Kukkuna Timun Ren Om Nonnom Lon An Kot Mwicheich

“Iten Jiowa eu imwen mas mi pochokkul. Ewe emon mi pwun a ssalong lon, iwe, a kuna tumun.”​—ÄN SALOMON FOS 18:10.

1. Me ren an Jises iotek, pwata a fokkun weires nonnomun chon Kraist?

EKIS chok mwen an malo, Jises a iotek ngeni Seman we lon lang fan iten noun kewe chon kaeo. Pokiten an tonger, a apasa: “Ua fen ngenir om kapas, nge ewe fonufan a oput ir, pun ir rese pacheri fonufan, ussun chok ngang use pacheri fonufan. Usap tingor pwe kopwe uwei ir seni fonufan, nge kopwe chok mammaser pokiten ewe emon mi ngau. (Jon 17:14, 15) Jises a silei pwe ewe fonufan epwe eu leeni mi efeiengau ngeni ekkewe Chon Kraist. Epwe pwarata an oput ir ren an kapas chofona ussur me an eriaffour. (Mattu 5:11, 12; 10:16, 17) Epwe pwal efisata chommong ffofforingau.​—2 Timoti 4:10; 1 Jon 2:15, 16.

2. Chon Kraist repwe tongeni kuna me ia eu leenien tumun lon pekin ngun?

² Ewe fonufan epwe oput chon Kraist a wewe ngeni ir mi kaimufesen seni Kot me ra nom fan nemenien Setan. (1 Jon 5:19) Ewe fonufan a fokkun watte seni ewe mwichefelin Kraist, me Setan a fokkun pochokkul seni aramas meinisin. Ina minne, an fonufan oput, ina wesewesen eu minen efeiengau ngenir. Noun Jises kkewe chon kaeo repwe tongeni kuna tumun lon pekin ngun me ia? Eu poraus lon Ewe Leenien Mas, minen December 1, 1922, a sotun awora poluan: “Iei sia nom lon ewe ran mi ngau. Ewe maun lefilen an Setan mwicheich me an Kot mwicheich a fen poputa. Iei eu maun mi wesewesen lapalap.” Lon ei maun, an Kot mwicheich, ina eu leenien tumun lon pekin ngun. Ewe kapas “mwicheich” ese mak lon Paipel, me mwirin 1920, “an Kot mwicheich,” ina eu minefoon kapas. Iwe, ifa weween ei mwicheich? Ifa ussun sipwe tongeni kuna tumun ren ach nonnom lon?

An Jiowa Mwicheich

3, 4. (a) Me ren eu puken awewei fos me Ewe Leenien Mas,ifa weween eu mwicheich? (b) Pwata sipwe tongeni apasa pwe ewe mwichen pwipwi Chon Pwarata Jiowa ra eani won unusen fonufan a wewe ngeni eu mwicheich?

³ Me ren ewe Concise Oxford Dictionary, eu mwicheich a wewe ngeni “eu mwich mi kokkotoch.” Ina minne, sia weweiti pwe pokiten ekkewe aposel ra akkota chon Kraist lon ewe aewin senturi lon ekkewe mwichefel mi nom fan ewe emmwen seni eu mwichen sou pwungupwung lon Jerusalem, iwe, a pwung ach sipwe apasa pwe ena “mwichen pwipwi,” ina eu mwicheich. (1 Piter 2:17) Ikenai a pwal ina ussun kokkotun ewe mwicheich Chon Pwarata Jiowa ra eani. Lon ewe aewin senturi ewe tipeeu lon ewe mwich a pochokkuleta ren “ekkewe mwan mi wewe ngeni liffang,” awewe chok ren “chon mas me sense.” Ekkoch leir ra saifetal lein ekkewe mwichefel, nge ekkewe lusun ir elter lon ekkewe mwichefel. (Efisus 4:8, 11, 12; Fofor 20:28) Ekkena sokkun “liffang” ra pwal apochokkula ewe tipeeu lefilen Chon Pwarata Jiowa ikenai.

