua nonnom lein aramas mi limengau tinauer; pun mesei a fen kuna ewe King, Jiowa meilapen sounfiu!’” A fet watteen an ingelo ren ena langepwi! A ita pwal ina ussum?

14 Ifa ussun Aisea a tufichin likiitu fan kunaan na mi lingemwarar? A apasa pwe emon seraf a etto alisi me a apasa: “Mwaallum a fen lo sonuk me a musulo om tipis.” (Aisea 6:7) Aisea a tongeni luku umoumochun Kot me auseling ngeni alon Jiowa. Iwe, kese kan mochen alapalo sileiom ussun ekkena ngun mi wis tekia? Iwe, met kopwe ffori? Kopwe kutta porauser. Kopwe tongeni nounou ewe Watchtower Publications Index, me alleani ekkewe chommong poraus mi affatetiu lon.

Met Isikiel a Kuna?

15. Met a affata pwe mi lukuchar an Isikiel we langepwi?

15 Iei sipwe pi pwal eu sokkun mettoch mi ffor lon pekin ngun. Isikiel a kuna eu langepwi lupwen a chuen fotek lon Papilon. Suuki mwo noum Paipel ngeni Isikiel sopwun 1, wokisin 1-3. Mei fet poputaan ena poraus? A ita apasa, ‘Lom, lom, lon eu fonu mi towau. . . ’? Aapw, esap ina eu tutulap, kefisitaan aramas. Iei alon wokisin 1: “Iwe, a fis lon ewe ailiken ier, lon ewe aruuanun maram, lon ewe alimuen ranin maram, lupwen ua nonnom lein ekkewe choisa ren ewe chanpupu Kepar, pwe a suuk lang me ua poputa le kuna langepwi ussun Kot.” Met ka kuna seni ena wokisin? A ffatoch ewe ran me leeni. Ekkena poraus ra weneiti ewe alimuen ranin an King Jehoiachin choisa, weween, 613 B.C.E.

16. Met Isikiel a kuna?

16 Poun Jiowa a nom won Isikiel me a poputa le kuna eu langepwi mi amairu ussun an Jiowa mommot won eu leenien motun nemenem lon eu watteen wokenin lang mi wachemuk willan, nge a wor foun mas won ekkena will. Mi akkaewin lamot ngenikich porausen fomon monumanau, nge ir mi ukkuta oroppen ekkena will. “A iei ussun lapalaper: ra ussun nikinikin aramasen fonufan. Iwe, wonmeser a ruuanu sokkun, me a wor fofoch poukassir. . . . Iwe, ren lapalapen wonmeser, ir me fomon ra eani wonmesen emon mwan, nge won mesen laion a nom le peliefichir, me ir me fomon ra eani wonmesen atemwanin kowu le peliemongur; ir me fomon ra pwal eani wonmesen ikel.”​—Isikiel 1:5, 6, 10.

17. Wonmesen ekkewe chonlang me ruuanu ra liosueta met?

17 Met weween ekkena fomon monumanau? Isikiel a apasa pwe ir kerop. (Isikiel 10:1-3, 14) Pwata a wor ruuanu wonmeser? Ra liosueta ekkewe ruuanu lapalap mi kon auchea mi nom ren Jiowa, ewe Epinkepiisom. Wonmesen ewe ikel a liosueta mirit mi tongeni nennelo towau. (Hiop 39:27-29) Met wonmesen ewe atemwanin kowu a liosueta? Pokiten a mmen pochokkul uan me afaran, emon atemwanin kowu a tufichin eki emon oris me emonnewe mi wawa. Ese mwaal ewe atemwanin kowu a liosueta manamanen Jiowa ese kauk. Ewe laion a liosueta pwung mi pwora. Iwe saingoon, wonmesen ewe mwan a liosueta an Kot tong, pun aramas chok me lein monun fonufan ra tongeni pwarata ena lapalap fan mirit.​—Mattu 22:37, 39; 1 Jon 4:8.

18. Ifa ussun ewe aposel Jon a alapalo ach miritiiti ewe mwicheich lon lang?

18 A wor pwal fitu langepwi mi tongeni aunusa ewe poraus. A kapachelong an Jon kkewe langepwi mi mak lon ewe puken Paipel itan Pwarata. I, ussun Isikiel, a kuna Jiowa an a mommot won eu leenien nemenem mi ling me ekkewe kerop ra nom ren. Met ekkena kerop ra ffori? Ra aloni alon ekkewe seraf lon Aisea sopwun 6, pwe ra apasa: “Mi fel, mi fel, mi fel Jiowa Kot, ewe Epinkepiisom, ewe mi nom seni lom me a nonnom iei, me epwe war lon mwach kkan.” (Pwarata 4:6-8) Jon a pwal kuna emon lam unukkun ewe leenien nemenem. A liosueta io? Ina i ewe Lamen Kot, Jises Kraist.​—Pwarata 5:13, 14.

19. Ren ei lesen, met ka miritiiti ussun an Jiowa we mwicheich?

19 Iwe, ren ekkena langepwi, met sia fen miritiiti? A ffat pwe Jiowa Kot a nom asechikin ewe mwicheich lon lang, nge a mommot won an leenien nemenem, iwe, ewe Lam, Jises Kraist a nom ren, nge i ewe Kapas, are Logos. Iwe, sia fen kuna chommong, chommong chonlang, me a kapachelong seraf me kerop. Ir chon eu wenewenen watte mwicheich mi tipeeufengen, me ra angang fan iten an Jiowa kkewe kokkot. Iwe, eu me lein ekkena kokkot, iei ewe angangen afalafala ewe poraus allim won unusen fonufan lon ei fansoun sopwoloon.​—Mark 13:10; Jon 1:1-3; Pwarata 14:6, 7.

20. Menni kapas eis epwe polu lon ena eu lesen mwirin ei?

20 Iwe saingo, a wor Chon Pwarata Jiowa won fonufan mi mwimwmwich lon ar kkewe Kingdom Hall ren ar repwe kaeo ifa ussun repwe ffori letipen ewe Epinkepiisom. Ese mwaal sipwe tongeni weweiti iei pwe ir mi penikich ra chommong seni ir mi peni Setan me ir mi oput ewe enlet. A chuen wor ei kapas eis: Ifa ussun ena mwicheich lon lang a riri ngeni ewe angangen afalafala ewe poraus allim ussun ewe Muu? Ena eu lesen mwirin ei epwe polueni ena kapas eis me affata pwal fitu mettoch.

Kapas Eis fan iten Enniwili Poraus

◻ Ren ach sipwe aucheani an Jiowa we mwicheich, met sipwe miritiiti?

◻ Met a fis ngeni noun Ilaisa we chon angang, me ifa ussun ena soufos a apochokkula i?

◻ Epwe fet ach ekiek ussun ach pwisin kakkaeo Paipel?

◻ Ifa ussun Taniel, Aisea, me Isikiel ra awora poraus ussun ewe mwicheich lon lang?

[Sasing lón pekin taropwe 5]

Feiochun ach pwisin kakkaeo a mmen nomottam seni och mongo emon epwe ammonlaochu

[Sasing lón pekin taropwe 7]

Jiowa a polueni an Ilaisa we iotek ren an awora eu langepwi ussun ekkewe chonlang

    Meinisin mi Peres lón Fósun Chuuk (1987-2025)
    Log Out
    Log In
    • Chuuk
    • Share
    • Preferences
    • Copyright © 2025 Watch Tower Bible and Tract Society of Pennsylvania
    • Terms of Use
    • Privacy Policy
    • Privacy Settings
    • JW.ORG
    • Log In
    Share