Ka Fen Tolong Lon An Kot We Asoso?

“Ewe mwan mi tolong lon an Kot we asoso epwe pwal asoso seni an kkewe angang.”​—IPRU 4:10, New World Translation.

1. Met popun sia efich asoso?

ASOSO. A ifa me ochchun me lingen ena kapas! Lon ei fonufan, ia a ussun ita pwe mettoch meinisin mi fitikoko me fetalakai, lape ngenikich meinisin sipwe etiwa eu asoso. Sarafo are chinnap, pupulu are lipich, sia meefi weires me molulu seni chok ach manaueni manauach iteiten ran. Ren ekkewe mi mwok are semmwen, a wor ekkewe mettoch mi weires repwe wisen achocho ngeni iteiten ran. Ussun a mak lon ewe Paipel, “masouen lang me fonufan meinisin ra chok ngungufengen tori ei fansoun.” (Rom 8:22) Sap minne emon mi asoso a tinikop. Aramas ra osupwangen asoso me ra wisen apwonueta ena osupwang.

2. Jiowa a fen asoso seni ineet?

² Jiowa Kot a pwal asoso. Lon ewe puken Keneses sia allea: “Iei usun Kot a awesala lang me fanufan me meinisin mine a wor lor. Nge lon ewe afisuen ran Kot a aukatiu an we angang o asoso seni an kewe angang meinisin.” Me ren Jiowa, mei wor watte lamoten ewe “afisuen ran,” pun a pwal mak lon ewe Paipel: “Iwe, Kot a afeiochu o apini ewe afisuen ran.”​—Keneses 2:1-3.

Kot A Asoso Seni an we Angang

3. Jiowa esap mochen asoso pokiten met sokkun popun?

³ Ifa ewe popun Kot a asoso lon ewe “afisuen ran”? Pwungun pwe ese mochen asoso pokiten an molulu. A nom ren Jiowa “manaman watte” me “ese molululo are achanu.” (Aisea 40:26, 28, NW) Ese pwal asoso pokiten a mochen kunou are ffori och mettoch mi fo, pun Jises a erenikich: “Semei a chok angang tori ikenai, iwe, ngang upwe pwal angang.” (Jon 5:17) Iwe, “Kot emon ngun” me ese nom fan nemenemen fetalin ewe inis me an aramas kkewe osupwang lon pekin aion.​—Jon 4:24.

4. Ifa ussun “ewe afisuen ran” mi sokko seni ekkewe wonu ‘ran’ akkom?

⁴ Ifa ussun sipwe tongeni kaeo ewe popun Kot a mochen asoso lon “ewe afisuen ran”? Chechchemeni mwo pwe, inaamwo ika a pwapwaiti met a fen pwonuta lon ekkewe wonu ‘ran’ akkom nge, Kot a titchikin efeiochu “ewe afisuen ran” me a apasa pwe ina eu ran mi “pin.” Ewe Concise Oxford Dictionary a awewei ewe kapas “pin” ussun “fangelo are iseis (ngeni eu kot are fan iten och popun mi weneiti lamalam).” Iei ussun, an Jiowa efeiochu “ewe afisuen ran” me an apasa pwe ena ran mi pin a aiti ngenikich pwe an we “asoso” a fen ri ngeni letipan mi pin me an we kokkot, nge esap fis pokiten och an osupwang. Ifa ena riri?

5. Met Kot a fen apopueta lon ekkewe wonu ‘ranin’ fforata?

⁵ Atun ekkewe akkomwan wonu ‘ranin’ fforata, Kot a fen fforata me poputaani rokopwaliin mettochun fonufan me ekkewe alluk mi nemeni mwokutukutun fonufan me ekkewe mettoch orun fonufan. Scientist ra keran kaeo ukuukun amwararen lapalapen ekkeei mettoch. Arapakan le muchuloon ewe “awonuen ran,” Kot a fforata ewe aewin pean aramas me a anomur lon “eu tanipi lon fanuen otiu itan Eten.” Iwe, Kot a apasawu letipan fan iten aramas me ewe fonufan ren ekkeei kapas mi ussun eu oesini: “Oupwe nounou o achomongakemi pwe fanufan epwe masou remi o nom fan nemeniemi. Oupwe nemeni ekewe ikenen leset me ekewe mansusu me monun won unusen fanufan.”​—Keneses 1:28, 31; 2:8.