⁴ Iei alon Ewe Leenien Mas, minen November 1, 1922, ussun ewe kapas “mwicheich”: “Eu mwicheich a wewe ngeni eu kumiin aramas mi ririfengen fan iten ar repwe apwonueta eu kokkot.” Ewe Leenien Mas a pwal apasa pwe ach eita ngeni Chon Pwarata Jiowa eu mwicheich esap wewe ngeni pwe ir “eu keangen lamalam me ren nounoun ena kapas, nge a chok wewe ngeni pwe ekkewe Bible Student [Chon Pwarata Jiowa] ra achocho le apwonueta an Kot kkewe kokkot me ra ffori ena mettoch ussun an ewe Samol ffori mettoch meinisin, weween, fan kokkotoch.” (1 Korint 14:33) Ewe aposel Paul a pwarata pwe chon Kraist lon ranin we ra pwal angang fan kokkotoch. A alollofengenni ewe kumiin chon Kraist mi kepit me inisin aramas, pun a wor chommong kifetin, iwe, eu me eu a kan apwonueta en me wisan pwe epwe fisoch angangan kkewe meinisin. (1 Korint 12:12-26) Ina eu kapas awewe mi fokkun murinno fan iten eu mwicheich! Pwata chon Kraist ra kokkotoch? Ra kokkotoch pwe repwe angang fan iten “an Kot kkewe kokkot,” weween, ren ar repwe ffoffori letipen Kot.

5. Meta an Kot we mwicheich won fonufan?

⁵ Paipel a oesini pwe chon Kraist mi enlet ikenai repwe tipeeufengen, me repwe chufengen lon eu “fonu” ussun chok eu “muu,” iwe, repwe “tittin ussun saram won ei fonufan.” (Aisea 66:8; Filipai 2:15) Iei, chon ei “muu” mi kokkotoch a lap seni limu me esopw million. (Aisea 60:8-10, 22) Iwe nge, esap ina ukuukun watteen an Kot mwicheich. A pwal kapachelong ekkewe chonlang.

6. Ren enletin weween, io kkewe ra choni an Kot mwicheich?

⁶ A wor chommong poraus ussun an ekkewe chonlang angangfengen me noun Kot kkewe aramas. (Keneses 28:12; Taniel 10:12-14; 12:1; Ipru 1:13, 14; Pwarata 14:14-16) Ina minne, a pwung alon Ewe Leenien Mas, minen May 15, 1925: “Meinisin ekkewe chonlang mi fel, ir chon an Kot mwicheich.” Iei pwal alon: “Ewe Samol Jises Kraist, i mokuren an Kot mwicheich, iwe, a eani sokkun manaman me nemenem.” (Mattu 28:18) Ina popun, ren enletin weween, an Kot mwicheich a wewe ngeni ir meinisin mi nonnom lon lang me won fonufan, iwe, ra angangfengen pwe repwe ffoffori letipen Kot. (Pi ena pwor.) A ifa watteen aucheaan ach sipwe kapachelong lon! Me a ifa watteen chengelin ach sipwe tufichin kuna ewe fansoun lupwen monumanau meinisin, lon lang me won fonufan, repwe kokkotoch fan iten ar repwe mwareiti Jiowa Kot fan tipeeu! (Pwarata 5:13, 14) Iwe nge, ifa ewe tumun an Kot mwicheich a kan akkawora ikenai?

Ifa Ussun Sipwe Kukkuna Tumun lon An Kot Mwicheich?

7. Ifa ussun an Kot mwicheich a kan tuttumunukich?

⁷ An Kot mwicheich epwe tongeni tumunukich seni Setan me an tipachchem sola. (Efisus 6:11) Setan a kan chouni, eriaffou, me sotuni ir mi fel ngeni Jiowa pun iei an ekiek: a mochen lukiirelo seni ‘ewe aal repwe ita fetal won.’ (Aisea 48:17; alollo ngeni Mattu 4:1-11.) Sisap tongeni unusen su seni ekkena sossot lon ei otot minen lom. Iwe nge, ach ririoch ngeni Kot me an mwicheich a akkapochokkulakich me tuttumunukich, iwe, a ina ussun an alisikich pwe sipwenom won “ewe aal.” Ina minne, esap tiuelo senikich minne sia kan apilukuluk ngeni.

