Fel Ngeni Kot Ren Enlet

Ika ach fel epwe pwung me ren Kot, epwe ita longolong won enlet. (Jon 4:23) Ewe Paipel a esissinnaata ekkewe chon fel mi enlet ussun ar nonnom lon “ewe mwichefelin Kot mi manau, iei i urulapen o pwal longolongun ewe enlet.” (1 Timoti 3:15) Ekkewe mi fiti ewe mwichefelin Kot rese chok luku ewe enlet lon Kapasen Kot nge ra pwal tumunu me manaueni manauer mi tipeeu ngeni, me ra esileifeili won unusen fonufan.​—Mattu 24:14; Rom 10:9-15.

CHON PWARAATA JIOWA ra sinnelo ren ar angangen asukula aramas seni Paipel, eu angang a fiffis lon lap seni 200 fonu. Ra kaeo ewe Paipel me ra asukula aramas ussun ewe enlet seni, nge rese nofiti ngeni ekiekin aramas. Ka fen rongorong ar kewe minen asukul seni Paipel? Chommong rese mochen auseling ngeni Chon Pwaraata Jiowa pokiten ra fen rongorong poraus mi ngau ekkoch ra aporausa fetalei ussur. Nge, sia etiwa ekkewe aramas mi letip wenechar ar repwe pwisin filaata ika minne ekkewe Chon Pwaraata ra afalafala mi pwung are mwaal. Ese pwung ika ach kefil epwe ita longolong chok won minne sia fen rongorong seni aramas. Chommong ekkewe mi fen pwisin atittina minne Chon Pwaraata Jiowa ra asukula aramas ra kuna feioch watte.

Ach Silei ussun ewe Enlet epwe Awesalo Niuokkus

Awewe chok, ekieki mwo porausen Eugenia. A maarita ussun nge i emon Katolik. Seman we emon me leiin ekkewe ra akkota an ewe papa pin chuuri Mexico lon 1979. Eu ran lupwen a chuuri chienan kewe, Chon Pwaraata Jiowa ra chuuri Eugenia. Ren ar alillis a poputa le atittinafichi met ewe Paipel a apasa. A apasa: “Le poputaan, ua fokkun niuokkus. Ua fen kuna ewe enlet! Nge, weween pwe lape ngeni meinisin minne ua fen luku ese pwung. Weween pwe ai famili, chienei kewe, me aramas ua fokkun tongei​—ar luku mi pwal mwaal. Ua pireir. Ua pwisin anchangei ika epwe fet meefien ai famili ngeni minne ua keran kaeo. Lo, lo, lo, me ren alillisin Jiowa, ua ekis kinamweelo seni ai osukosuk watte. Eu ran ua filaata pwe upwe fos ngeni emon chiechien ai we famili, emon senseen lamalam. Ua pwaraata ngeni ai mochen kutta ewe enlet. Iwe, a apasa, ‘Ika ka mochen silei ewe enlet, kutta ekkewe Chon Pwaraata Jiowa.’”

Met Eugenia a niueiti a fis, an famili a asuolo i seni imwer. Iwe nge, ekkewe Chon Pwaraata ra sopweilo ar awora ngeni alillis lon pekin ngun. A apasa: “Ua pochokkulelo pwe upwe uppos fan iten ewe enlet. Ua miritiiti pwe iei eu mettoch mi auchea ua mochen amwochu. Lapalapen an ekkewe Chon Pwaraata Jiowa awasolaei a fokkun lamot ngeniei. Ua meefi an ewe mwichefel tong. Ai arap ngeni an Kot we mwicheich a alisiei le pwakini ai niuokkus le fiti ei minefoon lamalam inaamwo ika ai famili resap fitiei.”

Iei pwal eu poraus. Lupwen Sabrina a maarita, a eoreni an popporausfengen me an famili ussun ewe Paipel. Ren enletin, ra poputaani eu sokkun ‘lamalam lon ar famili.’ A poputa le chiechi ngeni aramas seni sokkopaten lamalam pwe epwe pwaraata ar mwaal. Lupwen emon Chon Pwaraata Jiowa a eisini ika a mochen kaeo ewe Paipel, a muttir etiwa pun a pwal mochen aiti ngeni mwaalin ar luku. A chechchemeni: “Mwirin ua fen kaeo lap seni eu ier, ua poputa le meefi niuokkus pwe epwe pout seniei ‘ai enlet.’ A fen mecheres ngeni ai pwaraata tipatchem solaan chommong lamalam ua fen fiffiti, nge esap ina ussun ren Chon Pwaraata Jiowa.”