6. (a) Le muchuloon ewe “awonuen ran,” ifa meefien Kot ussun fforian kkewe? (b) Ifa ussun “ewe afiusen ran” mi pin?

⁶ Arapakan le muchuloon ewe “awonuen ran,” iei ewe poraus: “Kot a nengeni meinisin mine a fori o kuna pwe a fokun och.” (Keneses 1:31) Kot a pwapwa ren ekkewe mettoch meinisin a fen fforata. Iwe, a asoso, are ukutiu seni pwal ekkoch angangen fforata mettoch won fonufan. Ewe malamal Ichen mi unusoch me ling nge, a ina chok eu leeni mi kisikis won fonufan me ruuemon chok aramas ra nonnom lon. Epwe fansoun langattam me mwen ewe fonufan me ekkewe aramas mi nonnom won repwe tori ewe lapalap Kot a fen akkota. Iei ewe popun Kot a filata “ewe afisuen ran” pwe epwe mutata mettoch meinisin a fen ffori lon ekkewe wonu ‘ran’ akkom ar repwe feffeita lon tipeeu ngeni letipan mi pin. (Alollo ngeni Efisus 1:11)) Lupwen “ewe afisuen ran” epwele much, ewe fonufan epwe fen wiliiti eu paratis me aramas mi unusoch repwe nonnom won tori feilfeilo chok. (Aisea 45:18) “Ewe afisuen ran” a fen iseis ngeni feffeitaan me pwonutaan letipen Kot ngeni fonufan me aramas. A ina ussun ena ran mi “pin.”

7. (a) Ifa weween an Kot asoso lon “ewe afisuen ran”? (b) Epwe ifa ussun lapalapen ei fonufan lupwen epwe wes “ewe afisuen ran”?

⁷ Iwe, Kot a asoso seni an angangen fforata lon “ewe afisuen ran.” A ukutiu seni an angang ren an epwe mut ngeni fforian kkewe ar repwe fetal ngeni pwonutaan an we kokkot. A unusen achifoua pwe meinisin epwe fen fisita me ren an we kokkot lupwen a wes “ewe afisuen ran.” Pwal mwo nge ika epwe wor minen eppet, repwe omoraalo. Aramas meinisin mi alleasochis repwe feioch lupwen letipen Kot a unusen pwonuta. Esap wor och mettoch mi tongeni pinei popun, pun an Kot feioch a nom won “ewe afisuen ran,” me a fen “epinalo.” A ifa me amwararen ei apilukuluk ren aramas mi alleasochis!

Israel Ese Tolong lon an Kot Asoso

8. Ineet me ifa ussun a poputa an Chon Israel chechchemeni ewe Sapat?

⁸ Muun Israel a feioch seni an Kot kkotun angang me asoso. Mwen an ngeni Israel ewe Alluk won ewe Chuuk Sainai, Kot a nounou Moses le affata ngeniir: “Oupwe chechemeni pwe ngang ewe Samol mi Lapalap ua ngenikemi ewe ranin sapat, iei mine ua pwal ngenikemi ukukun mongon ruu ran lon ewe awonuen ran. Nge lon ewe afisuen ran eman me eman leimi epwe chok nom lon lenian, esap wor eman epwe towu seni.” Pokiten ena alluk “ekewe aramas ra asoso lon ewe afisuen ran.”​—Ekistos 16:22-30.

9. Met popun ekkewe Chon Israel repwe etiwa ewe alluk ussun ewe Sapat?

⁹ Iei eu minefoon kokkot ngeni Chon Israel, mi keran ngaselo seni ar kichiniwel lon Isip. Inaamwo ika Chon Isip me chon ekkewe ekkoch muu ra fen alleani ekkewe ran lon wiiken limu ngeni engol ran, nge sisap ekieki pwe a mumu ngeni Chon Israel, chon kichiniwel, eu ranin asoso. (Alollo ngeni Ekistos 5:1-9.) Ina popun sipwe eani ewe ekiek pwe aramasen Israel ra etiwa ei siwil. Rese ekieki pwe ewe allukun Sapat a ussun eu iok mi chou are eu mettoch mi pinei ar pwapwa. Uruurun pwe repwe pwapwa le alleasochisi. Ren enletin, Kot a ereniir pwe ewe Sapat epwe achema ngeniir ar kichiniwel lon Isip me ar ngaselo seni Isip.​—Tuteronomi 5:15.