8. Ifa ussun an Jiowa mwicheich lon lang a kan peppeni noun kkewe chon angang won fonufan?

⁸ Ifa ussun an Kot mwicheich a kan akkawora ena tumun? Aewin, noun Kot kkewe chonlang ra peppenikich fansoun meinisin. Lupwen Jises a kuna sossot watte, emon chonlang a apochokkula i. (Luk 22:43) Lupwen a ussun ita nge Piter epwe nninniilo, emon chonlang a selani i. (Fofor 12:6-11) Inaamwo ika esor ena esin manaman ikenai, nge a wor eu pwon ngeni noun Jiowa kkewe aramas pwe ekkewe chonlang repwe alisir lon ar angangen afalafal. (Pwarata 14:6, 7) Fan chommong, a kawor ngenir ewe pochokkul mi sokkolo watteen lupwen ra kuna sossot mi fokkun chou. (2 Korint 4:7) Pwal och, ra meefi pwe “ewe chonlangin Jiowa a kan pwelli ir mi menniniti i, me a kan selanir.”​—Kol Fel 34:7.

9, 10. Pwata sipwe tongeni apasa pwe “iten Jiowa eu imwen mas mi pochokkul,” me ifa ussun ena poraus a weneiti unusen an Kot mwicheich?

⁹ An Jiowa mwicheich won fonufan, ina pwal eu leenien tumun. Ifa ussun? Iei alon Än Salomon Fos 18:10, “Iten Jiowa eu imwen mas mi pochokkul. Ewe emon mi pwung a ssalong lon, iwe, a kuna tumun.” Esap ita weween pwe emon epwe kuna tumun ren chok an pappani iten Kot we. Nge ach opelong lon iten Kot we a wewe ngeni pwe sia eani lukuluk won Jiowa. (Kol Fel 20:1; 122:4) A wewe ngeni ach peppeni an nemenem mi unusen tekia, ach amwochata an kkewe alluk me emmwen, me ach luku an kkewe pwon. (Kol Fel 8:1-9; Aisea 50:10; Ipru 11:6) A pwal wewe ngeni ach fel ngeni Jiowa chok. Chokkewe chok mi feffel ngeni Jiowa lon ewe lapalap mi apwapwai i repwe tongeni aloni alon ewe chon makkei kol fel: “Letipach a chengel lon i [Jiowa]; pun sia fen eani lukuluk won itan we mi fel.”​—Kol Fel 33:21; 124:8.

¹⁰ Iei meinisin chon an Kot mwicheich won fonufan ra kan aloni alon Mika: “Nge ren filiach, kich meinisin sipwe feffetal fan iten Jiowa ach Kot tori fansoun ese kauk, pwal mwo nge tori feilfeilo chok.” (Mika 4:5) Ewe mwicheich ikenai a chu ngeni “ewe Israelin Kot,” ewe mi iteni lon Paipel “eu mwichen aramas fan asengesin itan we.” (Kalesia 6:16; Fofor 15:14; Aisea 43:6, 7; 1 Piter 2:17) Ina minne, ach choni an Jiowa mwicheich a wewe ngeni ach choni eu mwichen aramas mi kutta me kuna tumun lon iten Kot we.

11. Ifa ussun an Jiowa mwicheich a akkawora tumun ngeni ir mi kapachelong lon?

¹¹ Pwal och, an Kot mwicheich won fonufan, iei eu mwichen chon luku, eu kumiin chon lukuluk mi apochokkulafengenni emon me emon leir. (Än Salomon Fos 13:20; Rom 1:12) Iei eu leeni ikewe ie noun Kraist kkewe chon mas ra kan tuttumunu ekkewe siip, apochokkula me oururu ir mi semmwen me letipechou, me ra kan achocho le auetasefalli ir mi turulo. (Aisea 32:1, 2; 1 Piter 5:2-4) “Ewe chon angang mi tuppwol me tipachchem” a akkawora “mongo lon fansoun mi fich” ren an aea ewe mwicheich. (Mattu 24:45) Ena “chon angang,” weween, ekkewe chon Kraist mi kepit, a akkawora ekkewe mettoch lon pekin ngun mi nampa eu, nge iei ewe sile mi enlet, ewe mi popu seni Paipel, iwe, a tufichin emmwen ngeni manau esemuch. (Jon 17:3) Pokiten ewe emmwen seni ewe “chon angang,” a kawor alillis ngeni chon Kraist ren ar repwe kamwochunnuk won ekkewe alluk fan iten ffoffor mi limoch me pwal ren ar repwe “tipachchem ussun serepenit, nge limoch ussun lisom” lupwen repwe nonnom lon ewe fonufan mi efeiengau ngenir. (Mattu 10:16) A pwal wor alillis ngeir fansoun meinisin pwe epwe “chommong wiser lon angangen ewe Samol,” nge ina pwal och minen tumun mi pochokkul.​—1 Korint 15:58.