Pokiten an Sabrina niuokkus, a ukutiu le kaeo ewe Paipel ren Chon Pwaraata Jiowa. Nge mwirin, a meefi lukulukungau lon pekin ngun. A poputa le kaeo sefal me lo, lo, lo, a nguuri ewe enlet. Sabrina a feffeita tori a mochen esilei ngeni aramas minne a fen kakkaeo. A pwal mwo nge tingor ekkewe Chon Pwaraata ika epwe tongeni fitiir lon ewe angangen afalafal imw me imw. Sabrina a awewei: “Mwen upwe tongeni fiti ekkewe Chon Pwaraata le afalafal, ra eisiniei: ‘Ka wesewesen mochen wiliiti emon Chon Pwaraata Jiowa?’ ‘Aapwi!’ Ua polueni. Ua poputa le meefi niuokkus sefal.” Le sopwoloon, mwirin an fiffiti ekkewe mwich meinisin me akkatola noun Kot kewe aramas me ifa ussun ra apwonueta alon ewe Paipel, Sabrina a miritiiti pwe a fen kuna ewe enlet. A papataiselo me iei a fiti ewe angangen afalafal full-time.

Pwata ra kon Sokkolo?

Eli emon epwe kapas eis, ‘Met popun a kon sokkofesen lukuen Chon Pwaraata Jiowa seni ekkewe ekkoch lamalam?’ Ach ekis nengeni met ekkewe Chon Pwaraata ra luku epwe alisuk om kopwe kuna pwe ir Chon Kraist mi wenechar, chon kaeo Paipel mi tinikken. Am aua peseiok om kopwe cheki ekkewe wokisin seni pwisin noum Paipel ussun ar luku a mak asan.

Ren om atittinaochu lukuen Chon Pwaraata Jiowa me ifa ussun ra fitipach ngeni met ewe Paipel a apasa, kopwe feioch ren ewe ngaselo ewe enlet a awora. (Jon 17:17) Esor popun sipwe niueiti ewe enlet. Chechchemeni an Jises we pwon: “Iwe, oupwe sinei minne mi enlet, o minne mi enlet epwe angasalo ami.”​—Jon 8:32.

[Pwóór lón pekin taropwe 6]

EKKOCH LUKUEN CHON PWARAATA JIOWA

◯ Jiowa ewe Kot mi lapalap. Itan we a mak arapakan fan 7,000 lon ekkewe kapiin Paipel loom.​—Kol Fel 83:18.

◯ Jises Kraist i Noun Kot, mi feitiu ngeni fonufan pwe epwe fangelo manauan fan iten aramas. (Jon 3:16, 17) Chon Pwaraata Jiowa ra tapwelo mwirin alon Jises ussun a mak lon ewe Paipel.

◯ Ewe it Chon Pwaraata Jiowa a longolong won minne Aisea 43:10 a apasa: “‘Ami nei chon pwarata,’ ewe Samol mi Lapalap a apasa.”

◯ Ewe Muu aramas ra ioteki epwe feito lon ewe iotekin “Semach”, wesewesen eu muun lang epwele awesaalo riaffou me metek seni fonufan pwe epwe suukaalo ewe aal fan iten ewe Paratis ewe Paipel a pwonetiu.​—Aisea 9:6, 7; Taniel 2:44; Mattu 6:9, 10; Pwarata 21:3, 4.

◯ Mi suuk ngeni meinisin mi fori letipen Kot ar repwe pwapwaesini ekkewe feioch seni ewe Muu feilfeilo.​—Jon 17:3; 1 Jon 2:17.

◯ Chon Kraist repwe ita atipeeufengenni manauer ren minne ewe Paipel a apasa. Repwe achocho ngeni ar repwe wenechar, ar repwe manaueni ewe manau mi limelimoch me pwung, pwal repwe pwaraata tong ngeni chon orur kewe.​—Mattu 22:39; Jon 13:35; 1 Korint 6:9, 10.

[Sasing lón pekin taropwe 5]

Chon Pwaraata Jiowa ra esileifeili ewe enlet seni Paipel ngeni aramas lon lap seni 200 fonu