10, 11. (a) Ekkewe Chon Israel repwe ekiekin pwapwaesini met ika ra alleasochisoch? (b) Met popun Chon Israel rese tolong lon an Kot we asoso?

¹⁰ Ika ekkewe Chon Israel Moses a fen emmweniir seni Isip ra fen alleasochisoch, repwe tolong lon ewe fonu mi pwoneitiu “eu fanu mi pwuluoch o fanueras.” (Ekistos 3:8) Lon ena fonu repwe tufichin pwapwaiti eu asoso mi murinno, esap chok lon ewe ranin Sapat nge, ren unusen manauer. (Tuteronomi 12:9, 10) Iwe nge, esap ina met a fisita. Paul a mak ussur: “Io ir ekkewe mi alleasolap mwirin ar rong? O io ir ekkewe a song ngeni lon faik ier? Sap ir ekkewe mi fori tipis, ir ekkewe somar ra tomelo lon ewe fonupon? O io ir ekkewe a akapwon ngeni pwe resap mo tolong lon an we leenien asoso? Esap ir ekkewe mi lukumach? Iwe, sia fen kuna pwe rese tongeni tolong pokiten ar lukulukumang.”​—Ipru 3:16-19.

¹¹ A ifa me lamoten ena lesen fan itach! Pokiten nafangauen ar luku Jiowa, ena tappin aramas ese angei ewe asoso a pwon ngeniir. Ra malo lon ewe fonupoon. Rese miritiiti pwe, ussun mwirimwirin Eperiam, ra ririfengen me letipen Kot lon kaworen feioch ngeni muun fonufan meinisin. (Keneses 17:7, 8; 22:18) Rese atipeeufengenni ar angang me letipen Kot, nge ra unusen osukosuk ren pwisin letiper mi maicha. Amwo kich sisap ina ussun!​—1 Korint 10:6, 10.

Mei Chuen Wor eu Asoso

12. Menni tufich a chuen suuk ngeni Chon Kraist lom, me ifa ussun repwe amwochu?

¹² Mwirin an affata pwe Israel ese tolong lon an Kot asoso pokiten nafangauen luku, Paul a ekieki ussun chienan kkewe chon luku. Ussun a mak lon Ipru 4:1-5, a alukulukuur pwe “ewe pwon mi nonnom chok, ewe pwon usun tolong lon an we leenien asoso.” Paul a peseer le anganga ar luku lon ewe “kapas allim,” pun “chon luku [repwe] tolong lon [an Kot] . . . asoso.” Pun Jises a fen amoielo ewe Alluk ren an we moon kepichilo, Paul ese ekieki ussun ewe asoso lon pekin aion mi kawor ren ewe Sapat. (Kolose 2:13, 14) Ren an makkei seni Keneses 2:2 me Kol Fel 95:11, Paul a pese ngeni Chon Ipru Chon Kraist ar repwe tolong lon an Kot asoso.

13. Lupwen a aloni Kol Fel 95, ifa ewe popun Paul a menlapei ewe kapas “ikenai”?

¹³ Ewe tufichin tolong lon an Kot asoso epwe ita wewe ngeni “kapas allim” ngeni ekkewe Chon Ipru Chon Krasit, ussun chok porausen ewe Sapat epwe ita “kapas allim” ngeni ekkewe Chon Israel lom. Ina pwata Paul a pesei chienan chon luku ar resap mwaalilo ussun Israel lon ewe fonupoon. Ren an aloni minne sia eita ngeni Kol Fel 95:7, 8 iei, a menlapei ewe kapas “ikenai,” inaamwo a fen fansoun langattam seni le poputaan an Kot asoso seni an angangen fforata. (Ipru 4:6, 7) Met weween alon Paul we? Pwe ra chuen nom lon “ewe afisuen ran,” ewe fansoun Kot a filata ren pwonutaan letipan ngeni fonufan me aramas. Ina popun a mmen lamot pwe chienan Chon Kraist repwe atipeeufengenni ar angang me an Kot kokkot nge, resap chok osukosuk ren pwisin ar angang. Pwal eu a ouroureer: “Ousap aporoingaualo letipemi.”