Io kkewe ra Kapachelong lon an Kot Mwicheich?

12. Io kkewe ra nom lon an Kot mwicheich lon lang?

¹² Pokiten ena tumun a kawor ngeni chon an Kot mwicheich, io kkewe ra kapachelong lon? Ren porausen ewe mwicheich lon lang, esor tipemwaramwar ren poluen ena kapas eis. Setan me noun kkewe chonlang rese chuen nonnom lon lang. Iwe nge, ekkewe chonlang mi tuppwol ra chuen nom ikewe ie ussun ita “lon eu mwichelap”. Ewe aposel Jon a kuna pwe le atun ekkewe ranin le sopwolon, “ewe Lam,” ekkewe kerop (“ekkewe fomon monumanau”), me “chommong chonlang” repwe nom ukukkun an Kot leenien nemenem. Ekkewe 24 elter repwe etir, nge ra liosueta ekkewe chon Kraist mi kepit mi fen tolong lon alemwirir mi ling lon lang. (Ipru 12:22, 23; Pwarata 5:6, 11; 12:7-12) A ffat pwe chokkana meinisin chon an Kot mwicheich. Iwe nge, ren aramas, ese mecheres an epwe ffat ena mettoch.

13. Ifa ussun Jises a esissinata ir kkewe mi nom lon an Kot mwicheich me chokkewe rese nom lon?

¹³ Iei alon Jises ussun ekkoch mi apasa pwe ir chon appiru i: “Chommong repwe apasa ngeniei lon ena ran, ‘Samol, Samol, esap pwe am aua oesini fan itom, me asulo timon fan itom, me ffori chommong manaman fan itom?’ Iwe nge, upwe affata ngenir: Use ngang sileikemi! Ou su seniei, ami chon ffofforingau.” (Mattu 7:22, 23) Ika emon a ffoffori minne mi ngau, esap i emon chon an Kot mwicheich, ese lifilifil met epwe apasa, me ese lifilifil ia epwe feffel ie. Jises a pwal pwarata ifa ussun sipwe tongeni esinna emon mi choni an Kot mwicheich. Iei alon: “Sap minne meinisin mi apasa ngeniei, ‘Samol, Samol,’ epwe tolong lon ewe muun lang, nge ewe emon mi ffoffori letipen Semei mi nonnom lang epwe tolong ie.”​—Mattu 7:21.

14. Ir mi nom lon an Kot mwicheich repwe wisen ffori met sokkun mettoch mi chu ngeni letipen Kot?

¹⁴ Ina minne, emon epwe ffoffori letipen Kot ren an epwe tufichin choni an Kot mwicheich, pwe “ewe muun lang” a nom lukanapen ena mwicheich. Ifa letipan? Paul a affata eu mettoch mi wesewesen lamot mi kapachelong lon lupwen a apasa pwe “Letipan pwe sokkun aramas meinisin repwe kuna manau me silei minne mi enlet.” (1 Timoti 2:4) Ika emon a wesewesen kutta silei mi enlet seni Paipel me a achocho le apwonueta lon manauan, me a sotuni le uwei ngeni “sokkun aramas meinisin,” iwe, a ffoffori letipen Kot. (Mattu 28:19, 20; Rom 10:13-15) Iei pwal letipen Kot, pwe noun Jiowa kkewe siip repwe kuna aner mongo me tumun. (Jon 21:15-17) An chon Kraist kkewe mwich a fokkun lamot fan iten ena. Ika emon a tufichin fiffiti ekkena mwich nge ese fiffiti, a pwarata pwe ese aucheani an epwe nonnom lon an Kot mwicheich.​—Ipru 10:23-25.