14. Ifa ussun Paul a aiti ngenikich pwe mi pwal wor eu “asoso”?

¹⁴ Paul a pwal aiti ngeniir pwe ewe “asoso” mi pwoneitiu ese chok weneiti an aramas fonueni ewe Fonu mi Pwoneitiu fan an Josua emmwen. (Josua 21:44) “Pun ika Josua a fen ngeni ir asoso,” Paul a apasa, “Kot esap chuen apasa usun pwal eu ran mwirin.” Ina popun Paul a apasa: “Mi pwal wor eu asoso ren noun Kot kewe aramas.” (Ipru 4:8, 9) Ifa weween ei “asoso”?

Tolong lon An Kot Asoso

15, 16. (a) Met lamoten ewe kapas “asosoon sapat”? (b) Ifa weween ach sipwe ‘asoso seni ach angang’?

¹⁵ Ewe kapas “asosoon sapat” a chiyaku seni ewe kapas lon fosun Kriik a wewe ngeni “sassapat.” (Kingdom Interlinear) Ewe sense itan William Lane a apasa: “Ei kapas a angei weween seni an ewe Lamalamen Jus awewe ussun Sapat mi longuni Exod 20:8-10. A menlapei ewe pwapwa me chengel mi sokkolo lapalapan, mi pwalo lon ar fel ngeni me ar mwareiti Kot.” Iwe, ei asoso esap chok eu asoso seni angang. A wewe ngeni eu siwil seni angang mi weires me lamot mwaal ngeni ewe angang mi chengel mi mwareiti Kot.

¹⁶ Pwungun ena poraus a letelo ren met Paul a apasa mwirin: “Io mi tolong lon an Kot we leenien asoso epwe pwal asoso seni an kewe angang, usun chok Kot a pwal asoso seni an kewe angang.” (Ipru 4:10) Kot ese asoso lon ewe afisuen ran pokiten an mololu. A ukutiu seni an angangen fforata mettoch won fonufan ren an epwe mut ngeni fforian kkewe ar repwe maarita tori linger mi unus, me meinisin repwe mwareiti me sufoliiti i. Pokiten kich fforien Kot, sipwe pwal atipeeufengenni manauach ngeni an kokkot. Sipwe ita ‘asoso seni pwisin ach angang,’ ach pwisin pwarata ngeni Kot pwe sia fich ngeni amanau. Nge, sipwe eani luku pwe ach amanau a longuni an Jises moon kepichilo. Ewe moon kepichilo ewe minen atipeeufengenni mettoch meinisin ren an Kot we kokkot.​—Efisus 1:8-14; Kolose 1:19, 20.

An Kot we Kapas mi Manaman

17. Menni aalen Israel lon pekin fituk sipwe ti senikich?

¹⁷ Chon Israel rese tolong lon an Kot asoso pokiten ar alleasolap me nafangauen luku. Ina popun Paul a pesei Chon Ipru Chon Kraist: “Iei minne, sipwe chok achocho ngeni ach tolong lon ewe leenien asoso, pwe esap wor emon epwe turutiu usun chok ir lom, pokiten lukumach.” (Ipru 4:11) Lape ngeni ekkewe Chon Jus lon ewe aewin senturi rese luku Jises, me chommong leiir ra riaffou watte le muchuloon ewe ototen Jus lon 70 C.E. A ifa me lamotan ach eani luku lon an Kot kkewe pwon ikenai!

18. (a) Me ren Paul, ikkefa ekewe popun sipwe lukuluku an Kot we Kapas? (b) Ifa ussun ewe kapasen Kot mi “ken seni sokkun katilas meinisin mi ken me ruu epek”?