Chiechi ngeni Fonufan

15. Ifa ewe ourour Jemes a mak ngeni ekkewe mwichefel lon ranin we?

¹⁵ Ina epwe 30 ier mwirin maloon Jises, pwiin we Jemes a eiteita ekkoch mettoch mi tongeni emmwen ngeni an emon epwe towu seni an Kot mwicheich. Iei makkeian: “Ami chon lisowu kkana, ouse silei pwe ami chiechi ngeni fonufan mi anioput ngeni Kot? Ina minne, eka e mochen chiechi ngeni fonufan epwe awilalo pwisin i emon chon appolua Kot.” (Jemes 4:4) Emon mi appolua Kot esap fokkun tufichin nonnom lon an mwicheich. Iwe, ifa weween chiechi ngeni fonufan? A wewe ngeni fitu mettoch, awewe chok ren an epwe filata are fiffiti chiechi mi ngau. Pwal och, Jemes a menlapei ewe sokkun ekiek mi mwaal, nge mi emmwen ngeni ffoffor ese pwung.

16. Met Jemes a makkei me mwen an ourour pwe chiechi ngeni fonufan epwe wewe ngeni an emon appolua Kot?

¹⁶ Iei alon Jemes 4:1-3: “Met a kan efisata maun, met a kan efisata fiu leimi? Esap pwe ra popu seni ei mettoch, weween, seni ami tipeni met kkan mwo inisimi epwe pwapwa ren, nge ra ufengen lon kifetin inisimi? Oua tipeni, nge ouse tori. Oua nnielo me mocheniaiti, iwe nge, ouse tottori. Oua fiffiu me mammaun. Ouse angei pun ouse tittingor. Oua kan tingor, iwe nge, ouse angei, pun mi mwaal minne oua tingorei, pwe oua mochen apwonueta ami kkana mocheniangau.” Mwirin an Jemes makkei ekkena kapas, a makkei ewe ourour ussun chiechi ngeni fonufan.

17. Ifa ussun an a fis “maun” me “fiu” lon ewe mwichefelin chon Kraist lon ewe aewin senturi?

¹⁷ Fitepuku ier mwirin maloon Jemes, chon Kraist mi chofona ra wesewesen maun me nnifengennir. Iwe nge, Jemes a mak ngeni chon “ewe Israelin Kot” lon ewe aewin senturi, nge repwe ita wiliiti ‘samol fel me king’ lon lang. (Pwarata 20:6) Sap minne ra wesewesen nnifengennir lon maun. Iwe, pwata chok Jemes a kapas ussun ekkena mettoch lein chon Kraist? Iwe, ewe aposel Jon a makkei pwe emon mi oput pwiin we, i emon chon nnielo aramas. Iwe, Paul a makkei pwe kinikinfesen me aninifengen lon ewe mwichefel ra wewe ngeni “fiu” me “fitikokofengen.” (Taitos 3:9; 2 Timoti 2:14; 1 Jon 3:15-17) Neman Jemes a ekieki ussun nafangauen tong lefilen chon Kraist. Ekkena ffoffor chon Kraist ra eani lefiler a usun ffofforun chon lukun.

18. Met epwe tongeni emmwen ngeni ffoffor me memmeef mi ese fiti tong lein chon Kraist?

¹⁸ Pwata ekkana mettoch ra fis lon ekkewe mwichefelin Kraist? Popun, pun a wor ekiek mi mwaal, awewe chok ren tipemmong me “mocheniangau ren apwapwaan inis.” Lamalam tekia, lolowo, me kutta it epwe pwal tongeni atai ewe tongen pwipwi lefilen chon Kraist lon eu mwichefel. (Jemes 3:6, 14) Ekkena sokkun ekiek epwe awilalo emon pwe epwe emon chiechien fonufan, ina minne, ewpe pwal wiliiti emon chon appolua Kot. Meinisin mi eani ekkena sokkun ekiek resap tongeni nonnom lon an Kot mwicheich.

19. (a) Sipwe ita tipi ngeni io ika ekiek mi mwaal epwe pwukuta lon letipen emon chon Kraist? (b) Ifa ussun emon chon Kraist epwe pworaiti ekiek mi mwaal?