¹⁸ Mei wor popun ach sipwe eani luku lon kapasen Jiowa. Paul a makkei: “Ewe kapasen Kot mi manau o manaman, a ken seni sokkun katilas meinisin mi ken me ruu epek, o a tu ngeni tori aimufeseni manau o ngun, o pwal ekkewe kailen chuu me masouen chuu; o a pwal tongeni apungu ekkewe ekiek o mochenian letipach.” (Ipru 4:12) Ewer, an Kot we kapas, are poraus, mi “ken seni sokkun katilas meinisin mi ken me ruu epek.” Chon Ipru Chon Kraist ra wisen chechchemeni met a fis ngeni ar lewo. Ra fen tunalo an Jiowa kapwung pwe repwe malo lon ewe fonupoon, me ra sotun le tolong lon ewe fonu mi pwonetiu. Nge Moses a ouroureer: “Ekewe chon Amalek me chon Kanaan ra nom ikenan, repwe nikemi lon maun.” Chon Israel ra tipeforea, me lupwen ra feita ngeni ewe fonu, “ekewe chon Amalek me ekewe chon Kanaan mi nom lon ewe fanu mi chukuchukuta ra feitiu o maun ngeniir. Ra akufu ekewe chon Israel o tapweriir tori Horma.” (Numperis 14:39-45) An Jiowa we kapas mi ken seni sokkun katilas meinisin mi ken me ruu epek, me aramas mi pukun tunalo repwe kini minne ra fotukatiu.​—Kalesia 6:7-9.

19. Ifa ukuukun manamanen an Kot kapas le ‘pwerelong,’ me ifa ewe popun sipwe etiwa wisach ngeni Kot?

¹⁹ Mi watte manamanen an Kot we kapas mi “tu ngeni tori aimufeseni manau o ngun, o pwal ekkewe kailen chuu me masouen chuu”! A pwerelong lon an aramas ekiek me mochen, me, lon kapas awewe, a tu ngeni masouen chuu! Inaamwo ika ekkewe Chon Israel mi fen ngaselo seni ar kichiniwel lon Isip ra tipeeu pwe repwe alleasochisi ewe Alluk, Jiowa a fen silei pwe lon alollolun letiper rese kon lien afanni minne a fen awora me met a kutta seniir. (Kol Fel 95:7-11) Lap seni ar ffoffori letipan, ra ekiekifichi ar apwonueta mochenin pwisin fituker. Ina pwata rese tolong lon ewe asoso Kot a pwon ngeniir, nge ra malo lon ewe fonupoon. Sipwe lefareni ena lesen, pun “esor och mettoch lon forien Kot kewe mi opelo seni i, nge mettoch meinisin mi chok suuk o mi pwapwalo mwen mesen ewe mi nemenikich.” (Ipru 4:13) Amwo sipwe apwonueta alon ach fangelo manauach ngeni Jiowa nge sisap “liwinsefal o poutmwalilo.”​—Ipru 10:39.

20. Met epwe fis lon mwach kkan, me met sipwe fori iei ren ach sipwe tolong lon an Kot asoso?

²⁰ Inaamwo “ewe afisuen ran”​—an Kot ranin asoso​—a chuen fetal, nge Kot a chuen ekkekieki feffeitaan an we kokkot ngeni fonufan me aramas. Muttir chok, ewe Messaia me King, Jises Kraist, epwe tolu seni fonufan ekkewe mi u ngeni letipen Kot, kapachelong Setan ewe Tefil. Atun ewe Nemenem won Engerou Ier, Jises me chienan kkewe sou nemenem, iteiter 144,000, repwe angang ngeni fisitaan letipen Kot ngeni fonufan me aramas. (Pwarata 14:1; 20:1-6) Iei ewe fansoun sipwe anneta pwe letipen Kot ewe mettoch mi lamot seni meinisin lon manauach. Sisap sotun le pwarata ukuukun ach fich ngeni amanau me afeffeitai pwisin pisekich, nge iei ewe fansoun ach sipwe ‘asoso seni ach angang’ me angang ngeni Muun Kot ren unusen letipach. Ren ach ffoffori ena, me ren ach amwochu tuppwol ngeni Semach lon lang, Jiowa, sipwe pwapwaesini ekkewe feioch seni an Kot asoso iei me pwal tori feilfeilo chok.

En mi Tongeni Awewei?

◻ Ifa ewe popun Kot a asoso lon “ewe afisuen ran”?

◻ Menni asoso Chon Israel repwe ita tongeni pwapwaeisini, nge ifa ewe popun rese tolong lon?

◻ Met sipwe ffori ika sipwe tolong lon an Kot asoso?

◻ Ifa ussun pwe an Kot kapas mi manau, manaman, me ken seni katilas mi ken me ruu epek meinisin?

[Sasing lón pekin taropwe 14, 15]

Chon Israel ra fori ewe Sapat, nge rese tolong lon an Kot asoso. En mi silei pwata?