¹⁹ Sipwe ita tipi ngeni io ika sipwe kuna pwe a wor ekiek mi mwaal an a pwukuta lon letipach? Sipwe ita tipi ngeni Setan? Eli, maa, ekis. I “ewe sou nemenem won asapwalin” ei fonufan, nge ekkena sokkun ekiek ra fokkun choufetal lon. (Efisus 2:1, 2; Taitos 2:12) Iwe nge, ekiek mi mwaal ra kan pwukuta seni pwisin futukach ese unusoch. Iei makkeien Jemes mwirin an eani ewe ourour ussun ach chiechi ngeni fonufan: “Ita ami ekiek pwe esor popun an a mak ei kapas lon ekkewe puk mi fel: ‘Ewe ngun mi fen tolong lon kich a tipeni an epwe meefi lolowo’?” (Jemes 4:5) A mecheres ach sipwe tipis pun seni uputiuach sise unusoch. (Keneses 8:21; Rom 7:18-20) Iwe nge, sipwe tongeni fiu ngeni ena mettoch ika sipwe miritiiti ach kkewe apwangapwang me eani lukuluk won alillisin Jiowa ren ach sipwe tufichin pworaitir. Iei alon Jemes: “Ewe umoumoch [Kot] a liffangoto a lap [seni ach pukun lolowo].” (Jemes 4:6) Ren alillisin an Kot ngun mi fel me pwiich kkewe chon Kraist mi tuppwol, me pwal ren aucheaan an Jises asorun penmanau, chon Kraist rese kan kkuf ren apwangapwangen fituker. (Rom 7:24, 25) Ra kukkuna tumun lon an Kot mwicheich pokiten ir chiechien Kot, nge esap fonufan.

20. Ikkefa ekkewe feioch lapalap epwe tori ir kkewe mi pacheri an Kot we mwicheich?

²⁰ Iei an Paipel pwon: “Jiowa epwe wesewesen awora pochokkul ngeni noun kkewe aramas. Jiowa epwe efeiochu noun kkewe aramas ren kinamwe.” (Kol Fel 29:11) Ika sia wesewesen pacheri an Jiowa we “muu” ikenai, weween, an mwicheich won fonufan, sipwe angei ewe pochokkul a kan akkawora me pwapwaesini ewe kinamwe a kan ekkefeiochu noun kkewe aramas ren. A enlet pwe an Setan fonufan a fokkun watte seni an Jiowa mwicheich won fonufan, me Setan a fokkun pochokkul senikich. Nge Jiowa a Tekia seni meinisin. An manaman epwe tongeni pworaiti mettoch meinisin. Noun kkewe chonlang mi manaman ra pwal fiffitikich le angang ngeni Kot. Ina minne, inaamwo ika sia kukkuna oput, nge sipwe tongeni uppwos. Sipwe tongeni pworaiti fonufan, ussun chok Jises.​—Jon 16:33; 1 Jon 4:4.

Kopwe Tongeni Awewei?

◻ Ifa an Kot we mwicheich won fonufan?

◻ Ifa ussun an Kot we mwicheich a awora tumun?

◻ Io kkewe ra kapachelong lon an Kot we mwicheich?

◻ Ifa ussun sipwe tumunu pwe sisap chiechi ngeni fonufan?

[Pwóór lón pekin taropwe 19]

Meta An Kot we Mwicheich?

Lon an Chon Pwarata Jiowa kewe puk, ra nounou ewe poraus “An Kot mwicheich” ren ulungat weween.

1 A kapachelong lon an Jiowa we mwicheich lon lang mi monomon ekkewe ngun mi tuppwol. Paipel a eita ngeni “Jerusalem asan.”​—Kalesia 4:26.

2 An Jiowa we mwicheichen aramas mi nom won fonufan. Ikenai, ewe lusun mi kepit fengen me chon ewe mwich mi lapalap ra kapachelong lon.

3 An Jiowa we mwicheich lon lang pwal won fonufan. Ikenai, a kapachelong an Jiowa we mwicheich lon lang fengen me noun kkewe mi kepit won fonufan mi eani apilukulukun manau lon lang. Mwirin och fansoun, aramas mi unusochulo won fonufan repwe pwal kapachelong.

[Sasing lón pekin taropwe 20]

Mongoon ngun mi murinno seni meinisin a kawor ren an Jiowa we mwicheich